இல்லம் செல்வோம்... உள்ளம் வெல்வோம்... தமிழக பாஜகவின் புதிய முழக்கம்... பரபரக்கும் அண்ணாமலை..!

Updated: Sunday, October 3, 2021, 13:36 [IST]

Subscribe to Oneindia Tamil

சென்னை: இல்லம் செல்வோம்; உள்ளம் வெல்வோம் என்ற தலைப்பில் தமிழக பாஜக தலைவர் அண்ணாமலை புதிய பரப்புரை பயணத்தை தொடங்கி வைத்துள்ளார்.

Recommended Video

அடுத்த 2 வருடத்தில் ... முக்கியமான திட்டம்.. பாஜக மாநில தலைவர் அண்ணாமலை பரபரப்பு பேச்சு

இதன் மூலம் எதிர்வரும் நகர்ப்புற உள்ளாட்சித் தேர்தலில் பாஜக கணிசமான இடங்களில் பதவியில் அமர வேண்டும் என எண்ணுகிறார் அண்ணாமலை. அப்போது தான் கட்சியின் அடிமட்டம் வலிமைபெறும் என அவர் நம்புகிறார்.

தமிழகத்தில் வரும் ஜனவரி மாதம் நகர்ப்புற உள்ளாட்சித் தேர்தல் நடைபெறும் என எதிர்பார்க்கப்படும் நிலையில், அதற்குள்ளாக இல்லம் செல்வோம்; உள்ளம் வெல்வோம் திட்டத்தை பரவலாக செயல்படுத்தி முடிக்கவுள்ளார் அவர்.

தமிழக பாஜக

தமிழகத்தில் பாஜக காலுன்ற முடியாது என திமுக, காங்கிரஸ், உள்ளிட்ட அதன் தோழமைக் கட்சிகள் கூறி வந்த நிலையில், 4 எம்.எல்.ஏ.க்களை சட்டப்பேரவைக்குள் அனுப்பி வைத்து தலைமையின் பாராட்டை பெற்று இன்று மத்திய இணை அமைச்சராக ஆகியுள்ளார் எல்.முருகன். இந்நிலையில் தமிழக பாஜகவின் தற்போதைய தலைவரான அண்ணாமலைக்கு அடுத்தடுத்து பெரும் சவால்கள் காத்திருக்கின்றன.

சுற்றுப்பயணம்

இன்னும் இரண்டரை ஆண்டுகளில் நடைபெறவுள்ள நாடாளுமன்றத் தேர்தலில் தமிழகத்திலிருந்து குறைந்தது 3 எம்.பி.க்களையாவது பாஜக சார்பில் வெற்றி பெற வைக்க வேண்டும் என்பதும், இதே போல் நகர்ப்புற உள்ளாட்சித் தேர்தலில் நகராட்சி, மாநகராட்சி கவுன்சிலர் பதவிகளில் பாஜகவினர் பெருமளவில் வெற்றி பெற வேண்டும் என்பதும் இப்போதைக்கு அவர் முன்னால் நிற்கும் சவால்கள். இதற்கான பணிகளை இப்போதே தொடங்கிவிட்ட தமிழக பாஜக தலைவர் அண்ணாமலை மாவட்ட வாரியாக சூறாவளி சுற்றுப்பயணம் மேற்கொண்டு வருகிறார்.

கலந்துரையாடல்

ராகுல்காந்தி, கமல்ஹாசன் பாணியில் கல்லூரி மாணவர்களை சந்தித்து கலந்துரையாடல் நடத்த தொடங்கியுள்ளார். அடுத்த கட்டமாக குக்கிராமம் முதல் பெருநகரங்கள் வரை இல்லம் செல்வோம்; உள்ளம் வெல்வோம் என்ற முழக்கத்துடன் பரப்புரை திட்டம் ஒன்றையும் தொடங்கி வைத்துள்ளார். அனைத்து தரப்பு மக்களிடமும் பாஜகவை கொண்டு சேர்க்கும் வகையில் இந்த முயற்சியை அவர் கையிலெடுத்திருக்கிறார்.

செயல்திட்டங்கள்

அமித்ஷா தன் மீது வைத்திருக்கும் மரியாதைக்கு சிறு களங்கம் கூட ஏற்பட்டுவிடக் கூடாது என்பதில் மிகத் தெளிவாக உள்ள அவர், நகர்ப்புற உள்ளாட்சித் தேர்தல், நாடாளுமன்றத் தேர்தல் ஆகிய இரண்டையும் மனதில் வைத்து புதிய புதிய செயல்திட்டங்களை வடிவமைத்து செயல்படுத்த தொடங்கியிருக்கிறார். எல்.முருகன் தமிழக பாஜக தலைவராக இருந்த போது வெற்றிவேல் வீர வேல் என்ற முழக்கத்துடன் வேல் யாத்திரை நடத்தியது குறிப்பிடத்தக்கது.