எங்கும் 6; எதிலும் 6; அ.தி.மு.கவின் 6-ம் எண் ரகசியம்...ஆட்சியாளர்களின் நம்பிக்கையை காப்பாற்றுமா!

சென்னை: இந்த சட்டமன்ற தேர்தல் பணிகளில் அதிமுக 6-ம் எண்ணை மையமாக வைத்தே சில பணிகளை செய்து முடித்துள்ளது.

அதிமுகவின் தொகுதிகள் 177 ஆகும். 1+7+7 = 15; 1+5= 6 அதாவது இந்த 177-ன் கூட்டுத்தொகையும் 6 ஆகும்.

அதிமுகவின் கூட்டணி, தொகுதி பங்கீட்டு பேச்சுவார்த்தை மாலை 6 மணியை மையப்படுத்தியே நடந்துள்ளது.

மறைந்த முதல்வர் ஜெயிலலிதா போலவே ஓ.பி.எஸ், இ.பி.எஸ் இருவரும் இந்த ராசி நடைமுறையை
பின்பற்றி வருகின்றனர்

அதிமுக வேட்பாளர் பட்டியல்

தமிழகத்தில் அனைத்து கட்சிகளும் அடுத்தக்கட்ட பாய்ச்சலுக்கு தயாராகி வருகிறது. திமுக கூட்டணியில் கூட்டணி கட்சிகளின் தொகுதிகள் அறிவிக்கப்பட்டுள்ளன. திமுக வேட்பாளர் பட்டியல் இன்று அல்லது நாளை வெளியாகலாம். அதிமுகவை பொறுத்தவரை முதற்கட்டமாக முதல்வர், துணை முதல்வர் உள்பட 6 தொகுதிக்கான வேட்பாளர் பட்டியல் வெளியிட்டது.

27 அமைச்சர்களுக்கு வாய்ப்பு

நேற்று 2-வது கட்டமாக 171 தொகுதிகளுக்கான வேட்பாளர் பட்டியல் வெளியிட்டது. இது தவிர பாமக, பாஜக தொகுதிகளின் பட்டியலையும் வெளியிட்டது. அதிமுகவில் அறிவிக்கப்பட்டுள்ள மொத்தம் 177 தொகுதிகளில் 15 பெண்களுக்கு வாய்ப்பளிக்கப்பட்டுள்ளது. அமைச்சர்கள் எஸ்.வளர்மதி, பாஸ்கரன், நிலோபர் கபீல் ஆகியோரைத் தவிர 27 சிட்டிங் அமைச்சர்களுக்கு மீண்டும் வாய்ப்பு அளிக்கப்பட்டுள்ளது.

அதிமுகவின் 6-ம் எண் ரகசியம்

அதிமுக அடுத்தக்கட்டமாக தேர்தல் அறிக்கை, பிரசாரம் என்று ரெடியாகி கொண்டிருக்கிறது. இதற்கிடையே இந்த சட்டமன்ற தேர்தல் பணிகளில் அதிமுக 6-ம் எண்ணை மையாக வைத்தே சில பணிகளை செய்து முடித்துள்ளது. அதாவது அதிமுக முதற்கட்டமாக 6 தொகுதிகளின் வேட்பாளர் பட்டியலை வெளியிட்டது. 2-வது கட்டமாக 171 தொகுதிகளுக்கு வேட்பாளர் பட்டியல் வெளியிட்டுள்ளது.

எங்கும் 6; எதிலும் 6

இரண்டும் சேர்த்து 177 தொகுதிகள் ஆகும். 1+7+7 = 15; 1+5= 6 அதாவது இந்த 177-ன் கூட்டுத்தொகையும் 6 ஆகும். அதிமுகவின் கூட்டணி, தொகுதி பங்கீட்டு பேச்சுவார்த்தை மாலை 6 மணியை மையப்படுத்தியே நடந்துள்ளது. இந்த பேச்சுவார்த்தையில் கூட, முதல்வர், துணை முதல்வர், கே.பி.முனுசாமி, ஆர்.வைத்திலிங்கம், எஸ்.பி.வேலுமணி, பி.தங்கமணி ஆகிய 6 பேர்தான் பங்கேற்றனர்.

தேர்தல் தேதியும் 6 தான்

இவ்வாறு பல்வேறு தேர்தல் பணிகளையும் அதிமுக 6-ம் எண்ணை மையப்படுத்தியே செய்து வருகிறது. வாக்குப்பதிவு நடைபெறும் நாள் கூட 6-ம் தேதி என்பதால், அதிமுகவினர் 6-ம் எண்ணை மிகவும் ராசியாக கருதி வருகின்றனர். மறைந்த முதல்வர் ஜெயலலிதா மிகவும் ராசி பார்ப்பவர் ஆவார். அவருக்கு ராசியான ஒரு குறிப்பிட்ட எண்ணை வைத்தே அவர் பல பணிகளை செய்வார். தற்போது ஜெயலலிதா ஆட்சியை பின்பற்றி வரும், ஓ.பி.எஸ், இ.பி.எஸ் இருவரும் இந்த ராசி நடைமுறையிலும் ஜெயலலிதாவையே பின்பற்றி வருகின்றனர். இந்த 6-ம் எண் ராசி அதிமுகவுக்கு கைகொடுத்து அவர்களை ஹாட்ரிக் வெற்றி பெற வைக்குமா? என்பதை பொறுத்திருந்து பார்ப்போம்.

English summary

AIADMK has completed some work in this Assembly election with the number 6 as the center