முதல்முறையாக களமிறங்கிய சீமானின் தாயார்.. வீடு வீடாக வெற்றிலை பாக்கு வைத்து.. மாநாட்டிற்கு அழைப்பு!

Updated: Sunday, February 15, 2026, 7:55 [IST]

Subscribe to Oneindia Tamil

சென்னை: பிப்ரவரி 21-ம் தேதி திருச்சியில் நடைபெறவுள்ள நாம் தமிழர் கட்சியின் மாநாட்டிற்காக, அக்கட்சியின் ஒருங்கிணைப்பாளர் சீமானின் தாயார் அன்னம்மாள் தனது சொந்த ஊரில் வீடு வீடாகச் சென்று அழைப்பு விடுத்து வருகிறார்.

'வெற்றிலை பாக்கு' வைத்து அழைப்பு

சிவகங்கை மாவட்டம் இளையான்குடி அருகேயுள்ள அரணையூரில், சீமானின் தாயார் அன்னம்மாள் கிராமத்து முறைப்படி வெற்றிலை மற்றும் பாக்கு வழங்கி பொதுமக்களை மாநாட்டிற்கு வருமாறு கேட்டுக்கொண்டார். "எல்லாரும் கண்டிப்பா மாநாட்டுக்கு வரணும். உங்களுக்காக வண்டி ஏற்பாடு பண்ணியிருக்கோம், நீங்க தயாராக இருந்தா மட்டும் போதும்," என்று அவர் மக்களிடம் உரிமையுடன் பேசியது அனைவரது கவனத்தையும் ஈர்த்துள்ளது.

திருச்சியில் மாற்றத்தை விரும்பும் மக்களின் மாநாடு' என்ற பெயரில் பிப்.21-ம் தேதி இந்த நாம் தமிழர் கட்சி மாநாடு நடத்த ஏற்பாடுகளைச் செய்து வருகிறது.

மாநாட்டின் முக்கிய அம்சங்கள்

மாற்றத்தை விரும்பும் மக்களின் மாநாடு' என்ற பெயரில் நடைபெறும் இந்த திருச்சி மாநாடு, அரசியல் களத்தில் பெரும் எதிர்பார்ப்பைத் தூண்டியுள்ளது.

வேட்பாளர் அறிமுகம்: தமிழகத்தின் 234 தொகுதிகளுக்குமான வேட்பாளர்களை ஒருங்கிணைப்பாளர் சீமான் இந்த மேடையில் அறிமுகம் செய்யவுள்ளார்.

தனித்துப் போட்டி: வழக்கம்போல எந்தக் கூட்டணியும் இன்றி நாம் தமிழர் கட்சி இந்த சட்டமன்றத் தேர்தலையும் தனித்தே எதிர்கொள்கிறது.

அரசியல் போட்டி: நடிகர் விஜய்யின் தமிழக வெற்றிக் கழகத்தை விட அதிக வாக்கு சதவீதத்தைப் பெற்று, தனது பலத்தை நிரூபிக்க நாம் தமிழர் கட்சித் திட்டமிட்டுள்ளது.

ஆச்சரியத்தில் கிராம மக்கள்

இதுவரை அரசியல் விவகாரங்களில் தலையிடாமல் இருந்த சீமானின் தாயார், தற்போது நேரடியாகக் களமிறங்கி வாக்கு சேகரிப்பது போன்ற உணர்வுடன் அழைப்பு விடுத்து வருவது அவரது ஊர் மக்களிடையே ஆச்சரியத்தை ஏற்படுத்தியுள்ளது. இந்தப் பயணத்தின் போது மாநிலக் கட்டமைப்பு குழு பொறுப்பாளர் தங்கராஜ் மற்றும் இளைஞர் பாசறை ஒருங்கிணைப்பாளர்கள் உள்ளிட்ட கட்சி நிர்வாகிகள் உடனிருந்தனர்.

ஆனால் தமிழக அரசியல் களம் 2026 சட்டமன்றத் தேர்தலை நோக்கி அனல் பறக்கத் தொடங்கியுள்ள நிலையில், ஒரு முக்கியமான மாற்றம் அனைவரது கவனத்தையும் ஈர்த்துள்ளது. கடந்த பத்து ஆண்டுகளுக்கும் மேலாக தமிழக அரசியலில் டிரெண்ட் செட்டராக இருந்த நாம் தமிழர் கட்சியின் தலைமை ஒருங்கிணைப்பாளர் சீமான், தற்போது முன்னெப்போதும் இல்லாத வகையில் ஒரு மர்மமான அமைதியைக் கடைப்பிடித்து வருகிறார்.

கடந்த பத்து ஆண்டுகளுக்கும் மேலாக, சீமான் தலைமையிலான நாம் தமிழர் கட்சி (NTK) தமிழ்நாட்டு அரசியலில் ஒரு தவிர்க்க முடியாத 'மூன்றாவது சக்தியாக' உருவெடுத்திருந்தது. தீவிரமான தமிழ்த் தேசியப் பேச்சுகள் மற்றும் சீரான வாக்கு வங்கி வளர்ச்சியால் கவனத்தை ஈர்த்த இந்த கட்சி, 2026 சட்டமன்றத் தேர்தலை நெருங்கும் வேளையில் முன்னெப்போதும் இல்லாத வகையில் ஒரு மௌனமான நிலையை எட்டியுள்ளது.

களத்தில் குறைந்த வேகம்?

வழக்கமாக தேர்தல் நெருங்கும் நேரங்களில் சீமானின் மேடைப் பேச்சுகளும், தொடர் பொதுக்கூட்டங்களும் தமிழகத்தின் மூலை முடுக்கெல்லாம் எதிரொலிக்கும். ஆனால், இந்த முறை 234 தொகுதிகளுக்கான வேட்பாளர்களை அறிவித்ததைத் தாண்டி, சீமான் பெரிய அளவிலான பொதுக்கூட்டங்களையோ அல்லது மக்கள் சந்திப்புகளையோ (Makkal Sandhippu) இன்னும் தீவிரப்படுத்தவில்லை.

வழக்கம் போல தங்களது வேட்பாளர்களை முன்கூட்டியே அறிவிப்பதிலும், அதில் 50% பெண்களுக்கு வாய்ப்பளிப்பதிலும் நாம் தமிழர் கட்சி முன்னிலை வகித்தது. இந்த முறையும் வேகமாக வேட்பாளர்களை அறிவித்து வருகிறது. இருப்பினும், தற்போது கட்சியின் தேர்தல் வேலைகளில் பழைய வேகம் இல்லை என்பது அரசியல் நோக்கர்களின் கருத்தாக உள்ளது. கடந்த தேர்தல்களில் சீமானின் அனல் பறக்கும் பிரச்சாரங்களும், சமூக வலைதளங்களில் தொண்டர்களின் தீவிரமான செயல்பாடுகளும் பெரும் விவாதத்தை ஏற்படுத்தும். ஆனால், தற்போது பொதுக்கூட்டங்களும், தெருமுனைப் பிரச்சாரங்களும் பெரிய அளவில் வேகம் எடுக்காமல் இருப்பது அக்கட்சித் தொண்டர்களிடையே ஒருவித தொய்வை ஏற்படுத்தியுள்ளது.

சீமான் எப்போதும் டிரெண்ட் செட்டர், நர்ரேட்டிவ் செட்டர் ஆக இருப்பார். ஆனால் இந்த முறை சீமான் கடுமையாக அமைதி காத்து வருகிறார்.