செங்கோட்டையன் விஜய் முன்னிலையில் தவெகவில் இணைகிறாரா? சிடிஆர் நிர்மல் குமார் கொடுத்த ரியாக்‌ஷன்

Updated: Tuesday, November 25, 2025, 19:40 [IST]

Subscribe to Oneindia Tamil

சென்னை: அதிமுகவில் இருந்து நீக்கப்பட்ட முன்னாள் செங்கோட்டையன், தவெகவில் வரும் 27 ஆம் தேதி இணைய இருப்பதாக தகவல் பரவி வரும் நிலையில், இது குறித்து தவெக நிர்வாகி நிர்மல் குமாரிடம் செய்தியாளர்கள் கேட்டனர். இதற்கு நிர்மல் குமார் கொடுத்த பதிலை இங்கே பார்க்கலாம்.

அதிமுகவின் மிக மூத்த தலைவராக விளங்கிய செங்கோட்டையன் அண்மையில் அக்கட்சியில் இருந்து அதிரடியாக நீக்கப்பட்டார். அதிமுகவில் பிரிந்து சென்றவர்களை ஒருங்கிணைக்க வேண்டும் என்றும் 10 நாட்களில் இந்த பணிகளை செய்யாவிட்டால் நானே அதற்கான பணிகளை தொடங்குவேன் என்று கட்சியின் தலைமைக்கு அதாவது எடப்பாடி பழனிசாமிக்கு கெடு விதித்தார்.

இதனால், கடும் அப்செட் ஆன எடப்பாடி பழனிசாமி, செங்கோட்டையன் கட்சி பதவிகளை பறித்தார். இதையடுத்து, சில நாட்கள் அமைதியாக இருந்த செங்கோட்டையன் தேவர் ஜெயந்தி விழாவில் முன்னாள் முதல்வர் ஓ பன்னீர்செல்வம், அமமுக பொதுச்செயலாளர் டிடிவி தினகரன் ஆகியோரை சந்தித்தார். இதையடுத்து, செங்கோட்டையனை கட்சியில் இருந்தே நீக்கினார் எடப்பாடி.

அதிமுக தொடங்கிய காலத்தில் இருந்தே கட்சியின் உறுப்பினராக இருக்க கூடிய செங்கோட்டையனை எடப்பாடி நீக்கியது அரசியல் வட்டாரத்திலும் அதிகம் பேசுபொருளானது. அதிமுகவில் இருந்து நீக்கப்ட்ட நிலையில் செங்கோட்டையனின் அடுத்த கட்ட நகர்வு என்னவாக இருக்கும் என்பது குறித்து அவரது ஆதவாளர்கள் உன்னிப்பாக கவனித்து வந்தனர்.

இந்த நிலையில், செங்கோட்டையன் நாளை மறுநாள் விஜய் முன்னிலையில் த.வெ.க.வில் இணையப் போவதாக இணையதளங்களில் தகவல் பரவியது. இது தொடர்பாக செங்கோட்டையனிடம் விளக்கம் கேட்க பத்திரிகையாளர்கள் அவரது செல்போனுக்கு தொடர்பு கொண்டனர். ஆனால் அவர் போனை எடுக்கவில்லை.

அவரது உதவியாளர்கள் கூறும்போது, செங்கோட்டையன் எதுவும் பேசவில்லை. நிர்வாகிகளையும் இப்போது சந்திக்கவில்லை என்று மட்டும் கூறினர். இணையதளங்களில் வேகமாக பரவி வரும் இந்த தகவலை இதுவரை செங்கோட்டையன் மறுக்கவும் இல்லை, அது வதந்திதான் என்றும் கூறவில்லை.

இந்த நிலையில், தவெக இணை செயலாலர் சிடிஆர் நிர்மல் குமாரிடம் இன்று செய்தியாளர்கள் இது தொடர்பாக கேள்வி கேட்டனர். அதாவது செங்கோட்டையன் தவெகவில் இணைய இருப்பதாக செய்திகள் பரவுகிறதே என்று செய்தியாளர்கள் கேட்ட போது, மற்றவை பற்றி அப்புறம் பேசலாம் என்று நேரடியாக பதில் சொல்ல மறுத்துவிட்டார்.