அக்டோபர் 14ம் தேதி தமிழக அமைச்சரவை கூட்டம்.. முக்கிய முடிவுகளுக்கு வாய்ப்பு?

Updated: Monday, October 10, 2022, 19:22 [IST]

Subscribe to Oneindia Tamil

சென்னை: முதல்வர் மு.க.ஸ்டாலின் தலைமையில் அக்.14-ல் தமிழக அமைச்சரவை கூட்டம் நடைபெற உள்ள நிலையில், இதில் முக்கிய முடிவுகள் எடுக்கப்படும் என எதிர்பார்க்கப்படுகிறது.

தமிழ்நாட்டில் கடந்த ஏப்ரல் 6ஆம் தேதி தொடங்கியது. மே 10ஆம் தேதி வரை நடைபெற்ற இந்தச் சட்டசபை கூட்டத்தொடரில் பல முக்கிய அறிவிப்புகள் வெளியானது.

குறைந்தது 6 மாதங்களுக்கு ஒரு முறை சட்டசபை கூட்டத்தொடர் நடைபெற வேண்டும் என்பதால், இந்த மாதம் சட்டசபை கூட்டத்தொடர் நடைபெறும் என எதிர்பார்க்கப்பட்டது.

சட்டசபை கூட்டத்தொடர்

இந்தச் சூழலில் தமிழ்நாட்டில் வரும் அக். 17ஆம் தேதி சட்டசபை கூட்டத்தொடர் தொடங்க உள்ளதாக, சபாநாயகர் அப்பாவு சில நாட்களுக்கு முன்பு அறிவித்து இருந்தார். முதல் நாள் மறைந்த எம்எல்ஏக்கள், பிரபலங்களுக்கு இரங்கல் குறிப்பு வாசிக்கப்படும் நிலையில், அதன் பின்னர் நடைபெறும் சட்டசபை அலுவல் ஆய்வுக் குழுக் கூட்டத்தில் கூட்டத்தொடர் எவ்வளவு நாட்கள் நடைபெறும் என்பது முடிவு செய்யப்படும்.

அமைச்சரவை கூட்டம்

இந்தச் சூழலில் இதற்கிடையே வரும் அக்.14ஆம் தேதி தமிழக அமைச்சரவை கூட்டம் நடைபெறும் என்று இப்போது அறிவிக்கப்பட்டு உள்ளது. முதல்வர் மு.க.ஸ்டாலின் தலைமையில் நடைபெறும் இந்த அமைச்சரவை கூட்டம், அக். 14 மாலை நடைபெற உள்ளது. இதில் சட்டசபை கூட்டத்தொடரில் விவாதிக்க உள்ள விஷங்கள் குறித்து அமைச்சரவையில் ஆலோசனை செய்யப்படும் என்று தெரிகிறது.

அறிக்கை

ஜெயலலிதா மரணம் குறித்து ஆய்வு செய்ய அமைக்கப்பட்ட ஆறுமுகசாமி ஆணையம், கடந்த சில வாரங்களுக்கு முன்பு, இறுதி அறிக்கையை முதல்வரிடம் தாக்கல் செய்து இருந்தது. 2017ஆம் ஆண்டும் செப்டம்பரில் ஆறுமுகசாமி ஆணையம் அமைக்கப்பட்ட நிலையில்,1,798 நாட்களுக்குப் பிறகு இறுதி அறிக்கை தாக்கல் செய்யப்பட்டது. அதேபோல தூத்துக்குடி துப்பாக்கிச் சூடு தொடர்பான நீதிபதி அருணா ஜெகதீசன் அறிக்கையும் அரசிடம் ஒப்படைக்கப்பட்டு உள்ளன.

மசோதா

இந்த இரு அறிக்கைகளும் வரும் சட்டசபை கூட்டத்தொடரில் தாக்கல் செய்யப்படும் என எதிர்பார்க்கப்படுகிறது. இதற்கான ஒப்புதலும் அமைச்சரவை கூட்டத்தில் பெறப்படும் எனத் தெரிகிறது. அதேபோல ஆன்லைன் சூதாட்டத்திற்கு இப்போது அவசரச் சட்டம் கொண்டு வரப்பட்டுள்ள நிலையில், இந்த சட்டசபை கூட்டத் தொடரில் நிரந்தர சட்டம் நிறைவேற்றப்படும் என்று தெரிகிறது.