தமிழ்நாட்டில் தலைதூக்கிய கூலிப்படை கொடூரம்! ராமநாதபுரம், சிவகங்கை இரட்டைக் கொலை.. விஜய் சொதப்பல்
சென்னை: தமிழ்நாடு எப்போதுமே அமைதியான மாநிலம் என்று பெயர் பெற்றது. ஆனால், சமீப நாட்களாக.. முக்கியமாக விஜய் ஆட்சி வந்த பின் மாநிலத்தின் பல்வேறு பகுதிகளில் அரங்கேறி வரும் கொடூரக் கொலைச் சம்பவங்கள், பொதுமக்கள் மத்தியில் மிகுந்த அச்சத்தையும் பதற்றத்தையும் ஏற்படுத்தி வருகின்றன. குறிப்பாக, கூலிப்படை கலாச்சாரம் மீண்டும் விஸ்வரூபம் எடுக்கிறதோ என்ற சந்தேகமும் கேள்வியும் அனைவரது மனதிலும் எழுந்துள்ளது.
இராமநாதபுரம் கீழக்கரை இரட்டைக் கொலை சம்பவம்
கடந்த செப்டம்பர் 15-ஆம் தேதி, இராமநாதபுரம் மாவட்டம் ஏர்வாடி மற்றும் கீழக்கரை அருகே காட்டுப்பகுதியில் இரண்டு இளைஞர்கள் கொடூரமாக வெட்டிக் கொலை செய்யப்பட்டு சடலமாகக் கிடந்தனர். உயிரிழந்தவர்கள் கணேசன் மற்றும் கோபி என அடையாளம் காணப்பட்டனர். பட்டப்பகலில் பொதுமக்கள் நடமாட்டம் உள்ள பகுதிக்கு அருகிலேயே நடைபெற்ற இந்த கொடூரக் கொலை, அப்பகுதி மக்களிடையே பெரும் அதிர்ச்சியை ஏற்படுத்தியது.
சிவகங்கை காளையார்கோவில் பயங்கரம்
கீழக்கரை சம்பவம் நடந்து அடுத்த நாளே (செப்டம்பர் 16), சிவகங்கை மாவட்டம் காளையார்கோவில் அருகே கொடிகாடு கண்மாய் பகுதியில் மற்றொரு இரட்டைக் கொலை நிகழ்ந்தது.பொள்ளாச்சியில் பார் நடத்தி வந்த தேவந்திரன் (25) மற்றும் நிதி நிறுவனத்தில் பணியாற்றி வந்த பூபாண்டி (25) ஆகிய இரு இளைஞர்கள் கண்மாய் கரையில் அமர்ந்திருந்தபோது, இருசக்கர வாகனங்களில் வந்த கும்பல் அவர்களைத் துரத்தி துரத்தி வெட்டிக் கொலை செய்தது.
இந்தச் சம்பவத்தில் 5 பேரை காவல்துறையினர் கைது செய்துள்ளனர். ஆனால், கைது செய்யப்பட்டவர்களிடம் நடத்திய விசாரணையில் "நாங்கள் ஆள் மாறி கொலை செய்துவிட்டோம்" என்று அவர்கள் கூறியதாகத் தகவல்கள் வெளியாகின. இந்த விளக்கம் உயிரிழந்த இளைஞர்களின் குடும்பத்தினருக்கும் பொதுமக்களுக்கும் பெருத்த சந்தேகத்தை ஏற்படுத்தியுள்ளது.
"ஒரே நேரத்தில் இரண்டு பேரை எப்படி ஆள் மாறாட்டத்தில் வெட்டிச் சாய்க்க முடியும்? கூலிப்படையை ஏவிய உண்மையான குற்றவாளிகள் யார்? அவர்களை ஏன் இன்னும் காவல்துறை கைது செய்யாமல் காலம் தாழ்த்துகிறது?" என்று கேட்டு உயிரிழந்தவர்களின் உறவினர்கள் உடலை வாங்க மறுத்து சிவகங்கையிலும், காளையார்கோவில் காவல் நிலையம் அருகிலும் தீவிர சாலை மறியலில் ஈடுபட்டனர். அப்போது கூட்டத்தைக் கலைக்க காவல்துறையினர் நடத்திய தடியடி சம்பவமும் பெரும் பரபரப்பை உண்டாக்கியது.
