சூரியன் சுட..அக்னி நட்சத்திர காலத்தில் தார் ரோடு எல்லாம் உருகுதே..வெதர்மேன் வார்னிங்

சென்னை: கோடை மழை கொட்டித்தீர்த்துள்ளதால் தென் மாவட்டங்களில் அக்னி நட்சத்திர காலத்தை குளுமையாக கடந்து வருகின்றனர். வங்கக் கடலில் உருவாகும் புயலின் திசை மாற்றத்தினால் அடுத்த வாரங்களில் தார்ரோடு உருகும் அளவிற்கு சூரியன் சுட்டெரிக்கும் என்று தமிழ்நாடு வெதர்மேன் தனது ட்விட்டர் பக்கத்தில் பதிவிட்டுள்ளார்.

அக்னி நட்சத்திர காலத்தில் அடைமழை காலம் போல கோடை மழை கொட்டி வருகிறது. இந்த சூழ்நிலையில்தான் வானிலை ஆய்வு மையம் மிக முக்கியமான அறிவிப்பினை வெளியிட்டது. அதில் திங்கட்கிழமை 8ஆம் தேதி தென்கிழக்கு வங்கக்கடல் மற்றும் அதனை ஒட்டிய தெற்கு அந்தமான் கடல் பகுதியில் நிலவிய காற்றழுத்த தாழ்வு பகுதி இன்று காலை 05.30 மணி அளவில் ஆழ்ந்த காற்றழுத்த தாழ்வு பகுதியாக வலுப்பெற்று அதே இடத்தில் நிலைகொண்டுள்ளது.

இன்று மாலை காற்றழுத்த தாழ்வு மண்டலமாக மேலும் வலுப்பெற்று நாளை 10ஆம் தேதியன்று தென்கிழக்கு மற்றும் அதனை ஒட்டிய மத்திய கிழக்கு வங்கக்கடல் மற்றும் அந்தமான் கடல் பகுதிகளில் புயலாக மேலும் வலுபெறக்கூடும். இது 11.05.2023 வரை வடக்கு-வடமேற்கு திசையில் நகரக்கூடும். அதன் பிறகு வடக்கு-வட கிழக்கு திசையில் திரும்பி வங்கதேசம் - மியன்மார் கடற்கரை நோக்கி நகரக்கூடும் என்று வானிலை ஆய்வு மையம் தெரிவித்துள்ளது.

புயல் திசை மாறியதால் மழையானது படிப்படியாக குறையும் வெயிலின் தாக்கம் அதிகரிக்கும் எனவும் வானிலை ஆய்வு மையம் தெரிவித்துள்ளது. புயல் திசைமாறியுள்ளதால் இனிதான் உண்மையான அக்னி நட்சத்திரத்தை மக்கள் அனுபவிக்கப்போகிறார்கள் என்று கிண்டலாக பதிவிட்டுள்ளார் தமிழ்நாடு வெதர்மேன் பிரதீப் ஜான்.

வெதர்மேன் தனது முகநூல் பக்கத்தில் வானிலை பற்றி கேள்வி கேட்டு புதிர் விளையாட்டு விளையாடியுள்ளார். வரப்போகும் 11 மற்றும் 12ஆம் தேதி தமிழக வானிலையானது ரசிக்கும் படியாக இருக்காது என்று குறிப்பிட்டுள்ளார். அடுத்தவாரம் சூரியனுக்கான நேரம் என்று பதிவிட்டுள்ளார்.

மே 4ஆம் தேதி அக்னி நட்சத்திரம் ஆரம்பமானது. அந்த புதிருக்கான க்ளூவாக அக்னி நட்சத்திரம் படத்தில் லட்சுமிபதி, செட்டியார் ஆக நடித்த ஜனகராஜ், வி.கே. ராமசாமி ஆகியோரின் காமெடி காட்சியை பதிவிட்டுள்ளார்.

மூன்றாவதாக தனது க்விஸ் கேள்வியில் அடுத்தவாரம் தார் ரோடு எல்லாம் உருகுதே...அதற்குக் காரணம் சுளீர் வெயில் என்றும் குறிப்பிட்டுள்ளார். இந்த கேள்வி பதிலை நீங்கள் என்ஜாய் செய்திருப்பீர்கள். ஆனால் அடுத்த வாரம் வானிலையில் ஏற்படப்போகும் மாற்றத்தை உங்களால் அனுபவிக்க முடியாது என்று பதிவிட்டுள்ளார் வெதர்மேன் பிரதீப் ஜான்.

English summary

Starting next week Namma Thaar Road lam Uruguthey due to Sulieer Veyyil. Next week we may not enjoy the weather says Tamil Nadu Weatherman Pradeep john post in his Face book page.