கிளாம்பாக்கம் பஸ் நிலையத்திற்கு இப்படி ஒரு சோதனையா? தென் மாவட்ட பஸ்களை நிறுத்த இடமில்லை! SETC கடிதம்

சென்னை: கிளாம்பாக்கம் பேருந்து நிலையத்தில் போதிய இடவசதி இல்லை என தமிழ்நாடு போக்குவரத்துக் கழகம் குற்றம்சாட்டியுள்ளது.

சென்னை கோயம்பேடு பேருந்து நிலையம் மிகப்பெரிய பேருந்து நிலையம் ஆகும். இது 1999 ஆம் ஆண்டு திமுக ஆட்சியில் அப்போதைய முதல்வராக இருந்த கருணாநிதியின் உத்தரவின்பேரில் கட்டுமானம் தொடங்கப்பட்டது. இதைத் தொடர்ந்து ஆட்சி மாற்றத்திற்கு பிறகு 2002 ஆம் ஆண்டு முதல்வராக பதவியேற்ற ஜெயலலிதா திறந்து வைத்தார்.

இந்த பேருந்து நிலையத்திற்கு புரட்சித் தலைவர் டாக்டர் எம்ஜிஆர் பேருந்து நிலையம் என பெயரிட்டிருந்தார். இந்த இடத்தில் 160 பிளாட்பார்ம்கள் உள்ளன. இதன் பட்ஜெட் 103 கோடி ரூபாய் ஆகும். இதன் பரப்பளவு மொத்தம் 36.5 ஏக்கர் ஆகும். இந்த பேருந்து நிலையத்தில் லாக்கர் ரூம்கள், ஹோட்டல்கள், சிறிய உணவு கடைகள், ஏடிஎம்கள், 10 டிராவல் ஏஜென்சி அலுவலகங்கள், தங்கும் இடங்கள் உள்ளன.

என்னதான் இத்தனை வசதிகள் இருந்தாலும் பண்டிகை காலங்களில் போக்குவரத்து நெரிசல் என்பது மிகப் பெரிய பிரச்சினையை ஏற்படுத்தி வந்தது. அதிலும் தென் தமிழகம் செல்லும் பயணிகள் கோயம்பேட்டில் ஏற்படும் போக்குவரத்தை ஊர்ந்து சென்று சொந்த ஊர்களுக்கு போவதற்குள் போதும் போதும் என்றாகிவிடுகிறது. இதனால் அதிமுக ஆட்சியில் கிளாம்பாக்கத்தில் பேருந்து நிலையம் கட்டும் பணிகள் தொடங்கின.

இந்த பேருந்து நிலையம் கட்டி முடிக்கப்பட்டு திறப்பு விழாவுக்காக காத்திருக்கிறது. சில மழைநீர் வடிகால் பணிகள் செயல்படுத்தப்பட்டு வருகிறது. இதனால் திறப்பு விழா தாமதமாகிறது. இந்த கிளாம்பாக்கம் பேருந்து நிலையத்திற்கு கலைஞர் நூற்றாண்டு பேருந்து முனையம் என பெயரிடப்பட்டுள்ளது. இது கோயம்பேடு பேருந்து நிலையத்தை விட பெரியது. அதாவது 88 ஏக்கர் பரப்பளவில் கட்டப்பட்டுள்ளது. இங்கு தென் தமிழகமான கன்னியாகுமரி, மதுரை, தூத்துக்குடி, திருச்சி, நெல்லை, திருவண்ணாமலை, செங்கோட்டை, தஞ்சை, விழுப்புரம் ஆகிய பகுதிகளுக்கு பேருந்துகள் இயக்கப்படும். இந்த பேருந்து நிலையத்தின் மதிப்பு ரூ 400 கோடியாகும்.

பண்டிகை காலங்களில் கூட்ட நெரிசலை தவிர்க்கும் வகையில் இத்தனை பிரம்மாண்டமாக அமைக்கப்பட்டுள்ள கிளாம்பாக்கம் பேருந்து நிலையத்தில் பேருந்துகளை நிறுத்த வசதி இல்லை என SETC குற்றம்சாட்டியுள்ளது. இதுகுறித்து SETC தமிழக அரசுக்கு எழுதியுள்ள கடிதத்தில் கோயம்பேடு பருந்து நிறுத்தத்தில் தென்மாவட்டங்களுக்கு செல்ல 202 பேருந்துகளை இயக்கி வருகிறோம்.

ஆனால் கிளாம்பாக்கத்தில் 100 பேருந்துகளை நிறுத்துவதற்கான இடங்களே ஒதுக்கப்பட்டுள்ளன. இதனால் கடும் குளறுபடிகளும் குழப்பங்களும் ஏற்படும் என அவர்கள் கடிதத்தில் குறிப்பிட்டுள்ளார்கள்.

English summary

TNSETC writes letter to Tamilnadu Government that there is no space in Kilambakkam bus stand to stand south tamilnadu buses.