விபத்தில் உயிரிழந்த காதலனுடன் "பேய் கல்யாணம்.." அதிர வைத்த ஆசைக் காதலி!

சென்னை: சீனாவின் சுமார் மூன்றயிரம் ஆண்டுகள் பழமையான முறைதான் இந்த கோஸ்ட் வெட்டிங். திருமணம் செய்து கொள்ளாமல் உயிரிழந்தவர்கள், நிச்சயமான பின்னர் இறந்தவர்கள் மரணத்துக்குப் பின்னர் தனக்கென யாரும் இல்லை என்று வேதனை அனுபவிப்பதாக நம்பப்படுகிறது.

எனவே, உயிரிழந்த நபரை நேசித்தவர் தங்களது சொந்தபந்தங்கள் முன்னிலையில் திருமணம் செய்துகொள்ளும் சடங்குதான் பேய் திருமணம் எனும் கோஸ்ட் வெட்டிங். இறந்தவர்களின் போட்டோ, அவர்களது உடைகள், அவர்கள் பயன்படுத்திய பொருள்களை வைத்து இந்த திருமணம் கோலாகலமாக நடத்தப்படுவது வழக்கம்.

இந்நிலையில், தைவானில் கார் விபத்தில் உயிரிழந்த காதலனை பழமைவாய்ந்த கோஸ்ட் வெட்டிங் முறையில் கரம்பிடிக்க அவரது காதலி முடிவு செய்துள்ள சம்பவம் நெகிழ்ச்சியை ஏற்படுத்தியுள்ளது.

தைவான் நாட்டைச் சேர்ந்தவர் யூ என்ற இளம்பெண். இவர் தனது காதலர், நண்பர்களுடன் ஜூலை 15 ஆம் தேதி காரில் சென்று கொண்டிருந்தார். அப்போது, துரதிர்ஷ்டவசமாக கார் விபத்துக்குள்ளாகியுள்ளது. இதில், காரில் இருந்த 4 பேருக்கும் பலத்த காயம் ஏற்பட்டுள்ளது. மற்றவர்கள் உயிர்பிழைத்த நிலையில், யூவின் காதலன் மட்டும் சம்பவ இடத்திலேயே உயிரிழந்தார்.

இதுகுறித்து யூ பேசுகையில், அந்த கோர சம்பவம் இன்னும் என் கண்ணுக்குள்ளேயே இருக்கிறது. விபத்து ஏற்பட்டதில் எனது காதலன், அவரது சகோதரி, எங்களது நண்பர் மூவரும் இடிபாடுகளுக்குள் சிக்கியிருந்தனர். என் காலில் பலத்த காயம் ஏற்பட்டிருந்தபோதிலும் அவர்களைக் காப்பற்ற முயற்சித்தேன். கடைசியில் என் காதலனை நான் பறிகொடுத்து விட்டேன். உண்மையான எங்களது காதலை கவுரவப்படுத்த வேண்டும் என நினைக்கிறேன். எனது காதலனின் தாயை கவனித்துக் கொள்ளவும், எனது வாழ்க்கையை அவர்களுடன் இணைந்து வாழ வேண்டும் என்று நினைக்கிறேன் என்று குறிப்பிட்டிருந்தார்.

English summary

Taiwan Woman decided ghost wedding for boyfriend who died in car Accident.