கோமியம் நல்லதா? மன்னிப்பு கேளுங்க! சென்னை ஐஐடி இயக்குநருக்கு மாணவர் கழகம் வலியுறுத்தல்

சென்னை: மாட்டு கோமியம் நல்லது என்றும், அதை குடித்தால் ஜுரம் சரியாகும் என்றும் சென்னை ஐஐடி இயக்குநர் காமகோடி கூறியிருந்தார். அவரது கருத்துக்கு கண்டனம் தெரிவித்துள்ள மாணவர் கழகம், அவர் பொதுவெளியில் பகிரங்கமாக மன்னிப்பு கேட்க வேண்டும் என்று வலியுறுத்தியுள்ளது.

அதாவது, "சென்னை ஐ.ஐ.டி. இயக்குநரான காமகோடி, கோமியம் குடித்தால் ஜூரம் சரியாகுமென அறிவியலுக்கு எதிரான, ஆதாரங்கள் இல்லாத பிற்போக்கு கருத்தைப் பேசியிருக்கிறார். அறிவியல் படி கோமியம் என்பது மாட்டின் கழிவு. மேலும் ஏற்கனவே நோய்வாய்ப்பட்டிருக்கும் மாடாக இருந்தால் மனிதர்களுக்குத் தீங்கு விளைவிக்கக்கூடிய, நோயைப் பரப்பக்கூடிய நுண்ணுயிரிகள் அந்த மாட்டின் சிறுநீரில் இருக்கும்.

இதை மனிதர்கள் அருந்தினால் வயிற்றுப்போக்கு, காய்ச்சல், சுவாசக் கோளாறு உள்ளிட்ட பல நோய்கள் ஏற்பட்டு உயிருக்கே ஆபத்தாக முடியலாம் என்று மருத்துவர்கள் எச்சரிக்கும் நிலையில், அறிவியலை ஊக்குவிக்கவேண்டிய இந்தியத் தொழில்நுட்பக் கழகத்தின் இயக்குநர் அறிவியலுக்கு எதிராகப் பேசியிருப்பதைத் தமிழ்நாடு மாணவர் கழகம் கண்டிக்கிறது. மேலும் தன் பேச்சுக்கான ஆதாரத்தை அவர் வெளியிட வேண்டும். தவறும் பட்சத்தில் தான் பேசியது தன்னுடைய சொந்த கருத்து என்றும், அறிவியல் படி தவறு என்றும் பொதுவெளியில் வருத்தம் தெரிவிக்க வேண்டும்" என தமிழ்நாடு மாணவர் கழகம் தனது அறிக்கையில் தெரிவித்திருக்கிறது.

ஐஐடி இயக்குநர் பேசியது என்ன?:

தமிழ்நாடு முழுவதும் பொங்கல் விழாக கோலாகலமாக கொண்டாடப்பட்டது. இப்படி இருக்கையில், சென்னை மாம்பலத்தில் உள்ள கோ-சோலையில் கடந்த 15ம் தேதி மாட்டு பொங்கல் கொண்டாடப்பட்டது. இதில் பங்கேற்றிருந்த அவர், "கோமியம் சிறந்த மருத்துவ குணத்தை கொண்டது. இது ஜுரத்த கூட சரியாக்கும். பாக்டீரியா, பூஞ்சை பாதிப்புகளுக்கு எதிராக செயல்படுவதால் இதற்கு இந்த தனிச்சிறப்பு உண்டு. ஒருமுறை சந்நியாசி ஒருவருக்கு மிகுந்த காய்ச்சல் இருந்தது. அவர் கோமியத்தை குடித்தார். அவருக்கு 15 நிமிடங்களில் காய்ச்சல் விட்டுவிட்டது" என்று கூறியிருந்தார்.

உலகமே டெக்னாலஜி பின்னாடி ஒடிக்கொண்டிருக்கிறது. இந்தியாவும் உலக அரங்கில் தலைநிமிர்ந்து நடக்க ஐஐடி-க்கள் உதவிப்புரிய வேண்டும். ஆனால் அப்படிப்பட்ட ஐஐடியின் இயக்குநரே கோமியம் குறித்து இப்படி பேசலமாமா? என்று பலரும் கேள்வி எழுப்பி வருகின்றனர்.

English summary

IIT Madras Director Kamakoti had said that cow Urine is good and drinking it will cure fever. The students' union has condemned his comments and demanded that he publicly apologize.