SC, ST வாக்குகளை அள்ளிய விஜய்.. ஸ்டாலினுக்கு எதிராக போன வன்னியர் வாக்குகள்! ஆக்சிஸ் மை இந்தியா சர்வே

சென்னை: தமிழக சட்டமன்றத் தேர்தல் 2026 முடிவடைந்துள்ள நிலையில், ஆக்சிஸ் மை இந்தியா (Axis My India) வெளியிட்டுள்ள எக்சிட் போல் முடிவுகள் தமிழக அரசியலில் பெரும் அதிர்வலைகளை ஏற்படுத்தியுள்ளன. குறிப்பாக, ஜாதி ரீதியான வாக்குப்பகிர்வு குறித்த தரவுகள் முன்னெப்போதும் இல்லாத வகையில் ஒரு புதிய அரசியல் மாற்றத்தை கோடிட்டுக் காட்டுகின்றன.

தமிழகத்தின் பாரம்பரியமான இருமுனைப் போட்டியைத் தகர்த்து, நடிகர் விஜய்யின் தமிழக வெற்றிக் கழகம் (TVK) மிகப்பெரிய சக்தியாக உருவெடுத்துள்ளதை இந்தத் தரவுகள் உறுதிப்படுத்துகின்றன. ஆக்சிஸ் மை இந்தியா வெளியிட்டுள்ள கருத்துக்கணிப்பில் தமிழகத்தில் தவெக ஆட்சியமைக்க வாய்ப்புள்ளதாக கூறப்பட்டுள்ளது. திமுக கூட்டணி 91 - 110 தொகுதிகளை கைப்பற்றும் என்று கூறப்பட்டுள்ளது. அதிமுக 22 - 32 தொகுதிகளில் வெற்றி பெறும் என்று கூறப்பட்டுள்ளது.

விஜய்யின் தவெக 98 -120 தொகுதிகளில் வெற்றி பெறுவார்கள் என்று சொல்லப்பட்டுள்ளது. வாக்கு சதவீத அடிப்படையில் திமுக, தவெக இரண்டு கட்சிகளும் 35 சதவீதம் வாக்கு பெறுவார்கள் என்று கூறப்பட்டுள்ளது. அதிமுக 23 சதவீதம் வாக்கு பெறுவார்கள் என்றும் ஆக்சிஸ் மை இந்தியா எக்ஸிட் போலில் கூறப்பட்டுள்ளது.

நாம் தமிழர் கட்சி 3 சதவீதம், மற்றவர்கள் 4 சதவீதம் வாக்கு பெறுவார்கள் என்றும் அந்தக் கருத்து கணிப்பில் கூறப்பட்டுள்ளது.

ஜாதி வாரியாகப் பிரித்துப் பார்க்கும்போது, ஒவ்வொரு சமூகமும் யாருக்கு ஆதரவு அளித்தது, யாரைப் புறக்கணித்தது என்பது குறித்த விரிவான அலசல் இதோ:

தலித் மற்றும் பழங்குடியின மக்களின் ஆதரவு (SC & ST)

தமிழகத்தின் மொத்த மக்கள் தொகையில் 20 சதவீதமாக உள்ள பட்டியல் சமூகத்தினர் (SC), பாரம்பரியமாக திமுக கூட்டணிக்கு வழங்கி வந்த ஆதரவில் ஒரு பெரும் சரிவு ஏற்பட்டுள்ளது. கடந்த 2021 தேர்தலோடு ஒப்பிடும்போது, திமுக கூட்டணி இந்தச் சமூகத்தில் 11 சதவீத வாக்குகளை இழந்துள்ளது. அதே சமயம், அதிமுக கூட்டணி இந்தச் சமூகத்திடம் 33 சதவீத வாக்குகளைப் பறிகொடுத்து மிக மோசமான பின்னடைவைச் சந்தித்துள்ளது. இந்த இரண்டு பெரிய கட்சிகளின் இழப்பும் தமிழக வெற்றிக் கழகத்திற்கு (TVK) மிகப்பெரிய லாபமாக மாறியுள்ளது. முதல் தேர்தலிலேயே 42 சதவீத எஸ்சி வாக்குகளைப் பெற்று, அந்தச் சமூகத்தின் முதன்மை விருப்பமாக டிவி கே உருவெடுத்துள்ளது.

அதேபோல், 1 சதவீத மக்கள் தொகை கொண்ட பழங்குடியின (ST) மக்களிடமும் டிவி கே 47 சதவீத வாக்குகளைப் பெற்றுள்ளது. திமுக கூட்டணி இங்கு 9 சதவீதத்தையும், அதிமுக கூட்டணி 31 சதவீத வாக்குகளையும் இழந்துள்ளன. இது விளிம்புநிலை மக்கள் மாற்றத்தை விரும்புவதைக் காட்டுகிறது.

