TN Plus 2 results 2026: தமிழகத்தில் பிளஸ் 2 தேர்வு முடிவுகள் வெளியாவது எப்போது?

சென்னை: தமிழ்நாடு 12ஆம் வகுப்பு பொதுத்தேர்வு முடிவுகள் மே 8ஆம் தேதி வெளியிடப்படும் என்று பள்ளி கல்வித் துறை அறிவித்துள்ளது. இந்த நிலையில், மாணவ, மாணவிகளின் விடைத்தாள்களைத் திருத்தும் பணிகள் மாநிலம் முழுவதும் தற்போது தீவிரமாக நடைபெற்று வருகின்றன.

பிளஸ் 2 முடிவுகள் பற்றிய எதிர்பார்ப்பு மாணவர்கள் மற்றும் பெற்றோர்கள் மத்தியில் அதிகரித்துள்ளது.

மாநிலப் பாடத்திட்டத்தின் கீழ், 2025-26 கல்வி ஆண்டிற்கான 11 மற்றும் 12-ஆம் வகுப்பு பொதுத் தேர்வுகள் மார்ச் 2ஆம் தேதி தொடங்கி மார்ச் 27ஆம் தேதி வரை நடைபெற்றன. இந்தத் தேர்வுகளை எழுத மாநிலம் முழுவதிலும் இருந்து சுமார் 7,99,692 மாணவ, மாணவிகள் விண்ணப்பித்திருந்தனர். தேர்வுகள் நிறைவடைந்ததும், விடைத்தாள் திருத்தும் பணிகளைத் தேர்வுத் துறை உடனடியாகத் தொடங்கியது.

முதலில் ஏப்ரல் 9 முதல் ஏப்ரல் 20க்குள் பணிகளை முடிக்க அரசுத் தேர்வுகள் இயக்ககம் திட்டமிட்டது. இருப்பினும், நிர்ணயிக்கப்பட்ட தேதிக்கு முன்பாகவே, மார்ச் 6ஆம் தேதியன்று 89 மையங்களில் திருத்தும் பணிகள் தொடங்கின. ஏப்ரல் 20ஆம் தேதிக்குள் இப்பணிகள் அனைத்தையும் முடிக்குமாறு அதிகாரிகளுக்கு உத்தரவிடப்பட்டுள்ளது.

விடைத்தாள் திருத்தும் பணிகள் துரிதமாக நடைபெற்று வருவதால், திட்டமிட்ட தேதியை விட முன்னதாகவே முடிவுகள் வெளியாகுமா என்ற எதிர்பார்ப்பு மாணவ, மாணவிகள் மற்றும் பெற்றோர்களிடையே எழுந்துள்ளது.

ஒரு கல்வித்துறை அதிகாரி கூறுகையில், "12ஆம் வகுப்பு பொதுத்தேர்வு முடிவுகளை மே 8ஆம் தேதி வெளியிடவே பள்ளி கல்வித்துறை திட்டமிட்டுள்ளது" என்றார்.

இதேபோல், 11ஆம் வகுப்பு அரியர் தேர்வு முடிவுகள் மே 20ஆம் தேதி வெளியாகும் என அறிவிக்கப்பட்டுள்ளது. மே 4ஆம் தேதி சட்டமன்றத் தேர்தல் முடிவுகள் வெளியாக உள்ள நிலையில், முன்னதாகவே 12ஆம் வகுப்புத் தேர்வு முடிவுகளை வெளியிடுவது குறித்துத் தேர்வுத் துறை ஆலோசனை நடத்தி வருவதாகவும் தகவல்கள் தெரிவிக்கின்றன.

ஆனால், தற்போதைய நிலவரப்படி, மே 8ஆம் தேதியே முடிவுகள் வெளியிடப்படும். இதில் ஏதேனும் மாற்றங்கள் இருந்தால், அவை கல்வித் துறை சார்பில் முறையாக அறிவிக்கப்படும். தேர்வு முடிவுகள் வெளியானதும், மாணவர்கள் தங்களது பதிவு எண் மற்றும் பிறந்த தேதியைப் பயன்படுத்தி tnresults.nic.in மற்றும் dge.tn.gov.in ஆகிய இணையதளங்களில் மதிப்பெண்களை அறிந்து கொள்ளலாம்.

English summary

The Tamil Nadu School Education Department has announced that the Class 12 public examination results for 2026 will be released on May 8. Meanwhile, answer sheet evaluation work is progressing intensively across the state, with teachers engaged in correction duties at multiple centers. Students and parents are eagerly awaiting the results, as the final marks will play a crucial role in college admissions and future academic plans.