‘The Goat’ விஜய்க்கு சாதகமாக முடிவெடுத்த உதயநிதி ஸ்டாலின்? அர்ச்சனா கல்பாத்தி ட்வீட்டை பாத்தீங்களா?

சென்னை: விஜய் நடித்துள்ள 'தி கோட்' திரைப்படத்தின் சிறப்புக் காட்சிக்கு அனுமதி அளித்து தமிழக அரசு ஆணை பிறப்பித்துள்ளது. முதல்வர் ஸ்டாலின் அமெரிக்கா சென்றுள்ள நிலையில், விஜய் படத்துக்கு சிறப்புக் காட்சிக்கு அனுமதி வழங்கப்பட்டுள்ளது. சிறப்புக் காட்சிக்கு அனுமதி அளித்ததற்காக தமிழக அரசுக்கும், அமைச்சர் உதயநிதி ஸ்டாலினுக்கும் 'தி கோட்' திரைப்பட தயாரிப்பாளர் அர்ச்சனா கல்பாத்தி நன்றி தெரிவித்துள்ளார்.

வெங்கட் பிரபு இயக்கத்தில் நடிகர் விஜய் நடித்துள்ள திரைப்படம் 'தி கோட்'- தி கிரேட்டஸ்ட் ஆஃப் ஆல் டைம். இந்தப் படத்தில் நடிகர்கள் பிரசாந்த், மோகன், பிரபுதேவா, ஜெயராம், கணேஷ், யோகிபாபு, அஜ்மல் அமீர், சினேகா, லைலா, மீனாட்சி சௌத்ரி உள்ளிட்ட பல நட்சத்திரங்கள் நடித்துள்ளனர். இந்தப் படத்திற்கு யுவன் சங்கர் ராஜா இசையமைத்திருக்கிறார். ஏஜிஎஸ் என்டர்டெயின்மென்ட் நிறுவனம் தயாரித்துள்ளது. 'தி கோட்' திரைப்படம் நாளை திரையரங்குகளில் வெளியாக இருக்கிறது.

'தி கோட்' படத்தை செப்டம்பர் 5 மற்றும் 6 ஆகிய தேதிகளில் சிறப்பு காட்சி திரையிட அனுமதி கோரி ஏஜிஎஸ் நிறுவனம் தமிழக அரசுக்கு கோரிக்கை வைத்தது. இந்நிலையில் விஜய்யின் 'தி கோட்' திரைப்படத்தின் காலை 9 மணி சிறப்புக் காட்சிக்கு அனுமதி அளித்து தமிழக அரசு ஆணை பிறப்பித்துள்ளது. நாளை மட்டும் காலை 9 மணி முதல் நள்ளிரவு 2 மணி வர 'தி கோட்' திரைப்படத்தை 5 காட்சிகள் திரையிட தமிழக அரசு அனுமதி வழங்கியுள்ளது.

ரஜினிகாந்த், விஜய், அஜித், போன்ற முன்னணி நடிகர்களின் படங்கள் ரிலீஸ் ஆகும்போது அதிகாலை சிறப்பு காட்சிகளுக்கு அனுமதி கொடுப்பது வழக்கம். அஜித் நடித்த துணிவு மற்றும் விஜய் நடித்த வாரிசு படங்கள் வெளியான போது, சிறப்பு காட்சிக்கு அனுமதி வழங்கப்பட்ட நிலையில், அஜித் ரசிகர் ஒருவர் லாரியில் ஏறி நடனம் ஆடியபோது கீழே விழுந்து பலியான காரணத்தால் அதன்பிறகு எந்த படத்துக்கும் அதிகாலை சிறப்பு காட்சிக்கு தமிழக அரசு அனுமதி வழங்குவதில்லை.

இந்நிலையில், 'தி கிரேட்டஸ்ட் ஆஃப் ஆல் டைம்' படத்தின் ரிலீஸ் நாளன்று சிறப்புக் காட்சி திரையிடுவதற்கு அனுமதி கொடுத்ததற்காக தமிழ்நாடு அரசுக்கும், அமைச்சர் உதயநிதி ஸ்டாலினுக்கும் 'THE GOAT' படத்தின் தயாரிப்பாளர் அர்ச்சனா கல்பாத்தி நன்றி தெரிவித்துள்ளார்.

தமிழக முதல்வர் ஸ்டாலின் அரசு முறைப் பயணமாக அமெரிக்கா சென்றுள்ள நிலையில், விஜய் படத்தின் சிறப்புக் காட்சிக்கு அனுமதி வழங்கியுள்ளது தமிழக அரசு. அதற்கு அமைச்சர் உதயநிதி ஸ்டாலினுக்கு, தயாரிப்பாளர் அர்ச்சனா கல்பாத்தி நன்றி தெரிவித்துள்ளது கவனம் பெற்றுள்ளது.

English summary

Tamil Nadu government has issued an order giving permission for the special show for'The Goat' starring Vijay. Producer Archana Kalpathi thanked the TN government and Minister Udayanidhi Stalin for giving permission for the special show.