சீமானின் உண்மையான வருமானம் இதுதான்.. 'ரூ.1000 வருமானம் எழுத்துப்பிழை'.. மீண்டும் வேட்பு மனு தாக்கல்

Updated: Wednesday, March 17, 2021, 21:43 [IST]

Subscribe to Oneindia Tamil

சென்னை: நாம் தமிழர் கட்சியின் தலைமை ஒருங்கிணைப்பாளர் சீமான் திருவெற்றியூரில் மீண்டும் வேட்பு மனு தாக்கல் செய்ய உள்ளார்.

ஆண்டு வருமானம் ஆயிரம் ரூபாய் என்று வேட்பு மனு தாக்கல் செய்த விவகாரம் பெரும் விவாதத்தை எழுப்பியது. இதையடுத்து ஆண்டு வருமானம் ஆயிரம் ரூபாய் என்று வேட்புமனுவில் இருந்தது எழுத்து பிழை என்றும் மீண்டும் சீமான் வேட்பு மனு தாக்கல் செய்வார் என்றும் கட்சி நிர்வாகிகள் கூறினர்.

தமிழகத்தில் சட்டசபை தேர்தல் வரும் ஏப்ரல் 6ம் தேதி நடைபெற உள்ளது. இதில் அதிமுக, திமுக, மநீம,அமமுக, நாம் தமிழர் என ஐந்து முனை போட்டி நிலவுகிறது.

நாம் தமிழர் கட்சி

அதிமுக, திமுக, மநீம,அமமுக, ஆகிய நான்கு கட்சிகளும் கூட்டணி அமைத்து தேர்தலை சந்திக்கும் நிலையில், சீமானின் நாம் தமிழர் கட்சி மட்டும் 234 தொகுதிகளிலும் தனித்து வேட்பாளர்களை களம் இறக்கி உள்ளது. நாம் தமிழர் கட்சியின் தலைமை ஒருங்கிணைப்பாளர் சீமான், திருவொற்றியூர் தொகுதியில் போட்டியிடுகிறார்.

சீமான் வேட்பு மனு

சீமான், நேற்று முன்தினம் வேட்புமனு தாக்கல் செய்தார். வேட்பு மனுவுடன் அவர் தாக்கல் செய்த சொத்து விவரத்தில், தமக்கு உள்ள அசையும் சொத்துகளின் மதிப்பு ரூ.31,06,500 என்றும், அசையா சொத்துகள் ஏதுமில்லை என்றும் கூறியிருந்தார். தன் மனைவிக்கு உள்ள அசையும் சொத்துகளின் மதிப்பு ரூ.63,25,031 என்றும் அசையா சொத்துகளின் மதிப்பு ரூ.25,30,000 என்றும் சீமான் வேட்பு மனுவில் கூறியிருந்தார்.

1000 வருமானம்

தனக்கு கடந்த நான்கு ஆண்டுகளில் ரூ.65,500 வருமானம் வந்துள்ளதாகவும், 2019-20ஆம் நிதியாண்டில் தமக்கு வந்த ஆண்டு வருமானம் ரூ.1000 மட்டுமே என சீமான் வேட்புமனு உறுதிமொழி பத்திரத்தில் கூறியிருந்தார். இதுகுறித்த செய்தி சமூக வலைதளங்களில் வேகமாக பரவியது.

2வது முறை வேட்பு மனு

என்னது ஆண்டுக்கு 1000 ரூபாய் தான் வருமானமா,.. நம்பவே முடியவில்லை என்று பலரும் கிண்டல் செய்தனர். சிலர் சீமானை விமர்சித்து மீம்ஸ் போட்டிருந்தனர். இதுபற்றி அறிந்த அக்கட்சியினர், சீமானின் ஆண்டு வருமான கணக்கு தவறுதலாக இடம்பெற்றதால், அவர் 2வது முறையாக மீண்டும் வேட்பு மனு தாக்கல் செய்வார் என தெரிவித்துள்ளனர்.

வேட்பு மனு

இதுகுறித்து நாம் தமிழர் கட்சி நிர்வாகி ஒருவர் கூறும் போது, சீமானின் ஆண்டு வருமானம் ரூ.2 லட்சத்து 60 ஆயிரம். ஆனால், ஆயிரம் ரூபாய் என தவறுதலாக டைப் செய்யப்பட்டுள்ளது. அதை சரி செய்து மீண்டும் ஒரு வேட்பு மனுவை தாக்கல் செய்ய உள்ளோம். இது ஒரு எழுத்து பிழை என்று விளக்கம் அளித்தார்.