ரஜினிக்கு அடிவயிற்றில் வீக்கம்! சிறுநீரக நரம்பில் சதை! ஸ்டன்ட் பொருத்திய மருத்துவர்கள்!

Updated: Tuesday, October 1, 2024, 14:00 [IST]

Subscribe to Oneindia Tamil

சென்னை: நடிகர் ரஜினிகாந்திற்கு அடிவயிறு சற்று வீக்கமாகி வலியும் இருந்ததாக தெரிகிறது. அவருக்கு சிறுநீரக மாற்று அறவை சிகிச்சை மேற்கொள்ளப்பட்டிருப்பதால் மருத்துவ ஆலோசனைகள் தொடர்ந்து நடைபெற்று வருவதாகவும் சொல்லப்படுகிறது.

நடிகர் ரஜினிகாந்த் நடித்த வேட்டையன் படம் வரும் அக்டோபர் 10ஆம் தேதி திரைக்கு வருகிறது. இந்த நிலையில் அவர் தனது 171 ஆவது படமான கூலி படத்தில் நடித்துக் கொண்டிருக்கிறார். ஆந்திரா மாநிலத்தில் விசாகப்பட்டினத்தில் கூலி ஷூட்டிங் நடந்தது.

அதில் சில போர்ஷன்களை முடித்துவிட்டு செப்டம்பர் 28ஆம் தேதி சென்னை திரும்பினார். கடந்த 10 நாட்களாகவே சிறுநீர் கழிப்பதில் அவருக்கு அசவுகரியம் ஏற்பட்டதாக தெரிகிறது. அடிவயிறும் லேசாக வீங்கி வலியையும் கொடுத்து வந்தது.

அவருக்கு ஏற்கெனவே சிறுநீரக மாற்று அறுவை சிகிச்சை மேற்கொள்ளப்பட்டிருப்பதால் அவ்வப்போது மருத்துவ ஆலோசனைகளை பெற்று வந்தார். ஷூட்டிங்கில் இருந்த போதும் அவருக்கு அடிவயிற்று வலி இருந்தது. இதனால் மருத்துவர்களை தொடர்பு கொண்டு அவர்கள் சொன்ன மருந்தை உட்கொண்டிருக்கிறார்.

சில முக்கிய பரிசோதனைகளையும் அவர் செய்ததாக தெரிகிறது. இந்த பரிசோதனை முடிவுகள் வந்து பிறகுதான் அவர் மருத்துவர்களின் அறிவுறுத்தலின் பேரில் நேற்று இரவ கிரீம்ஸ் சாலையில் உள்ள அப்பல்லோ மருத்துவமனையில் அனுமதிக்கப்பட்டுள்ளார். அவருடைய மனைவி லதா உடனிருக்கிறார்.

அவருக்கு ஏற்கெனவே சிங்கப்பூர் மருத்துவமனையில் சிறுநீரக மாற்று அறுவை சிகிச்சை மேற்கொள்ளப்பட்டது. அடி வயிற்றில் ரஜினிக்கு வலி இருப்பதாலும் சிறுநீர் கழிக்கும் போது பிரச்சினை இருப்பதாலும் அவரது சிறுநீரக செயல்பாட்டை மருத்துவர்கள் ஆய்வு செய்தனர். அப்போதுதான் ரஜினியின் சிறுநீரகத்துடன் தொடர்புடைய நரம்பில் சிறிய சதை வளர்ந்திருப்பது தெரியவந்தது.

இதை அகற்றுவதற்காகத்தான் அவர் அப்பல்லோவில் அனுமதிக்கப்பட்டிருக்கிறார். அவருக்கு இதய சிகிச்சை நிபுணர், நரம்பியல் துறை நிபுணர்கள் சிகிச்சை கொடுத்து வருகிறார்கள். சிறுநீரகத்தில் உள்ள அந்த சதை வளர்ச்சியை சரி செய்ய ஸ்டன்ட் வைக்கும் பணி இன்று அதிகாலை தொடங்கியது.

அவரது தொடையில் இந்த ஸ்டன்ட் வைக்கப்படுகிறது. இந்த அறுவை சிகிச்சை 3 மணி நேரத்திற்கு மேல் நடைபெற்று முடிந்தது. ரஜினிகாந்த் தற்போது நலமாக இருக்கிறார், கண்களை திறந்ததும் அவருக்கு சிகிச்சை அளித்த மருத்துவர்களுக்கு நன்றி தெரிவித்தார்.

அவருடைய குடும்பத்தினருடன் பேசினார். பிறகு அவர் சாதாரண வார்டுக்கு மாற்றப்பட்டார். ஸ்டன்ட் என்பது ஒரு சிறிய குழாய் போன்று இருக்கும். இதயத்திற்கு ரத்தம் வழங்கும் ரத்த நாளங்களுக்கு சிகிச்சை அளிப்பதை போல் நரம்பு தொடர்பான பிரச்சினைகளுக்கும் இந்த ஸ்டன்ட் வைக்கப்படுகிறது. எனவே ஸ்டன்ட் என்றதும் அவருக்கு இதயத்தில் ஏதோ பிரச்சினை என நினைத்துவிட வேண்டாம். அவர் சில நாட்கள் ஓய்வெடுக்க மருத்துவர்கள் அறிவுறுத்தியுள்ளார்கள். எனவே கூலி படத்தின் படப்பிடிப்பை தள்ளி போகும் வாய்ப்பிருப்பதாக சொல்லப்படுகிறது.

இது போன்ற ஸ்டன்ட் நடிகர் அஜித்துக்கு கூட மூளையில் அறுவை சிகிச்சை செய்து வைக்கப்பட்டது. அது போல்தான் ரஜினிக்கும் தொடையில் வைக்கப்பட்டுள்ள ஸ்டன்ட் அவருடைய சிறுநீரக சிறுகுழாயுடன் இணைக்கப்பட்டிருக்கிறது.