அரசியல் தளத்தில் எழுந்த கடும் விமர்சனம்
தென் மாவட்டங்களில் அடுத்தடுத்து அரங்கேறிய இந்த இரட்டைக் கொலைகள் தமிழக அரசியல் களத்தில் புயலைக் கிளப்பியுள்ளது. எதிர்க்கட்சிகள் ஆளும் அரசை நோக்கி சரமாரியான கேள்விகளை எழுப்பி வருகின்றன. குற்றவாளிகளுக்கு சட்டத்தின் பயம் இல்லாமல் போனதே பட்டப்பகலில் கொலைகள் செய்யத் துணிவதற்கு முக்கியக் காரணம் என்று குற்றச்சாட்டுகள் முன்வைக்கப்படுகின்றன. போராட்டம் நடத்தும் பொதுமக்களிடம் கடுமை காட்டுவதை விடுத்து, கொலைக்குக் காரணமான மூல சூத்திரதாரிகளையும், கூலிப்படைக்குப் பணம் கொடுத்து ஏவியவர்களையும் உடனடியாகக் கைது செய்ய வேண்டும் என்ற கோரிக்கை வலுத்து வருகிறது.
கடந்த இரண்டு மாதங்களில் தமிழ்நாட்டில் பதிவான சில முக்கியக் குற்றச்சம்பவங்கள்
மாநிலத்தின் பல்வேறு மாவட்டங்களில் தனிப்பட்ட முன்விரோதம், கட்டப்பஞ்சாயத்து, குடும்பத் தகராறு மற்றும் கூலிப்படை செயல்பாடுகளால் தொடர்ச்சியாகப் பதிவான சில சம்பவங்கள்:
சிவகங்கை கொடிகாடு கண்மாய் இரட்டைக் கொலை (செப்டம்பர்): தேவந்திரன், பூபாண்டி ஆகிய இரு இளைஞர்கள் மர்மக் கும்பலால் வெட்டிக் கொலை.
இராமநாதபுரம் கீழக்கரை இரட்டைக் கொலை (செப்டம்பர்): காட்டுப்பகுதியில் கணேசன், கோபி ஆகியோர் ஆயுதங்களால் தாக்கப்பட்டு சடலமாக மீட்பு.
சேலம் பழைய கொலை வழக்கு கைது (செப்டம்பர்): முந்தைய கொலை வழக்கில் தலைமறைவாக இருந்த குற்றவாளி பல ஆண்டுகளுக்குப் பிறகு கைது செய்யப்பட்ட நிகழ்வு.
செங்கல்பட்டு நீதிமன்ற வாசலில் கொலை முயற்சி: நீதிமன்றத்தில் கையெழுத்திட்டுவிட்டு வெளியே வந்த நபர் மீது தாக்குதல் நடத்தப்பட்ட விவகாரம்.
ராமநாதபுரம் குடும்பத் தகராறு கொலை: முன்விரோதம் மற்றும் குடும்பப் பிரச்னையில் ஏற்பட்ட கொடூரத் தாக்குதல் சம்பவங்கள்.
சென்னை மற்றும் புறநகர் பகுதிகள்: கஞ்சா போதை மற்றும் உள்ளூர் ரவுடிக் கும்பல்களுக்கு இடையேயான மோதல்களில் அவ்வப்போது பதிவாகும் வழிப்பறி மற்றும் வெட்டுக்குத்து சம்பவங்கள்.
மக்களின் எதிர்பார்ப்பு என்ன?
கூலிப்படை கலாச்சாரம் வளர்ந்தால், பணம் இருப்பவர்கள் யாரை வேண்டுமானாலும் கொலை செய்துவிட்டு தப்பித்துக் கொள்ளலாம் என்ற நிலை உருவாகிவிடும். சாதாரண பொதுமக்களும் இதனால் பாதிக்கப்படுகின்றனர்.
எனவே, வெறுமனே ஆயுதங்களை ஏந்தி வரும் கூலிப்படை ஆட்களை மட்டும் பிடித்து வழக்கை முடிக்காமல், அவர்களுக்குப் பின்னால் இருந்து பணத்தையும் அதிகாரத்தையும் கொடுக்கும் உண்மையான குற்றவாளிகளை சட்டத்தின் முன் நிறுத்த வேண்டும் என்பதே பொதுமக்களின் ஒரே கோரிக்கையாக உள்ளது.
Click it and Unblock the Notifications
Sign in with Google
