ராகுல் வெயிலில் போராட்டம்! ஏசி கிளப்பில் சொகுசு சாப்பாடு சாப்பிட்ட தமிழக காங்கிரஸ் எம்.பி யார்?
சென்னை: நேற்று டெல்லியில் தலைமைத் தேர்தல் ஆணைய அலுவலகத்தை முற்றுகையிட எதிர்க்கட்சிகள் நடத்திய அதிரடிப் போராட்டத்தில் ஒரு சுவாரஸ்யமான பின்னணி அரசியல் சம்பவம் அரங்கேறியுள்ளது.
காங்கிரஸ் மூத்த தலைவர் ராகுல் காந்தி, பிரியங்கா காந்தி உள்ளிட்ட முக்கியத் தலைவர்கள் சாலையிலும் வெயிலிலும் நின்று காவல்துறையினருடன் மல்லுக்கட்டிய வேளையில், தமிழகத்தைச் சேர்ந்த காங்கிரஸ் எம்.பி ஒருவர் போராட்டக் களத்திலிருந்து நைசாக நழுவி, அருகிலிருந்த குளிரூட்டப்பட்ட (ஏசி) கிளப்பில் அமர்ந்து சொகுசாக மதிய உணவு சாப்பிட்ட விவகாரம் தற்போது அரசியல் வட்டாரங்களில் பேசுபொருளாகியுள்ளது.
டெல்லி சாலையில் வெடித்த ரணகளம்
நாடாளுமன்ற வளாகத்திலிருந்து தேர்தல் ஆணையம் நோக்கி 'இந்தியா' கூட்டணி எம்.பி-க்கள் நேற்று பெரும் பேரணியாகப் புறப்பட்டனர். தலைமைத் தேர்தல் ஆணையரைச் சந்தித்து மனு அளிக்க வேண்டும் என்பது அவர்களின் நோக்கம். ஆனால், நாடாளுமன்றச் சாலை மற்றும் ஆகாஷ்வாணி பவன் அருகே டெல்லி காவல்துறை இரும்பு தடுப்புகளை (பரிகேட்ஸ்) அமைத்து அவர்களை வழிமறித்தது.
அப்போது காங்கிரஸ் தலைவர் ராகுல் காந்தி மிகத் தீவிரமாக களமிறங்கினார். தடுப்புகளைத் தாண்டி ஏற முயன்ற அவர், தொண்டர்களோடு தோளோடு தோள் நின்று ஆவேசமாக முழக்கங்களை எழுப்பினார். போலீசாரின் தடையைத் தாண்டி ஆகாஷ்வாணி பவன் வளாகத்திற்குள் நுழைந்த ராகுல் காந்தி, பிரியங்கா காந்தி மற்றும் கூட்டணிக் கட்சித் தலைவர்கள் அங்கேயே தரையில் அமர்ந்து நீண்ட தர்ணா போராட்டத்தில் ஈடுபட்டனர்.
தள்ளுமுள்ளு, கைது... அனல் பறந்த சூழல்
மதியம் தொடங்கி மாலை வரை சுமார் 8 முதல் 9 மணி நேரம் இந்த தர்ணா நீடித்தது. மதிய வெயிலில் தலைவர்கள் அனைவரும் தரையிலேயே அமர்ந்திருந்தனர். தண்ணீர் பாட்டில்களும், சில உணவுகளும் மட்டுமே உள்ளே கொண்டு செல்ல அனுமதிக்கப்பட்டன.
மாலை வேளையில் நிலைமை மேலும் தீவிரமடைந்தது. டெல்லி காவல்துறை உள்ளே புகுந்து, தலைவர்களை குண்டுக்கட்டாகத் தூக்கி பேருந்துகளில் ஏற்றியது. ராகுல் காந்தி, பிரியங்கா காந்தி, கே.சி. வேணுகோபால் உள்ளிட்ட பல மூத்த தலைவர்கள் கைது செய்யப்பட்டு காவல் நிலையங்களுக்குக் கொண்டு செல்லப்பட்டனர். இந்த காட்சிகளைத் தொலைக்காட்சிகளில் பார்த்த தொண்டர்கள் கொதித்துப் போயினர்.
