அடிச்சுத் தூக்குது தமிழ்நாடு.. இந்தியாவிலேயே நம்ம தான் டாப்! முதலமைச்சர் மு.க.ஸ்டாலின் பெருமிதம்!

சென்னை: பொருளாதார வளர்ச்சியில் தமிழ்நாடு மிகச் சிறப்பான முன்னேற்றத்தை கண்டிருக்கிறது. 14 ஆண்டுகளுக்குப் பிறகு 11.19 சதவீத பொருளாதார வளர்ச்சியை தமிழ்நாடு அரசு பதிவு செய்திருக்கும் நிலையில், இந்தியாவிலேயே இரட்டை இலக்க வளர்ச்சி விகிதத்தை எட்டிக்காட்டி உள்ள ஒரே அரசு தமிழ்நாட்டின் திராவிட மாடல் அரசு என பெருமிதம் தெரிவித்துள்ளார் தமிழ்நாடு முதலமைச்சர் மு.க.ஸ்டாலின்.

ஒவ்வொரு ஆண்டும் மத்திய அரசின் புள்ளியியல் மற்றும் திட்ட அமலாக்க அமைச்சகம் மாநிலங்களின் பொருளாதார வளர்ச்சி குறித்த புள்ளி விவரங்களை வெளியிட்டு வருகிறது. அந்த வகையில் 2024 - 2025 ஆம் நிதி ஆண்டில் தமிழ்நாடு அரசின் பொருளாதாரம் 11.19 சதவீதமாக வளர்ச்சி கண்டுள்ளது.

கடந்த ஏப்ரல் மாதம் தமிழ்நாடு அரசின் நிதிநிலை அறிக்கை தாக்கல் செய்யப்பட்ட நிலையில் அதில் கணிக்கப்பட்டதை விட 2.2 சதவீதம் அதிக வளர்ச்சியை பெற்றிருப்பது குறிப்பிடத்தக்கது. தமிழ்நாட்டின் பொருளாதார வளர்ச்சி 5 மாதங்களுக்கு முன்பு 9.69 சதவீதமாக இருந்ததும் கவனிக்கத்தக்கது.

பொருளாதார வளர்ச்சி

தற்போது இரட்டை இலக்கத்தை பொருளாதார வளர்ச்சியில் தாண்டி இருப்பதன் மூலம், எந்த மாநிலத்திலும் இல்லாத வகையில் இரட்டை இலக்கத்தில் பொருளாதார வளர்ச்சியை பெற்று நாட்டிலேயே முதல் இடத்தை தமிழ்நாடு பெற்று இருப்பது குறிப்பிடத்தக்கது. அடுத்த ஆண்டு இது 12 சதவீதமாக உயரும் எனவும் கணிக்கப்பட்டுள்ளது. தமிழ்நாடு மாநிலத்தின் ஒட்டுமொத்த மாநில உள்நாட்டு உற்பத்தி 17 லட்சம் கோடியாக 2024 - 2025 ஆம் ஆண்டில் இருக்கும் என மதிப்பிடப்பட்டு இருக்கிறது.

இரட்டை இலக்க வளர்ச்சி

இது கடந்த நிதியாண்டை விட இரண்டு லட்சம் கோடி ரூபாய் அதிகம் என்பது குறிப்பிடத்தக்கது. தனிநபர் வருமானத்திலும் தமிழ்நாடு மூன்றாவது இடத்தை பிடித்திருக்கிறது. தெலுங்கானா, கர்நாடகா ஆகியவை முறையே முதல் இரண்டு இடங்களில் இருக்கின்றன. தமிழ்நாட்டை பொறுத்தவரை ஒரு தனி நபரின் வருவாய் சராசரியாக 3 லட்சத்து 61 ஆயிரம் ரூபாய் என கணிக்கப்பட்டிருக்கிறது.

கடந்த 2010-11ம் நிதி ஆண்டில் திமுக ஆட்சி இருந்தபோது தமிழ்நாடு அரசின் வளர்ச்சி 13.12 % என்ற உச்சத்தை தொட்டது. அதற்கு பிறகு பத்தாண்டுகளில் வளர்ச்சி சதவீதம் சரிவடைந்த நிலையில் தற்போது மீண்டும் இந்தியாவிலேயே முதலிடத்தை பெற்றிருக்கிறது. இந்த நிலையில் இந்தியாவிலேயே இரட்டை இலக்க வளர்ச்சி வீதத்தை எட்டிக்காட்டி உள்ள ஒரே அரசு தமிழ்நாட்டின் திராவிட மாடல் அரசு என தமிழ்நாடு முதலமைச்சரும், திமுக தலைவருமான மு.க.ஸ்டாலின் பெருமிதம் தெரிவித்திருக்கிறார்.

இது தொடர்பாக திருக்குறள் ஒன்றை சுட்டிக்காட்டி பதிவிட்டுள்ள அவர்," இந்தியாவிலேயே இரட்டை இலக்க வளர்ச்சி விகிதத்தை எட்டிக் காட்டியுள்ள ஒரே அரசு தமிழ்நாட்டின் #DravidianModel அரசு! இந்தியாவிலேயே அதிகபட்சமாக 9.69% பொருளாதார வளர்ச்சியுடன் தமிழ்நாடு முதலிடம் என்று கூறி வந்தோம் அல்லவா? அதையும் தாண்டி, தமிழ்நாட்டின் வளர்ச்சி விகிதம் 11.19% என ஒன்றிய அரசின் திருத்தப்பட்ட மதிப்பீட்டில் வெளியாகியுள்ளது!

இதற்கு முன்பு, இரட்டை இலக்க வளர்ச்சி எட்டப்பட்டது 2010-11ஆம் ஆண்டில். அப்போது கலைஞர் ஆட்சி! இப்போது கலைஞர் வழி நடக்கும் திராவிட மாடல் ஆட்சி! இரண்டுமே கழக ஆட்சி! 2030-ஆம் ஆண்டுக்குள் #OneTrillionDollar பொருளாதாரம் என்றபோது பலரது புருவமும் உயர்ந்தது. "இது மிக உயர்ந்த இலக்கு, எப்படி சாத்தியமாகும்?" என்றார்கள்! இதே வேகத்தில் சென்றால், எதுவும் சாத்தியம் என்பது இப்போது மெய்ப்பிக்கப்பட்டுவிட்டது!

எண்ணிய எண்ணியாங்கு எய்துப எண்ணியார்
திண்ணியர் ஆகப் பெறின் (குறள் 666)" என பதிவிட்டுள்ளார்.

English summary

Tamil Nadu records 11.19% economic growth in FY 2024–25, becoming the only Indian state to achieve double-digit growth. CM Stalin attributes the success to the Dravidian Model.