ஓமன் நாட்டில் கடத்தப்பட்ட தமிழர்! மத்திய அமைச்சர் ஜெய்சங்கருக்கு முதல்வர் ஸ்டாலின் கடிதம்!

சென்னை: ஓமன் நாட்டில் அடையாளம் தெரியாத நபர்களால் கடத்திச் செல்லப்பட்டுள்ள தமிழ்நாட்டை சேர்ந்த பெத்தாலி என்பவரை மீட்டு தாயகம் கொண்டுவர உரிய தூதரக நடவடிக்கை எடுக்குமாறு மத்திய அமைச்சர் ஜெய்சங்கருக்கு முதலமைச்சர் ஸ்டாலின் கடிதம் எழுதியுள்ளார்.

அந்தக் கடிதத்தில், ஓமன் நாட்டின் துக்ம் என்ற துறைமுகத்தில் உள்ள NOOH 1012 மற்றும் YAYA 1184, அல்ரெடா (ஓமானியன்) ஆகிய மீன்பிடிப் படகுகளில் வேலை செய்து வந்த தமிழ்நாட்டைச் சேர்ந்த 18 பேர் கொண்ட குழுவில்,பெத்தாலிஸ் என்பவரும் பணிபுரிந்து வந்ததாக தெரிவித்துள்ளார். படகின் பதிவு முகவரி Ujala Amrohi, Modern Industries LLC Horizon House Building 103, A1 Marata Street, A1 Ghabra North Muscat, Sultanate Otaman, Oman என்ற முகவரியில் உள்ளதாகவும் முதல்வர் தனது கடிதத்தில் சுட்டிக்காட்டியுள்ளார்.

மேலும், அந்த மீன்பிடிப் படகுகளில் பணிபுரிந்து வந்த 18 மீனவர்களின் சம்பளத்தை உரிமையாளர் தராததால் உரிமையாளருக்கும், மீனவர்களுக்கும் இடையே பிரச்சனை நிலவி வந்த நிலையில், பெத்தாலிஸ் அவர்களை அடையாளம் தெரியாத சிலர் கடத்திச் சென்றுள்ளதாகவும் மத்திய அமைச்சர் ஜெய்சங்கருக்கு எழுதியுள்ள கடிதத்தில் முதல்வர் ஸ்டாலின் குறிப்பிட்டுள்ளார்.

பெத்தாலியை ஓமனில் உடனடியாகக் கண்டுபிடித்து, இந்தியாவுக்கு திருப்பி கொண்டுவர உரிய நடவடிக்கை எடுக்குமாறு பெத்தாலிஸ் மனைவி ஷோபா ராணி தமிழக அரசுக்கு கோரிக்கை விடுத்துள்ளதை முதலமைச்சர் ஸ்டாலின் தனது கடிதத்தில் குறிப்பிட்டுள்ளார்.

இந்த நிலையில், ஓமன் நாட்டிலுள்ள, இந்தியத் தூதரகம் மூலம் பெத்தாலியை மீட்டு தாயகம் கொண்டுவர உரிய தூதரக நடவடிக்கைகளை மேற்கொள்ளுமாறு வெளியுறவுத் துறை அமைச்சர் டாக்டர் எஸ். ஜெய்சங்கரை கேட்டுக் கொண்டுள்ளார். இதனிடையே ஓமனில் காணாமல் போன தமிழர் பெத்தாலி கன்னியாகுமரி மாவட்டத்தை சேர்ந்தவர் என்பதும் அவரது பாஸ்போர்ட் எண் S4957793 என்பதும் குறிப்பிடத்தக்கது.

English summary

Chief Minister Stalin has written a letter to Central Minister Jaishankar asking him to take steps to rescue Tamilan Bethali, who was abducted in Oman.