கத்திப்பாரா சதுக்கம்.. போரூர் மெட்ரோ.. முதல்வர் ஸ்டாலின் அடுத்தடுத்து ஆய்வு.. பரபரக்கும் சென்னை

Updated: Friday, October 8, 2021, 13:45 [IST]

Subscribe to Oneindia Tamil

சென்னை: கத்திப்பாரா சதுக்கம் கட்டுமான பணிகள் தொடர்பாக இன்று முதல்வர் ஸ்டாலின் திடீரென நேரில் சென்று ஆய்வு மேற்கொண்டார்.

சென்னை கத்திப்பாரா மேம்பாலத்தின் கீழே கத்திப்பாரா நகர்புற சதுக்கம் என்ற கட்டுமான திட்டம் அமைக்கப்பட்டு வருகிறது.

14 கோடி ரூபாயில் அமைக்கப்பட்டுவரும் இந்த திட்டங்களை முதல்வர் முக ஸ்டாலின் இன்று காலை திடீரென நேரில் சென்று ஆய்வு செய்தார்.
அப்போது அங்கு பொருத்தப்பட்டிருந்த வரை படங்களை காண்பித்து அதிகாரிகள் முதல்வருக்கு திட்டப்பணிகள் தொடர்பாக விளக்கம் அளித்தனர்.

நகர்ப்புற சதுக்கம்

1.45 லட்சம் சதுர அடி பரப்பளவில் 14 கோடி ரூபாய் மதிப்பீட்டில் இந்த கத்திப்பாரா நகர்ப்புற சதுக்கம் அமைக்கப்பட உள்ள நிலையில் முதலமைச்சர் ஆய்வு செய்து வருகிறார். சென்னை கத்திப்பாரா மேம்பாலத்தின் கீழே அமைந்திருக்கக் கூடிய இந்த சதுக்கம், ஆலந்தூர் மெட்ரோ ரயில் நிலையத்திற்கு மிக அருகாமையில் அமைந்துள்ளது. ஆலந்தூர் மெட்ரோ ரயில் நிலையத்திற்கு வரும் பயணிகள் மற்றும் வெளியூரிலிருந்து கிண்டி மற்றும் கத்திபாரா பகுதியில் இறங்கக் கூடிய பயணிகள் இதை பயன்படுத்த வாய்ப்பு கிடைக்கும் என்பதால் இந்த சதுக்கம் உருவாக்கப்படுகிறது.

கடைகள், பூங்காக்கள்

1.45 லட்சம் சதுர அடியில் அமையும் இந்த சதுக்கத்தில் 56 கடைகள் , பூங்காக்கள், திறந்தவெளி உணவகங்கள் மற்றும் கழிவறைகள், வாகன நிறுத்துமிடம் போன்ற நவீன வசதிகள் அமைக்கப்படுகிறது. சென்னை சென்ட்ரல் ரயில் நிலையத்துக்கு எதிரே அமைக்கப்பட்டுள்ள சென்ட்ரல் சதுக்கத்தை போல கத்திபாரா சதுக்கம் அமைய இருக்கிறது. ஏறக்குறைய இங்கு கட்டுமான பணிகள் நிறைவடைந்து விட்டன. இந்த நிலையில்தான் முதல்வர் நேரடியாக அங்கு சென்று அதிகாரிகளிடம் விவரம் கேட்டுள்ளார்.

போரூர் மெட்ரோ ரயில்

இதைத்தொடர்ந்து போரூரில் நடைபெறும் சென்னை மெட்ரோ ரயில் விரிவாக்க பணிகளை பார்வையிடுவதற்காக கிளம்பி சென்றார் ஸ்டாலின். சென்னையில் அடுத்தடுத்து முக்கியமான கட்டுமான பணிகள் நடைபெறும் இடங்களில் முதல் முதல்வர் ஆய்வு நடத்தி வருவது கவனிக்கத் தக்கதாக இருக்கிறது.

உள் கட்டமைப்பு

சென்னையில் உள்கட்டமைப்பு வசதியை அதிகரிக்க வேண்டும் என்பதில் ஸ்டாலின் மிகுந்த கவனம் செலுத்தி வருகிறார். அதன் ஒரு பகுதியாக நேரடியாக அதிகாரிகளை சந்தித்து பணிகளை துரிதப்படுத்தி வருகிறார் என்கிறது அரசு வட்டார தகவல்.