கன்டெண்ட் தேடும் இடமா இது? யூட்யூப் சேனல்களை விளாசிய விஜே சித்து! பிஜிலி ரமேஷ் வீட்டில் கண்ணீர்..!

Updated: Wednesday, August 28, 2024, 13:04 [IST]

Subscribe to Oneindia Tamil

சென்னை: சமூக வலைதளங்களில் பிரபலமாகி சினிமாவில் கால்பதித்து ரசிகர்களின் வரவேற்பை பெற்ற பிஜிலி ரமேஷ் காலமான நிலையில், அவரது உடலுக்கு கண்ணீர் மல்க அஞ்சலி செலுத்தினார் பிரபல யூட்யூபர் விஜே சித்து. அப்போது யூட்யூப் சேனல்கள் அவரை பேட்டி எடுத்த நிலையில், கன்டெண்ட் தேடும் இடமா? இது எனக் கேட்டு அதிருப்தியை வெளிப்படுத்தினார்.

ப்ளாக்‌ஷீப் யூட்யூப் சேனலின் விஜே சித்துவின் 'ஃபன் பண்றோம்" நிகழ்ச்சியில் ஒரே ஒரு வீடியோவில் தோன்றி பிரபலமாகி, பல முன்னணி நடிகர்களின் படங்களில் நடித்து வந்த பிஜிலி ரமேஷ் உடல் நலக்குறைவால் நேற்று
காலமானார்.

ஆரம்பத்தில் கூலி வேலை பார்த்து வந்த பிஜிலி ரமேஷ், விஜே சித்துவின் அந்த நிகழ்ச்சிக்கு பிறகு தான் சமூக வலைதளங்களில் பிரபலமானார். தொடர்ந்து பல யூட்யூப் சேனல்கள் அவரை பேட்டி எடுத்தன. அவரது பேச்சும் சைகையும் மீம் கன்டண்டுகளாக மாறியது.

தொடர்ந்து சினிமாவிலும் அவருக்கு வாய்ப்பு கிடைத்தது. முதன்முதலாக இயக்குனர் நெல்சன் திலீப்குமார் இயக்கிய கோலமாவு கோகிலா படத்தில் அறிமுகமானார் பிஜிலி ரமேஷ், அதற்கு பிறகு ஹிப் ஹாப் ஆதியின் நட்பே துணை, சிவப்பு மஞ்சள் பச்சை, கோமாளி, ஆடை, நெஞ்சமுண்டு நேர்மை உண்டு ஓடு ராஜா போன்ற படங்களில் நடித்தார்.

அவருக்கு திருமணம் ஆகி ஒரு மகனும் இருக்கிறார். இந்த நிலையில் குடிப்பழக்கத்தால் அவரது உடல்நிலை மோசமானது. காலை மாலை இரவு என எந்நேரமும் குடித்துக்கொண்டே இருப்பேன்.. உடல்நிலை சரியாகவில்லை.. இப்பொழுது மரணத்தை எதிர்நோக்கி இருக்கிறேன் என ரமேஷ் பேசிய வீடியோ சமூக வலைதளங்களில் வெளியாகி பெரும் அதிர்ச்சியை ஏற்படுத்தியது. இந்த நிலையில் கல்லீரல் மற்றும் கால் வீக்கம் காரணமாக அவதிப்பட்டு வந்த பிஜிலி ரமேஷ் மருத்துவமனையில் அனுமதிக்கப்பட்டார்.

தொடர்ந்து சிகிச்சைக்குப் பிறகு அவர் வீடு திரும்பினார். இருந்த போதும் அவரது உடல்நிலை சீராகவில்லை. இதை அடுத்து தனது கணவரின் சிகிச்சைக்கு உதவ வேண்டும் என அவரது மனைவி கண்ணீர் மல்க கோரிக்கை விடுத்திருந்தார். அவரது பேட்டி வெளியான அடுத்த நாளே அதாவது நேற்று உயிரிழந்தார். இதை அடுத்து பொதுமக்கள் அஞ்சலிக்காக அவரது உடல் வீட்டில் வைக்கப்பட்டது.

தொடர்ந்து திரை உலகினரும் ரசிகர்களும் உறவினர்களும், பிஜிலி ரமேஷ் உடலுக்கு அஞ்சலி செலுத்தினார். தொடர்ந்து விஜே சித்து நேரில் வந்து பிஜிலி ரமேஷ் உடலுக்கு அஞ்சலி செலுத்தி குடும்பத்தினருக்கு ஆறுதல் தெரிவித்தார்.

அப்போது யூட்யூப் சேனல்கள் அவரை சூழ்ந்து கொண்டு பேட்டி எடுத்தன. அப்போது ஒரு யூட்யூபர் காலையிலிருந்து கன்டண்ட் எதுவுமே கிடைக்கவில்லை.. ஏதாவது பேசுங்க என கூறினார். இதனால் அதிருப்தி அடைந்த விஜே சித்து,"கன்டண்ட் தேடும் இடமா இது? ரொம்ப தவறான விஷயம்? ஒருத்தர் வீட்டில் துக்கம் நடக்கும்போது.. நாம் கன்டண்ட் தேடக் கூடாது" என்றதோடு "பிஜிலி ரமேஷின் மரணத்தில் சொல்வதற்கு எதுவும் இல்லை குடிப்பழக்கம் காரணம் என்றாலும்.. அது நடக்கும் போது நடந்தே தீரும்.. என்னால் அவர் பிரபலமானார் என்று கிடையாது. அவரால் கூட நான் பிரபலமாக இருக்கலாம்.. துக்க வீடுகளில் இதுபோன்று செய்வது தவறு" என கூறினார்.

தற்போது அந்த வீடியோ வெளியாகும் நிலையில் சாவு வீட்டில் கூடவா கன்டெண்ட் தேடுவீர்கள் என யூடியூப் சேனல்களை நெட்டிசன்கள் விமர்சித்து வருகின்றனர்.