“உன் வாழ்க்கை உன் கையில்”.. புத்தாண்டு மெசேஜ் சொன்ன ரஜினிகாந்த்! போன வருசம் மாதிரி மீட் பண்ணுவாரா?

சென்னை : "உன் வாழ்க்கை உன் கையில்" எனக் குறிப்பிட்டு அனைவருக்கும் புத்தாண்டு நல்வாழ்த்துகளைத் தெரிவித்துள்ளார் சூப்பர்ஸ்டார் ரஜினிகாந்த். சரியாக 2023ஆம் ஆண்டு பிறந்தபிறகு புத்தாண்டு வாழ்த்துகளைத் தெரிவித்து ட்வீட் செய்துள்ளார் ரஜினிகாந்த்.

உலகம் முழுவதும் 2023ஆம் ஆண்டை மக்கள் உற்சாகத்துடன் வரவேற்றுள்ளனர். தமிழ்நாடு உட்பட நாடு முழுவதும் அனைத்து நகரங்களிலும் புத்தாண்டு கொண்டாட்டங்கள் களைகட்டியுள்ளன. மகிழ்ச்சியும் மனநிறைவும் ஒவ்வொருவரின் உள்ளங்களிலும் நிறையட்டும் என ஒருவொருக்கொருவர் வாழ்த்துகளைத் தெரிவித்து, இந்தப் புத்தாண்டை வரவேற்றுள்ளனர்.

வண்ணமயமான வானவேடிக்கைகளுடன் 2023ஆம் ஆண்டை மக்கள் வரவேற்றுள்ளனர்.2023-ஆம் ஆண்டு பிறந்துள்ளதையொட்டி அரசியல் தலைவர்கள், திரையுலக பிரபலங்கள், பல்வேறு துறைகளைச் சேர்ந்தவர்கள் என பலரும் பொதுமக்களுக்கு புத்தாண்டு வாழ்த்துகளைத் தெரிவித்துள்ளனர். ஆங்கில புத்தாண்டு தினமான இன்று முன்னணி நடிகர் ரஜினிகாந்த் தனது ட்விட்டர் பக்கத்தில் புத்தாண்டு வாழ்த்துகளைப் பதிவிட்டுள்ளார். அவரது ரசிகர்கள் பலரும் அவருக்கு வாழ்த்துகளைப் பகிர்ந்து கொண்டுள்ளனர்.

கடந்த ஆண்டு ஆங்கிலப் புத்தாண்டை முன்னிட்டு சென்னை போயஸ் கார்டனில் உள்ள ரஜினிகாந்த் வீட்டு முன்பு ஏராளமான ரசிகர்கள் ரஜினிக்கு வாழ்த்து சொல்ல திரண்டிருந்தனர். தனது இல்லத்தில் இருந்து வெளியே வந்த நடிகர் ரஜினிகாந்த், வாசலில் திரண்டிருந்த ஏராளமான ரசிகர்களுக்கு கையை மேலே தூக்கி அசைத்துக் காட்டியும் கை கூப்பி வணங்கியும் புத்தாண்டு வாழ்த்துகளைத் தெரிவித்தது குறிப்பிடத்தக்கது. இதேபோல இந்த முறையும் ரசிகர்களைச் சந்திப்பாரா என்ற எதிர்பார்ப்பு எழுந்துள்ளது.

English summary

Superstar Rajinikanth wished everyone a Happy New Year 2023 saying "Your life is in your hands".