பயங்கரவாத ஒழிப்புன்னு குழந்தைகளை கொலை.. பாலஸ்தீன், இஸ்ரேலில் அமைதி வர ராமதாஸ் கிறிஸ்துமஸ் வாழ்த்து

சென்னை: இயேசு பிரான் விரும்பியதைப் போல, இஸ்ரேல் மற்றும் பாலஸ்தீனத்தில் தொடங்கி உலகெங்கும் அமைதியும், மகிழ்ச்சியும் நிலவ வேண்டும் என பாமக நிறுவனர் ராமதாஸ் கிறிஸ்துமஸ் வாழ்த்து தெரிவித்து இருக்கிறார்.

இதுகுறித்து அவர் வெளியிட்டு உள்ள அறிக்கையில், "சக மனிதர்களை மதிப்பதற்கு கற்றுக் கொடுத்த மகான் இயேசு கிறித்துவின் பிறந்தநாளை கிறித்துமஸ் திருநாளாக கொண்டாடும் சகோதரர்கள் அனைவருக்கும் வாழ்த்துக்களைத் தெரிவித்துக் கொள்கிறேன். 'நண்பர்களிடம் மட்டும் அன்பு காட்டினால் போதாது. எதிரிகளிடமும் அன்பு காட்ட வேண்டும். மனதார மன்னிக்க வேண்டும். யாராவது உங்கள் மேல் கோபமாக இருந்தால், உடனடியாக அவரிடம் போய் மன்னிப்பு கேட்க வேண்டும்.

மற்றவர்கள் உங்களிடம் எப்படி நடந்துகொள்ள வேண்டும் என்று நினைக்கிறீர்களோ, அதேபோல் நீங்கள் அவர்களிடம் நடந்து கொள்ள வேண்டுமென போதித்தவர் இயேசுபிரான். கிறித்துமஸ் கொண்டாடப்படுவதன் நோக்கங்களில் முதன்மையானவை மனிதருக்குள் நல்லுறவும், சமத்துவமும், ஏற்றத் தாழ்வற்ற சமுதாயம் உண்டாக வேண்டும்; பூமியில் உள்ளவர்கள் இணக்கமான சமாதானத்தைப் பெற்றுக் கொள்ள வேண்டும்; ஏழை, எளிய மக்கள் புதுவாழ்வு பெற வேண்டும்; இயற்கையை சுரண்டாமல் இசைந்து வாழும் தன்மை ஏற்பட வேண்டும் என்பன உள்ளிட்டவையாகும். இந்த நோக்கங்களுக்காகவே கிறித்துமஸ் திருநாளை மாதத்திற்கு ஒருமுறை கூட கொண்டாடலாம்.

ஆனால், இயேசு பிரானின் கொள்கைகள் அவர் அவதரித்த மண்ணிலேயே மதிக்கப்படவில்லை. பயங்கரவாதத்திற்கு எதிரான போர் என்ற பெயரில் கருவுற்ற பெண்கள், புதிதாக பிறந்த குழந்தைகள், நோயால் பாதிக்கப்பட்டோர் உள்ளிட்ட பல்லாயிரக்கணக்கான அப்பாவி மக்கள் குண்டு வீசி கொல்லப் படுகின்றனர். இயேசுவின் கொள்கைகள் உலகிற்கு எந்த அளவுக்கு தேவைப்படுகின்றன என்பதற்கு இதுவே சான்று. இயேசுவின் கொள்கைகளும், போதனைகளும் உலகம் முழுவதும் பரப்பப்பட வேண்டும்.

இயேசுபிரான் விரும்பியதைப் போல, இஸ்ரேல் & பாலஸ்தீனத்தில் தொடங்கி உலகெங்கும் அமைதியும், மகிழ்ச்சியும் நிலவ வேண்டும்; போட்டி பொறாமைகள் அகல வேண்டும்; ஏழைகளின் துயரங்கள் நீங்க வேண்டும்; உலகம் வளம் பெற வேண்டும். அதை நனவாக்க உழைப்போம் என இயேசுபிரான் அவதரித்த இந்த நன்நாளில் உறுதி ஏற்போம் என்று கூறி மீண்டும் ஒருமுறை வாழ்த்து தெரிவித்துக் கொள்கிறேன்." என்று குறிப்பிட்டு உள்ளார்.

English summary

PMK founder Ramadoss wishes Christmas for peace and happiness throughout the world, starting with Israel and Palestine, as Jesus wanted.