புது வீடு கட்டுறீங்களா? அரசு சிமெண்ட்களை எப்படி வாங்குவது என்பதில் குழப்பமா? விவரம் இதோ!

சென்னை: தமிழக அரசின் 'வலிமை சிமெண்ட்' பற்றிய விவரம் அறிவதற்கான கட்டணமில்லா தொலைபேசி எண்களை, தமிழ்நாடு சிமெண்ட்ஸ் நிறுவனம் வெளியிட்டுள்ளது.

அரசின் சிமெண்ட்களை எங்கு வாங்கலாம், என்ன விலையில் வாங்கலாம், விற்பனை முகவர் விவரம், சிமெண்டின் தரம், என்பன உள்ளிட்ட எல்லா வித கேள்விகளுக்கும் பதிலளிக்க ஆட்கள் பணியமர்த்தப்பட்டுள்ளார்கள்.

இதனால் இனி சிமெண்ட் பற்றி விசாரிக்க கடைகளுக்கு செல்லாமல் வீட்டில் இருந்தபடியே தமிழ்நாடு சிமெண்ட்ஸ் நிறுவனத்தை தொடர்பு கொண்டு புது வீடு கட்ட திட்டமிட்டு வருபவர்களும், புது வீடு கட்டிக்கொண்டு இருப்பவர்களும் தெரிந்து கொள்ளலாம்.

இது தொடர்பாக தமிழக தொழில்துறை விடுத்துள்ள செய்திக் குறிப்பில் கூறியிருப்பதாவது;

போர்ட்லேண்ட் சிமெண்ட்

தமிழ்நாடு சிமெண்ட்ஸ் நிறுவனம் அரசு கட்டுப்பாட்டில் உள்ள நிறுவனம் ஆகும். இந்நிறுவனம் அரியலூர் மற்றும் ஆலங்குளம் சிமெண்ட் ஆலைகளில் சாதாரண போர்ட்லேண்ட் சிமெண்ட் (OPC) மற்றும் பொசலோனா போர்ட்லேண்ட் சிமெண்ட் ஆகிய இரண்டு வகையான சிமெண்டுகளை உற்பத்தி செய்து தமிழகம் முழுவதும் விற்பனை செய்து வருகிறது.

வலிமை சிமெண்ட்

இதனிடையே முதலமைச்சர் ஸ்டாலின் கடந்தாண்டு நவம்பர் மாதம் வலிமை சிமெண்ட் என்ற புதிய வகை சிமெண்ட்டை அறிமுகப்படுத்தினார். இந்த சிமெண்ட் மிகவும் தரமாக உற்பத்தி செய்யப்பட்டு தமிழகம் முழுவதும் பிரபலப்படுத்தப்பட்டு வருகிறது. மேலும், இந்த சிமெண்டை பற்றிய தகவலை பொதுமக்கள் மத்தியில் கொண்டு சேர்க்க தமிழ்நாடு சிமெண்ட்ஸ் நிறுவனம் பல்வேறு முயற்சிகளை எடுத்து வருகிறது.

1800 599 7635 என்ற எண்

இந்த புதிய வகை 'வலிமை சிமெண்ட்' தொடங்கப்பட்டது முதல் இதுவரை 2 லட்சத்து 26 ஆயிரத்துக்கும் மேற்பட்ட மெ.டன் விற்பனை செய்யப்பட்டுள்ளது. மேலும் இந்த 'வலிமை சிமெண்ட்' பெறுவதற்கான வழிமுறைகளைப் பற்றி அறியவும், இதன் தரம் பற்றி அறிந்து கொள்ளவும், இந்த சிமெண்ட்டை விற்பனை செய்வதற்கான சிமெண்ட் விற்பனை முகவராக நியமனம் பெறுவது போன்ற விவரங்களை அறிய தமிழ்நாடு சிமெண்ட்ஸ் நிறுவனம் கட்டணம் இல்லா தொலைபேசி எண் 1800 599 7635 என்ற எண்களை வெளியிட்டுள்ளது.

விற்பனை முகவர்கள்

இந்த தொலைபேசி எண்ணைத் தினமும் காலை 9 மணி முதல் மாலை 6 மணி வரை தொடர்பு கொள்ளலாம். இந்த கட்டணம் இல்லா தொலைபேசி இணைப்பின் மூலம் "வலிமை சிமெண்ட்" கிடைக்கும் இடங்கள், அதன் தரம் மற்றும் உறுதி மற்றும் விற்பனை முகவர்கள் பற்றிய அனைத்து விவரங்களும் கிடைக்கும்.

English summary

Tamilnadu Cements Corporation products:தமிழக அரசின் 'வலிமை சிமெண்ட்' பற்றிய விவரம் அறிவதற்கான கட்டணமில்லா தொலைபேசி எண்களை, தமிழ்நாடு சிமெண்ட்ஸ் நிறுவனம் வெளியிட்டுள்ளது.