டெல்லி கிளம்பும் முன் ஆர்.எம்.வீரப்பன் வீட்டுக்கு போன முதல்வர் ஸ்டாலின்.. பிறந்தநாளையொட்டி வாழ்த்து!
சென்னை: மூத்த அரசியல்வாதி ஆர்.எம்.வீரப்பனின் 98ஆவது பிறந்தநாளையொட்டி தமிழ்நாடு முதல்வர் ஸ்டாலின் நேரில் சென்று வாழ்த்து தெரிவித்துள்ளார். டெல்லிக்கு கிளம்புவதற்கு முன்பாக ஆர்.எம்.வீரப்பன் வீட்டுக்கே சென்று வாழ்த்து தெரிவித்துள்ளார் ஸ்டாலின்.
திராவிட இயக்க மூத்த தலைவரும், எம்.ஜி.ஆர் கழக நிறுவனரும், முன்னாள் அமைச்சருமான ஆர்.எம்.வீரப்பன் தனது 98வது பிறந்தநாளை இன்று கொண்டாடி வருகிறார். ஆர்.எம்.வீ பிறந்தநாளையொட்டி சென்னை தியாகராயர் நகரில் உள்ள அவரது இல்லத்திற்கு தமிழக முதல்வர் மு.க. ஸ்டாலின் இன்று காலை நேரில் சென்று வாழ்த்து தெரிவித்துள்ளார். இந்நிகழ்வில் அமைச்சர்கள் கே.என்.நேரு, பொன்முடி, ஜெகத்ரட்சகன் எம்.பி உள்ளிட்டோர் பங்கேற்று வாழ்த்து தெரிவித்தனர்.
இந்நிலையில் முதல்வர் ஸ்டாலின் தனது ட்விட்டர் (X) பக்கத்தில், "எம்.ஜி.ஆர். கழகத்தின் நிறுவனரும், முத்தமிழறிஞர் கலைஞர் மீது அளவற்ற மதிப்பும், அன்பும் கொண்டவருமான அண்ணன் ஆர்.எம்.வீரப்பன் அவர்களுக்கு 98-ஆவது பிறந்தநாள் வாழ்த்துகள்! நம் பாசத்திற்குரிய ஆர்.எம்.வீ. அவர்கள் நூறு ஆண்டுகள் கடந்தும் முழு நலத்துடன் வாழ நெஞ்சார வாழ்த்துகிறேன்!" என்று குறிப்பிட்டுள்ளார்.
இன்றும் நாளையும் டெல்லியில் நடைபெறும் ஜி20 மாநாட்டையொட்டி, குடியரசுத் தலைவர் திரவுபதி முர்மு சார்பில் இன்று இரவு வழங்கப்படும் இரவு விருந்தில் பல்வேறு நாட்டு அதிபர்களும், உள்நாட்டு தலைவர்களும் பங்கேற்க உள்ளனர். இந்த விருந்தில் பங்கேற்க தமிழக முதல்வர் மு.க.ஸ்டாலினுக்கு அழைப்பு விடுக்கப்பட்ட நிலையில், இதில் பங்கேற்பதற்காக தமிழக முதல்வர் ஸ்டாலின் இன்று டெல்லி புறப்பட்டுச் சென்றுள்ளார். டெல்லி கிளம்புவதற்கு முன்பாக தி.நகர் சென்று ஆர்.எம்.வீரப்பனுக்கு வாழ்த்து தெரிவித்துள்ளார்.
Click it and Unblock the Notifications
Sign in with Google