விஜய் கட்சி கொடி அறிமுக விழாவில் தந்தை, தாய் பங்கேற்பு.. மனைவி, மகன் ஆப்சென்ட்

Updated: Thursday, August 22, 2024, 11:14 [IST]

Subscribe to Oneindia Tamil

சென்னை: தமிழக வெற்றிக் கழகத்தின் கொடி அறிமுக விழாவில் கட்சித் தலைவர் விஜய்யின் தாய் ஷோபா, தந்தை சந்திரசேகர் ஆகியோர் கலந்து கொண்டனர். இந்த விழாவுக்கு 300 பேர் மட்டுமே பனையூர் அலுவலகத்தில் கலந்து கொண்டனர். மற்றவர்கள் எல்லாம் வீடியோ கான்பிரன்ஸில் கலந்து கொண்டனர்.

நடிகர் விஜய், தமிழக வெற்றிக் கழகம் என்ற அரசியல் கட்சியை தொடங்கியுள்ளார். இந்த கட்சி கடந்த பிப்ரவரி மாதம் தொடங்கப்பட்டது. தனது கட்சி வரும் 2026 ஆம் ஆண்டு சட்டசபை தேர்தலில் போட்டியிடும் என விஜய் அறிவித்துள்ளார்.

இந்த நிலையில் கட்சியை எப்போது தொடங்குவார், என்ன பெயர் இருக்கும் என எதிர்பார்த்த நிலையில் கட்சியின் பெயர் தொடங்கப்பட்டுவிட்டது. ஆனால் கட்சியின் கொடி என்ன என தெரியாமல் இருந்தது. இந்த நிலையில் இன்றைய தினம் கட்சிக் கொடியையும் நடிகர் விஜய் அறிமுகப்படுத்தினார்.

இந்த விழாவுக்காக நடிகர் விஜய் தனது நீலாங்கரை வீட்டிலிருந்து பனையூரில் உள்ள கட்சி அலுவலகத்திற்கு வருகை தந்தார். அவரை புஸ்ஸி ஆனந்து வரவேற்றார். இந்த விழாவில் கட்சியின் பொருளாளர், கொள்கை பரப்புச் செயலாளர் உள்ளிட்டோர் கலந்து கொண்டனர்.

விஜய்யின் கொடி அறிமுக விழாவிற்கு அவருடைய தாய் ஷோபாவும், தந்தை சந்திரசேகரும் வருகை தந்தனர். இதையடுத்து உறுதிமொழி ஏற்கப்பட்டது. ஆனால் விஜய் மனைவி சங்கீதா, விஜய் மகன் ஜேசன் சஞ்சய் ஆகியோர் விழாவிற்கு வராதது பலரது புருவங்களை உயர்த்தியது.

பெற்றோரும், புஸ்ஸி ஆனந்தும் இருப்பதை உறுதி செய்த பின்னர் விஜய் கட்சிக் கொடியை அறிமுகப்படுத்தினார். அதில் சிவப்பு , மஞ்சள் நிறத்தில் கொடியிருந்தது. நடுவே வெற்றிக்கு அடையாளமான வாகை மலரும், இரு போர் யானைகளும் இருந்தன.

இந்த கொடியை பனையூர் கட்சி அலுவலகத்திலும் அவர் ஏற்றி வைத்தார். இதை தவெக நிர்வாகிகள் கைதட்டி வரவேற்றார். பிறகு கொடி பாடலும் அறிமுகப்படுத்தப்பட்டது.