போராட்டத்தை விட்டு எஸ்கேப் ஆன எம்.பி
ஆனால், இந்த பரபரப்பான போராட்டக் களத்தின் ஒரு ஓரத்தில் யாரும் எதிர்பார்க்காத நகைச்சுவையான திருப்பம் நிகழ்ந்தது.
களத்தில் தள்ளுமுள்ளு நடந்து கொண்டிருந்த போது, கூட்டத்தில் இருந்த தமிழகத்தைச் சேர்ந்த காங்கிரஸ் எம்.பி ஒருவர் மெதுவாகக் கூட்டத்திலிருந்து விலகத் தொடங்கினார். போலீசாரின் கழுகுப் பார்வையில் படாமல், பின்வாசல் வழியாக நைசாக நழுவிய அவர், அங்கிருந்து அருகிலுள்ள ஒரு பிரபல நட்சத்திரக் கிளப்பை நோக்கி விரைந்தார்.
அங்கு சென்று குளிரூட்டப்பட்ட சொகுசு அறையில் அமர்ந்து, விதவிதமான உணவுகளை ஆர்டர் செய்து பொறுமையாக மதிய உணவை உண்டு முடித்துள்ளார்.
"அங்கே போராட்டம்... இங்கே வெஜ் பிரியாணியா?"
அதே பகுதியில் பாதுகாப்புப் பணியில் இருந்த சில போலீசாரும், அங்கு நின்றுகொண்டிருந்த பத்திரிகையாளர்களும் இந்த காட்சியைப் பார்த்து வாய்விட்டுச் சிரித்துவிட்டனர்.
"அங்கே இவர்களுடைய தேசியத் தலைவர் ராகுல் காந்தி வெயிலிலும் புழுதியிலும் அமர்ந்து போலீசாரிடம் தள்ளுமுள்ளு வாங்கிக்கொண்டிருக்கிறார்; அவருடைய தங்கை பிரியங்கா காந்தி தரையில் அமர்ந்து போராடுகிறார். ஆனால், அதே கட்சியைச் சேர்ந்த இந்த எம்.பி எதைப் பற்றியும் கவலைப்படாமல் ஜாலியாக ஏசி கிளப்பில் சாப்பிட்டுக் கொண்டிருக்கிறாரே!" என்று செய்தியாளர்கள் தங்களுக்குள் கிசுகிசுத்துக் கொண்டனர்.
யார் அந்த தமிழக காங்கிரஸ் எம்.பி?
விசாரணையில், அந்த எம்.பி அண்மையில் தமிழகத்திலிருந்து தேர்ந்தெடுக்கப்பட்ட காங்கிரஸ் எம்.பி என்பது தெரியவந்துள்ளது. கட்சி லாபிக்களில் முழங்குவதும், ஊடகங்களில் தீவிரமாகப் பேசுவதுமாக இருக்கும் இவர், நடைமுறையில் போராட்டம் வெடிக்கும்போது நைசாக கழன்று கொள்வதில் கில்லாடி என்கிறார்கள் விவரம் அறிந்தவர்கள்.
தனது தலைவர் ராகுல் காந்தி கைதாகி காவல் நிலையத்துக்குக் கொண்டு செல்லப்பட்ட நேரத்தில், சொந்தக் கட்சி எம்.பியே களத்தை விட்டுவிட்டு கிளப்பில் சாப்பாட்டை ருசித்துக்கொண்டிருந்த விவகாரம், தற்போது காங்கிரஸ் கட்சிக்குள்ளேயே முணுமுணுப்பை ஏற்படுத்தியுள்ளது.
Click it and Unblock the Notifications
Sign in with Google
