DMK- congress alliance: ஸ்டாலினை சந்திப்பதற்கு முன்! ப.சிதம்பரத்துடன் செல்வப்பெருந்தகை திடீர் ஆலோசனை

சென்னை: முதல்வர் ஸ்டாலினை சற்று நேரத்தில் சந்திக்கவுள்ள முன்னாள் மத்திய அமைச்சர் ப.சிதம்பரத்துடன், தமிழ்நாடு காங்கிரஸ் கமிட்டித் தலைவர் செல்வப்பெருந்தகை சந்தித்து ஆலோசனை நடத்தி வருகிறார்.

திமுக - காங்கிரஸ் இடையே கூட்டணி இழுபறியில் இருக்கும் நிலையில் முதல்வர் ஸ்டாலினை, இன்னும் சற்று நேரத்தில் ப.சிதம்பரம் சந்தித்து ஆலோசனை நடத்துகிறார்.

அவர் முதல்வரை சந்திக்க புறப்படும் முன்பு ப.சிதம்பரத்தின் நுங்கம்பாக்கம் வீட்டில் செல்வப்பெருந்தகை சந்தித்து பேசி வருகிறார். வரும் சட்டசபை தேர்தலில் திமுக 25 தொகுதிகளையும் ஒரு மாநிலங்களவை சீட்டையும் தர முன்வந்துள்ளது.

ஆனால் காங்கிரஸ் கட்சியோ 39 தொகுதிகளும் 2 ராஜ்யசபா சீட்டும் கேட்டு வருகிறது. இதனால் முதல்கட்டமாக நடந்த தொகுதி பங்கீட்டு பேச்சுவார்த்தையில் தோல்வியே ஏற்பட்டது. இந்த நிலையில் மாநிலங்களவையில் போட்டியிட திமுகவுக்கு 4 இடங்கள் கிடைத்துள்ளன.

இதில் திமுக இரு இடங்களிலும் காங்கிரஸ், தேமுதிகவுக்கு ஒரு இடங்களும் கொடுக்க திமுக தலைமை முடிவு செய்துள்ளது. மார்ச் 15 ஆம் தேதி நடக்கும் மாநிலங்களவை தேர்தலுக்கு நாளை மறுநாளுடன் வேட்புமனு தாக்கலுக்கான கடைசி தேதி முடிகிறது.

இதனால் இன்றைக்குள் திமுகவுடன் கூட்டணியை தொடர்வதா வெளியேறுவதா என்பதை அறிவிக்க இன்றுடன் கெடு விதிக்கப்பட்டதாக சொல்லப்படுகிறது.

ஏற்கெனவே தமிழக காங்கிரஸ் மேலிட பொறுப்பாளர் கிரிஷ் சோடங்கர்,தவெகவை புகழ்ந்து பேசியுள்ளார். மேலும் திமுக தரும் 25 தொகுதிகளை பெறக் கூடாது என்பதிலும் அவர் திட்டவட்டமாக இருக்கிறாராம். இந்த நிலையில்தான் காங்கிரஸ் மூத்த தலைவரும் முன்னாள் மத்திய அமைச்சருமான ப.சிதம்பரம், முதல்வர் ஸ்டாலினை சந்திக்கவுள்ளார்.

அவரை சந்தித்து ஆலோசனை நடத்துவதற்கு முன்பாக நுங்கம்பாக்கத்தில் உள்ள ப.சிதம்பரம் வீட்டிற்கு செல்வப்பெருந்தகை வருகை தந்துள்ளார். அங்கு அவருடன் ஆலோசனை நடத்தி வருவதாக சொல்லப்படுகிறது. காங்கிரஸ் கட்சியில் பலருக்கு தவெகவுடன் கூட்டணி வைக்க விருப்பம் இருந்தாலும் சோனியா காந்திக்கு திமுகவுடன்தான் கூட்டணி அமைக்க வேண்டும் என்ற எண்ணம் இருப்பதாக சொல்லப்படுகிறது. இதனால் திமுக- காங்கிரஸ் இடையே கூட்டணி தொடருமா இல்லை முறியுமா என்பது இன்று அல்லது நாளை தெரிந்து விடும் என்கிறார்கள்.

English summary

Tamil Nadu Congress Committee President Selvaperunthagai is holding discussions with former Union Minister P. Chidambaram, who is set to meet Chief Minister M.K. Stalin shortly. The meeting has sparked political interest amid ongoing alliance and election-related developments in the state.