அரசியலில் ரீ-என்ட்ரி கொடுத்த பவர் ஸ்டார் சீனிவாசன்! இந்த கட்சியிலயா சேர்ந்துட்டாரு? வெளியான தகவல்

சென்னை: பிரபல நடிகரான பவர் ஸ்டார் சீனிவாசன் பாரிவேந்தர் பச்சமுத்துவின் ஐஜேகே கட்சியில் இணைந்து இருக்கிறார். கடந்த சில தினங்களாக மருத்துவமனையில் அனுமதிக்கப்பட்ட அவர் இன்று கட்சியில் இணைந்த அறிவிப்பை வெளியிட்டு இருக்கிறார். ஏற்கனவே அவர் பாஜக, தமாக உள்ளிட்ட கட்சிகளில் பயணித்தவர் என்பது குறிப்பிடத்தக்கது.

தமிழ் திரை உலகில் ஹீரோவாக அறிமுகம் ஆகி காமெடி நடிகனாக மாறியவர் பவர் ஸ்டார் சீனிவாசன். மதுரையைச் சேர்ந்த தொழிலதிபரான அவர் மருத்துவர் என்றும் தன்னைக் கூறிக் கொண்டது உண்டு.

லத்திகா படத்தின் மூலம் ஹீரோவாக அறிமுகமாகி பின்னர் சில படங்களில் நடித்த நிலையில், சந்தானம் நடிப்பில் வெளியான கண்ணா லட்டு தின்ன ஆசையா படம் அவருக்கு திருப்புமுனையை ஏற்படுத்தியது என்பது குறிப்பிடத்தக்கது.

தொடர்ந்து ஒன்பதுல குரு, ஐ உள்ளிட்ட பல படங்களில் நடித்திருந்தார். பவர் ஸ்டார் என்று அடைமொழியோடு சூப்பர் ஸ்டாருக்கு சவால் விட்டவர். இயக்குனர், தயாரிப்பாளர் என பல முகங்களை கொண்டவர். கடந்த சில ஆண்டுகளுக்கு முன்பு பண மோசடி வழக்கில் கைது செய்யப்பட்டு சிறையில் அடைக்கப்பட்டு பரபரப்பை ஏற்படுத்தினார்.

இதற்கிடையே கடந்த சில ஆண்டுகளாக சினிமா வாய்ப்பின்றி இருந்த அவருக்கு உடல் நலக்குறைவும் ஏற்பட்டது. சிறுநீரக பிரச்சனை காரணமாக மருத்துவமனையில் தங்கி சிகிச்சை பெற்று வந்தார். தொடர்ந்து அவர் நலம் பெற வேண்டும் என ரசிகர்கள் பிரார்த்தனை செய்து வந்தனர். இந்த நிலையில் திடீரென அரசியல் கட்சியில் மீண்டும் இணைந்து இருக்கிறார் பவர் ஸ்டார் சீனிவாசன்.

பிரபல தொழிலதிபரும் முன்னாள் எம்பியும் ஆன பாரிவேந்தர் பச்சமுத்துவின் இந்திய ஜனநாயக கட்சியில் இணைந்து இருக்கிறார் பவர்ஸ்டார். தற்போது அந்த தகவல் வெளியாகி இருக்கிறது. ஏற்கனவே அரசியல் கட்சியில் பயணித்தவர் தான் சீனிவாசன். பாரதிய ஜனதா கட்சி, தமிழ் மாநில காங்கிரஸ், குடியரசு கட்சி உள்ளிட்ட கட்சிகள் இணைந்த அவர், அதன் பிறகு வெளியேறினார்.

மேலும் கடந்த 2019 ஆம் ஆண்டு மக்களவைத் தேர்தலில் தென்சென்னை தொகுதியில் சுயேட்சையாக போட்டியிட்டதும் குறிப்பிடத்தக்கது. கடந்த சில நாட்களாக இந்திய ஜனநாயக கட்சியில் உறுப்பினர் சேர்க்கை தீவிரமாக நடைபெற்று வருகிறது. இது தொடர்பாக தொலைக்காட்சிகளிலும் விளம்பரங்கள் வெளியாகி இருந்தது. இதற்கிடையே அந்த கட்சியில் கடந்த சில தினங்களுக்கு முன்பு தயாரிப்பாளரும் நடிகருமான ஆர்கே சுரேஷ் இணைந்தார். அவர் ஏற்கனவே பாஜகவில் இருந்தது குறிப்பிடத்தக்கது. இந்த நிலையில் ஐஜேகேவில் இணைந்த உடனேயே அவருக்கு அகில இந்திய அமைப்பு செயலாளர் பதவி வழங்கப்பட்டதும் குறிப்பிடத்தக்கது.

English summary

Popular actor Power Star Srinivasan has joined Parivendhar Pachamuthu's IJK Party. After a hiatus due to health issues, he resumes his political journey, marking another twist in his multifaceted career.