பரபரப்பை கிளப்பிய ராமதாஸ்.. பாமகவிற்கு களத்தில் பாஜகதான் எதிரியாம்! அப்போ 2024ல் அவங்களுடன் கூட்டணி?

சென்னை: பாஜகவில் இளைஞர்கள் இணையக் கூடாது என்றும் அவர்களை தடுக்க வேண்டும் என்றும் கட்சி நிர்வாகிகளுக்கு நிறுவனர் ராமதாஸ் கட்டளையிட்டுள்ளார்.

2004 ஆம் ஆண்டு நடந்த நாடாளுமன்றத் தேர்தலில் திமுகவுடன் பாமக கூட்டணி அமைத்தது. திமுக கூட்டணி தமிழகத்தில் உள்ள 39 தொகுதிகளையும் கைப்பற்றியது. அதிமுக ஒரு தொகுதியில் கூட வெல்லவில்லை.

திமுக கூட்டணியில் பாமக 5 இடங்களில் போட்டியிட்டது. அந்த 5 தொகுதிகளிலும் பாமக வென்றது. திமுக- காங்கிரஸ் கூட்டணியில் போட்டியிட்ட அந்த 5 பேரில் ஒருவர் அன்புமணி ராமதாஸ். இவர் மத்திய சுகாதாரத் துறை அமைச்சரானார்.

108 ஆம்புலன்ஸ்

அப்போது அவர் கொண்டு வந்ததுதான் இன்று வரை உயிர் காக்கும் திட்டமான 108 ஆம்புலன்ஸ் திட்டம். சிகரெட் பாக்கெட்டுகளில் எச்சரிக்கை வாசகம் இடம் பெற்றது. மதுவுக்கு எதிரான முன்னெடுப்புகள், போலியோவை ஒழித்தது போன்ற நல்ல பல சாதனைகளை அன்புமணி புரிந்துள்ளார்.

திமுக கூட்டணி

திமுக கூட்டணியை முறித்துக் கொண்ட பாமக இதன் பிறகு மக்கள் நல கூட்டணி, அதிமுக ஆகியவற்றுடன் கூட்டணி அமைத்து போட்டியிட்ட 2009, 2014, 2019 ஆகிய தேர்தல்களில் ஒரு இடங்களில் கூட வெல்லவில்லை. தற்போது 2024 ஆம் ஆண்டு நடைபெறும் நாடாளுமன்றத் தேர்தலில் 5 எம்பிக்களையாவது பாமக சார்பில் அனுப்பி வைக்க பாமக தன் பணிகளை இப்போதே தொடங்கியுள்ளது.

பாமக 2.0

இதற்காக பாமக 2.0 என்ற செயல்திட்டத்தை தொடங்கியுள்ளது. கட்சியின் தலைவராக அன்புமணி ராமதாஸ் போட்டியிட்டுள்ளார். அது போல் 2026 ஆம் ஆண்டு கோட்டையை பிடிக்கவும் பாமக திட்டமிட்டுள்ளது. இதற்காக கட்சியை பலப்படுத்தும் வகையில் ராமதாஸ் மாவட்டச் செயலாளர்களுடன் ஆலோசனை நடத்தி வருகிறார்.

ராமதாஸ் பேச்சு

கூட்டத்தில் ராமதாஸ் பேசுகையில், பாமகவை பொறுத்தவரை களத்தில் பாஜகதான் எதிரி. பாமகவில் இருந்தோ வன்னியர் சங்கத்தில் இருந்தோ வேறு கட்சிகளுக்கு சென்றால் கூட ஒரு நாள் பாமகவை நோக்கி வந்து விடுவார்கள் என நம்பிவிடலாம். ஆனால் ஆர்எஸ்எஸ், பாஜக என்பது ஒழிவழிப்பாதையாகும்.

இளைஞர்கள்

இந்த கட்சிகளுக்கு இளைஞர்கள் சென்றால் திரும்பமாட்டார்கள். அண்ணாமலையின் செயல்பாடுகளும் இளைஞர்களை ஈர்த்து வருகிறது. இதனாலும் இளைஞர்கள் பாஜகவில் சேருகிறார்கள். எனவே வன்னியர் சங்கமும் பாமகவும் உள்ள கிராமங்களில் இளைஞர்கள் ஆர் எஸ் எஸ் பாஜகவில் சேருவதை தடுக்க வேண்டும். இளைஞர்கள் நம்மிடத்தில் தக்க வைக்கவும் நம் கட்சியில் சேருவதற்கும் தேவையான பணிகள் பாமக நிர்வாகிகள் தீவிரப்படுத்த வேண்டும் என மாவட்டச் செயலாளர்களுக்கு உத்தரவிட்டுள்ளார்.

காட்டம்

கடந்த 2019ஆம் ஆண்டு நடந்த நாடாளுமன்றத் தேர்தலிலும் 2021 ஆம் ஆண்டு நடந்த சட்டசபை தேர்தலிலும் பாஜக அங்கம் வகித்த அதிமுக கூட்டணியில்தான் பாமகவும் இருந்தது. மேலும் அதிமுகவால் மாநிலங்களவைக்கு சென்ற அன்புமணி ராமதாஸ், மத்திய அமைச்சர் பதவியை பெற முயற்சித்ததாகவும் தகவல் வெளியாகியிருந்தது. ஆனால் அது கிடைக்கவில்லை. இந்த நிலையில் பாஜக குறித்து ராமதாஸ் காட்டாமாக பேசியுள்ளது பரபரப்பை ஏற்படுத்தியுள்ளது. மேலும் பாமக வரும் 2024 ஆம் ஆண்டு நாடாளுமன்றத் தேர்தலில் திமுகவுடன் கூட்டணி வைத்தோ இல்லை தனித்தோ போட்டியிட வாய்ப்பிருப்பதாக தெரிகிறது. 2026 ஆம் ஆண்டு பாமக ஆட்சியை பிடிக்க முயற்சித்து வருவதால் அக்கட்சியின் தலைமையில் பிற கட்சிகளை இணைத்து கொள்ளும் என தெரிகிறது.

English summary

PMK Founder Ramadoss opposes Youths to join in BJP. He asked his party officials to stop them to join.