திமுக தலைவர் பதவிக்கு ஸ்டாலின் நாளை வேட்பு மனுத்தாக்கல்! சென்னைக்கு படையெடுக்கும் கட்சியினர்!
சென்னை: திமுக தலைவர் பதவிக்கு ஸ்டாலின் நாளை வேட்புமனுத் தாக்கல் செய்யவுள்ள நிலையில், அந்த நிகழ்வில் பங்கேற்பதற்காக தமிழகமெங்கும் இருந்து கட்சியினர் சென்னைக்கு படையெடுத்த வண்ணம் உள்ளனர்.
இதனிடையே இன்னும் 2 நாட்களில் சென்னையில் பொதுக்குழு வேறு நடைபெறவுள்ளதால் திமுக முகாம் களை கட்டியுள்ளது.
முதலமைச்சர் ஸ்டாலினை தொடர்ந்து பொதுச்செயலாளர் பதவிக்கு துரைமுருகனும், பொருளாளர் பதவிக்கு டி.ஆர்.பாலுவும் நாளைய தினம் வேட்புமனு கொடுக்கிறார்கள்.
திமுக தலைவர்
திராவிட முன்னேற்றக் கழகத்தின் 15வது பொதுத் தேர்தலில் தேர்ந்தெடுக்கப்பட்டுள்ள புதிய நிர்வாகிகள் அடங்கிய பொதுக்குழுக் கூட்டம் 9.10.2022 ஞாயிற்றுக்கிழமை, காலை 9 மணிக்கு சென்னை, அமைந்தகரை, பச்சையப்பன் கல்லூரி எதிரில் உள்ள "செயின்ட் ஜார்ஜ் பள்ளி விங்க்ஸ் கன்வென்ஷன் சென்டரில்" நடைபெறுகிறது. அப்போது திமுக தலைவர், பொதுச்செயலாளர், பொருளாளர் மற்றும் நான்கு தணிக்கைக்குழு உறுப்பினர்களுக்கான தேர்தல் நடைபெறவுள்ளன.
வேட்புமனுத் தாக்கல்
இதனிடையே மேற்கண்ட பொறுப்புகளுக்கான வேட்புமனுத் தாக்கல் நாளை 7-10-2022 வெள்ளிக்கிழமை அன்று காலை 10 மணி முதல் மாலை 5 மணி வரையில் அண்ணா அறிவாலயத்தில் பெற்றுக் கொள்ளப்படும். இப்பொறுப்புகளுக்குப் போட்டியிடுவோர் வேட்புமனுக் கட்டணமாக ரூ.50,000 செலுத்த வேண்டும். அந்த வகையில் திமுக தலைவர் பதவிக்கு நாளை காலை ஸ்டாலின் முறைப்படி வேட்புமனுத் தாக்கல் செய்யவுள்ளார். அவரைத் தொடர்ந்து பொதுச்செயலாளர் பதவிக்கு துரைமுருகனும், பொருளாளர் பதவிக்கு டி.ஆர்.பாலுவும் நாளைய தினம் வேட்புமனு தாக்கல் செய்கிறார்கள்.
முன்மொழிய வேண்டும்
தலைவர், பொதுச்செயலாளர், பொருளாளர் மற்றும் நான்கு தணிக்கைக்குழு உறுப்பினர்கள் ஆகிய பொறுப்புகளுக்கு போட்டியிடுவோர்களை பொதுக்குழு உறுப்பினர்கள் ஐவர் முன்மொழிய வேண்டும், ஐவர் வழி மொழிய வேண்டும் என்பது திமுக விதி. இந்நிலையில் ஸ்டாலின் வேட்புமனுத் தாக்கல் செய்யவுள்ள நிகழ்ச்சியில் பங்கேற்கவும் அப்படியே அடுத்த 2 நாட்களில் நடைபெறும் பொதுக்குழுவில் கலந்துகொள்ளவும் வேண்டி தமிழகம் முழுவதும் இருந்தும் கட்சிக்காரர்கள் சென்னைக்கு இன்றே படையெடுத்துவிட்டனர்.
போட்டி இருக்காது
முதலமைச்சர் ஸ்டாலின் போட்டியிடும் திமுக தலைவர் பதவிக்கு எந்தப் போட்டியும் இருக்காது என்பது குறிப்பிடத்தக்கது. ஸ்டாலின் வேட்புமனுத் தாக்கல், பொதுக்குழு என அடுத்தடுத்து 2 முக்கிய நிகழ்வுகள் தொடர்ந்து இருப்பதால் திமுக தலைமைக் கழகம் பரபரப்பாக காணப்படுகிறது.
Click it and Unblock the Notifications
Sign in with Google