ஜில் ஜில் மழையே எங்கே இருந்தாய்.. செம காற்று! சென்னையில் கொட்டிய மழை - குதூகலித்து கொண்டாடும் மக்கள்

சென்னை: கடந்த சில மாதங்களாக சென்னையில் கடும் வெப்பம் வாட்டி வதைத்து வந்த நிலையில் இன்று மாலை முதல் பலத்த காற்றுடன் பரவலான மழை பெய்து வருகிறது.

தமிழ்நாட்டில் கோடை காலம் தொடங்குவதற்கு முன்பாகவே பெரும்பாலான மாவட்டங்களில் மக்களை வெயில் வாட்டி வதைக்க தொடங்கியது. கடந்த பிப்ரவரி மாதத்தில் இருந்தே ஈரோடு உள்ளிட்ட மாவட்டங்களில் 100 டிகிரிக்கும் அதிகமாக வெப்பம் பதிவானது. வெப்ப அலை காரணமாக மக்கள் சோர்வுடன் காணப்பட்டனர்.

குறிப்பாக கடந்த மார்ச் இறுதியில் இருந்து சென்னை உள்ளிட்ட தமிழ்நாட்டின் பல மாவட்டங்களில் வெயில் சுட்டெரிக்கத் தொடங்கியது. மே மாதத்தில் உச்சம் தொட்ட வெயில், ஜூன் மாதம் குறையும் என்று எதிர்பார்த்ததற்கு மாறாக மே மாதத்தை விட ஜூன் மாதத்தில் சென்னையில் அதிக வெப்பம் பதிவானது.

In Chennai -78, k k.nagar, mgr nagar, good rain pic.twitter.com/pTWnuGmt56

— gopalakrishnanvelu (@gopalakrishanv) June 10, 2023

இதனை குறைக்க அவ்வப்போது மழை பெய்தாலும், அது போதவில்லை என்றே மக்கள் தெரிவித்து வந்தனர். இந்த நிலையில் இன்று மாலை முதல் சென்னையில் பரவலான பகுதிகளில் நல்ல மழை பெய்து வருகிறது. கிண்டி, ஆலந்தூர், வேளச்சேரி, அசோக் நகர், கேகே நகர், பம்மல், நங்கநல்லூர், மடிப்பாக்கம், கூடுவாஞ்சேரி உள்ளிட்ட பகுதிகளில் நல்ல மழை பெய்து வருகிறது.

இன்று சென்னை வானிலை ஆய்வு மையம் வெளியிட்ட அறிக்கையில், "அடுத்த 24 மணி நேரத்திற்கு வானம் ஓரளவு மேகமூட்டத்துடன் காணப்படும். நகரின் ஓரிரு இடங்களில் இடி மின்னலுடன் கூடிய லேசானது / மிதமான மழை பெய்யக்கூடும். அதிகபட்ச வெப்பநிலை 40-41 டிகிரி செல்சியஸ் மற்றும் குறைந்தபட்ச வெப்பநிலை 29-30 டிகிரி செல்சியஸை ஒட்டியே இருக்கும்.

அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும். நகரின் ஓரிரு இடங்களில் இடி மின்னலுடன் கூடிய லேசானது / மிதமான மழை பெய்யக்கூடும். அதிகபட்ச வெப்பநிலை 40 டிகிரி செல்சியஸ் மற்றும் குறைந்தபட்ச வெப்பநிலை 29-30 டிகிரி செல்சியஸை ஒட்டியே இருக்கும்." என்று தெரிவித்தது.

தமிழ்நாட்டின் பிற பகுதிகளை பொறுத்தவரை, "10.06.2023 மற்றும் 11.06.2023: தமிழ்நாடு, புதுச்சேரி மற்றும் காரைக்கால் பகுதிகளில் ஓரிரு இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும். 12.06.2023 முதல் 14.06.2023 வரை: தமிழ்நாடு, புதுச்சேரி மற்றும் காரைக்கால் பகுதிகளில் ஒருசில இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும்.

10.06.2023: தமிழகத்தில் ஓரிரு இடங்களில் அதிகபட்ச வெப்பநிலை 39 டிகிரி முதல் 41 டிகிரி செல்சியஸ் அளவில் இருக்கக்கூடும்; ஓரிரு இடங்களில் இயல்பிலிருந்து 2 - 4 டிகிரி செல்சியஸ் அதிகமாக இருக்கக்கூடும். அதிக வெப்பநிலை மற்றும் அதிக ஈரப்பதம் இருக்கும் பொழுது வெப்ப அழுத்தம் (Heat Stress ) காரணமாக அசௌகரியம் ஏற்படலாம்." என்று வானிலை மையம் தெரிவித்து இருந்தது.

English summary

Chennai has been suffering from intense heat wave for the past few months, and widespread rain has been falling since this evening with strong winds.