2007ஆம் ஆண்டு செப். 23ஆம் தேதி! பாஜக கொடிக்கம்பத்தை வெட்டி வீழ்த்திய ஜெ.அன்பழகன்! மறக்க முடியுமா?

சென்னை: கொரோனா காரணமாக ஜெ.அன்பழகன் மறைந்து இன்றுடன் 3 ஆண்டுகள் உருண்டோடிவிட்ட நிலையில், கடந்த 2007ஆம் ஆண்டு கமலாலயத்தை முற்றுகையிட்டு போராட்டம் நடத்தியதுடன் பாஜக கொடிக்கம்பத்தை அவர் வெட்டி வீழ்த்திய நிகழ்வும் நடந்தது.

கட்சிப்பணி என்று வந்துவிட்டால் சாப்பாடு -தூக்கம் -மருந்து மாத்திரை -உடல்நலம் -குடும்பம் என எதை பற்றியும் கவலை கொள்ளாமல் முழு ஈடுபாட்டுடன் களமாடியவர் ஜெ.அன்பழகன். இதனால் தான் இவரது இறுதி மூச்சு வரை திமுக தலைமையிடம் நேருக்கு நேர் விவாதிக்க கூடிய இடத்தில் இருந்தார்.

மரணிப்பதற்கு சில நாட்களுக்கு முன்னர் கூட ஐ பேக் டீமை ஸ்டாலினிடம் நேரடியாக வறுத்தெடுத்தவர் ஜெ.அன்பழகன். கட்சிப்பணிகளில் எவ்வளவு தான் பிஸியாக இருந்தாலும், விளையாட்டு போட்டிகளை பார்க்காமலோ, சினிமாவை பற்றி விவாதிக்காமலோ அவர் இருந்ததில்லை.

இதனிடையே சேது சமுத்திர திட்டம் விவகாரத்தில் ராமர் குறித்து கருணாநிதி தெரிவித்த ஒரு கருத்துக்கு, ராம்விலாஸ் வேதாந்தி என்ற பாஜக ஆதரவு சாமியார் கண்டனம் தெரிவித்திருந்ததுடன் கருணாநிதியின் தலையை சீவி வந்தால் தங்கம் பரிசாக கொடுக்கப்படும் என அறிவித்திருந்தார்.

இதனால் வெகுந்டெழுந்த ஜெ.அன்பழகன், தனது படை பரிவாரங்களுடன் கமலாலயத்தில் போராட்டம் நடத்தியதுடன் அங்கிருந்த பாஜக கொடிக்கம்பத்தையும் வெட்டி சாய்த்த நிகழ்வு நடந்தது. இது குறித்து ஒன் இந்தியா தமிழிடம் கூறிய மறைந்த ஜெ.அன்பழகனுக்கு நெருக்கமான ஜானகிராமன்,

''2007ஆம் செப்டம்பர் 23ஆம் தேதி தான் பாஜக கொடிக்கம்பத்தை வெட்டி வீழ்த்திய நிகழ்வு நடந்தது. நானும் அந்தப் போராட்டத்தில் பங்கேற்று கைது செய்யப்பட்டேன். அப்போது திமுக ஆட்சி நடந்தாலும் கூட பாரபட்சமின்றி கைது நடவடிக்கை மேற்கொள்ளப்பட்டது'', என்ற நினைவலைகளை பகிர்ந்தார்.

''நான் மறைந்தாலும் கழகத்தின் கொள்கைகளை காக்கும் சின்னமாக விளங்குவேன்'' என கடந்த 2013-ம் ஆண்டு நடைபெற்ற தனது சகோதரர் மகள் திருமண விழாவில் பேசியிருந்தார் ஜெ.அன்பழகன். அதனை இப்போது சுட்டிக்காட்டும் அவரது ஆதரவாளர்கள் ஜெ.அன்பழகன் மறைவை ஈடுசெய்ய முடியாமல் தவிக்கின்றனர்.

English summary

It has been 3 years since J. Anbazhagan demise due to Corona, and in 2007 he had besieged the Kamalalayam and protest and he had cut down the BJP flagpole.