உயிரைக் கொல்லும் ஸ்மோக் பிஸ்கட்! இவ்வளவு பாதிப்பு தருமா? தடை எப்போது?

Updated: Thursday, April 25, 2024, 14:00 [IST]

Subscribe to Oneindia Tamil

சென்னை: ஸ்மோக் பிஸ்கட் என்று சொல்லப்படும் உணவு தடை செய்யப்பட உள்ளதா என்பது பற்றி உணவுப் பாதுகாப்பு அதிகாரி விளக்கம் அளித்துள்ளார்.

சில மாதங்கள் முன்னதாக தமிழ்நாட்டில் ஆரஞ்சு கலர் பஞ்சு மிட்டாய் தடை செய்யப்பட்டது. அதில் உடலுக்கு கேடு விளைவிக்கும் நஞ்சு கலந்துள்ளதால் அதைப் புதுச்சேரி அரசு தடை செய்தது.

அதனைத் தொடர்ந்து தமிழக அரசு அதற்குத் தடை விதித்தது. இப்போது அதேபோல ஒரு சர்ச்சையில் சிக்கி உள்ளது ஸ்மோக் பிஸ்கட்.

சில நாட்கள் முன்னதாக ஹைதராபாத் சிறுவன் ஒருவன் ஸ்மோக் பிஸ்கட் சாப்பிட்ட உடன் வலி தாங்க முடியாமல் துடிதுடித்த வீடியோ ஒன்று சமூக வலைத்தளங்களில் வைரலாக பரவியது.

அதனைத் தொடர்ந்து பலரும் ஸ்மோக் பிஸ்கட் பற்றிய எதிர்மறையான கருத்துகளை வெளியிடத் தொடங்கினர். பல பெற்றோர்கள் வீடியோவை பார்த்து பயத்தில் உறைந்து போயினர்.

இந்நிலையில் சென்னையில் விற்பனையாகும் ஸ்மோக் பிஸ்கட் உட்படப் பல உணவுப்பொருட்களின் தரத்தை ஆய்வு செய்ய உணவுப் பாதுகாப்புத்துறை உத்தரவிட்டுள்ளது.

திரவ நைட்ரஜன் பாதிப்புகள் குறித்து உணவுப் பாதுகாப்புத்துறையின் நியமன அலுவலர் சதீஷ்குமார் பல்வேறு விளக்கங்களை அளித்துள்ளார்.

அவர், பேசியதாவது "நேற்று ஹைதராபாத்தில் ஒருசிறுவன் திரவ நைட்ரஜன் பிஸ்கட் சாப்பிட்டுவிட்டுத் துடிதுடித்த வீடியோ ஒன்று வெளியானது. அந்த வீடியோ பலரையும் அதிர்ச்சிக்கு உள்ளாக்கியது. அந்தச் சிறுவன் இறந்து போனதாகவும் செய்தி கிடைத்துள்ளது.

உடனடியாக உணவுப் பாதுகாப்பு ஆணையத்திலிருந்து ஒரு சுற்றறிக்கை ஒன்று வெளியிடப்பட்டது. அதை நாங்கள் பெற்றோம். அதில் திரவ நைட்ரஜனை எந்த உணவுப் பொருட்களில் எல்லாம் பயன்படுத்துகிறார்கள் என்று கூறி இருந்தார்கள்.

ஆகவே அந்த உத்தரவை ஏற்று நாங்கள் விசாரணை நடத்தி வருகிறோம். நாங்கள் விசாரணை நடத்தியதில் நிறைய மதுபான விடுதிகள், ரெஸ்டாரண்ட்ஸ், பார்ட்டி ஹால் போன்ற இடங்களில் இந்த திரவ நைட்ரஜன் திரவம் கலந்த உணவுகள் விற்பனை செய்யப்பட்டு வருவதை அறிந்தோம். அதற்கான கணக்கெடுப்பு நடந்து வருகிறது.

இந்தத் திரவ நைட்ரஜன் என்பது மைனஸ்196 டிகிரியில் உள்ள பொருள் அது. அதை அறையில் எடுத்து வைத்தால், உடனே அது அறையின் வெப்பநிலைக்கு மாறுவதற்காகப் புகை போல் வெளியேறும்.

இந்த மைனஸ்196 டிகிரியில் உள்ள ஐஸ் ஆனது நமது உடலில் எங்குப் பட்டாலுமே அந்தப் பாகம் அப்படியே கருகிவிடும். அந்தளவுக்கு ஆபத்தானது. உணவைப் பதப்படுத்தவும்,

உணவைக் கெடாமல் உறைய வைப்பதற்கும் அதைப் பயன்படுத்துவோம். இதைப் போன்ற தேவைக்கு மட்டுமே திரவ ஹைட்ரன் பயன்படுத்த வேண்டும். அதையே உணவாக எடுப்பது மிகமிக ஆபத்தானது.

மீறி அதை எடுத்தால் அது வயிற்றுக்குள் செல்லும் போது குடலில் ஓட்டை விழுந்துவிடும். அது எங்கு எல்லாம் படுகிறதோ அங்கு எல்லாம் பாதிப்பு ஏற்படும்.

வெளிநாடுகளுக்குக் கறி, மீன், இறால் போன்றவற்றைப் பதப்படுத்தி அனுப்பும் போது அதன் அடியில் இந்த ஐஸ் நைட்ரஜனை வைப்போம். அது சரியான பதத்தில் உணவைக் கெடாமல் இருக்க உதவி செய்யும். அதைப் போய் உண்டால் என்ன ஆகும் என்று நீங்களே யோசித்துப் பாருங்கள்.