ஓபிசி / எம்பிசி சமூகத்தின் நிலைப்பாடு

தமிழக அரசியலின் முதுகெலும்பாகக் கருதப்படும் இதர பிற்படுத்தப்பட்ட மற்றும் மிகவும் பிற்படுத்தப்பட்ட (OBC/MBC) சமூகத்தினர் (28%), இந்த முறை தங்கள் ஆதரவை சிதற விட்டுள்ளனர். இங்கு திமுக கூட்டணி 12 சதவீத வாக்குகளையும், அதிமுக கூட்டணி 21 சதவீத வாக்குகளையும் இழந்துள்ளன. ஆச்சரியப்படும் விதமாக, தமிழக வெற்றிக் கழகம் 36 சதவீத வாக்குகளைப் பெற்று இந்தச் சமூகத்திலும் முன்னிலை பெற்றுள்ளது. அதிமுக கூட்டணியில் பாமக போன்ற ஜாதி பலம் கொண்ட கட்சிகள் இருந்தபோதிலும், இந்தச் சமூகத்தின் வாக்குகள் புதிய கட்சியை நோக்கி நகர்ந்திருப்பது குறிப்பிடத்தக்கது.

சிறுபான்மையினரின் வாக்குகள் (முஸ்லிம் மற்றும் கிறிஸ்தவர்)

சிறுபான்மையின மக்களின் வாக்குகளைப் பொறுத்தவரை, திமுக கூட்டணி இன்னும் தனது பிடியைத் தக்கவைத்துக் கொண்டுள்ளது. 64 சதவீத முஸ்லிம் மக்கள் திமுக கூட்டணிக்கே வாக்களித்துள்ளனர். இருப்பினும், இங்கேயும் 9 சதவீத சரிவு ஏற்பட்டுள்ளது. தமிழக வெற்றிக் கழகம் 25 சதவீத முஸ்லிம் வாக்குகளைப் பெற்று அங்கும் கால் பதித்துள்ளது.

கிறிஸ்தவ சமூகத்தைப் (5%) பொறுத்தவரை, திமுக கூட்டணி 5 சதவீத வாக்குகளைக் கூடுதலாகப் பெற்று (53%) வலுவாக உள்ளது. ஆனால், அதிமுக கூட்டணி இங்கு 32 சதவீத வாக்குகளை இழந்து பெரும் வீழ்ச்சியைச் சந்தித்துள்ளது. டிவி கே இச்சமூகத்தில் 31 சதவீத வாக்குகளைப் பெற்று கவனிக்கத்தக்க முன்னேற்றத்தைக் கண்டுள்ளது.

பிராமண சமூகத்தின் வாக்கு வங்கி

9 சதவீத மக்கள் தொகை கொண்ட பிராமண சமூகத்தினர் வழக்கம் போல் அதிமுக கூட்டணிக்கு அதிக ஆதரவை (40%) வழங்கியுள்ளனர். இருப்பினும், கடந்த முறையை விட அங்கு 6 சதவீத சரிவு ஏற்பட்டுள்ளது. திமுக கூட்டணி இச்சமூகத்தில் 13 சதவீத வாக்குகளை இழந்து 28 சதவீதத்தையே பெற்றுள்ளது. இங்கு தமிழக வெற்றிக் கழகம் 20 சதவீத வாக்குகளைப் பெற்று ஒரு புதிய மாற்றத்தை உருவாக்கியுள்ளது. நாம் தமிழர் கட்சி (NTK) இச்சமூகத்தில் மட்டும் 1 சதவீத வாக்குகளைக் கூடுதலாகப் பெற்றுள்ளது.

ஒட்டுமொத்தப் பார்வை

இந்தத் தரவுகளின்படி, நாம் தமிழர் கட்சி (NTK) மற்றும் இதர கட்சிகள் பெரிய அளவில் வாக்கு சதவீதத்தை மாற்றவில்லை. ஆனால், தமிழக வெற்றிக் கழகம் அனைத்து ஜாதி மற்றும் மதப் பிரிவுகளிலும் மிகக் குறுகிய காலத்தில் ஊடுருவியுள்ளது தெளிவாகத் தெரிகிறது. குறிப்பாக எஸ்சி, எஸ்டி மற்றும் ஓபிசி வாக்குகளை டிவி கே பெருவாரியாகப் பறித்துள்ளது.

திமுக கூட்டணி தனது வாக்கு வங்கியை ஓரளவுக்குத் தக்கவைத்தாலும், அனைத்துச் சமூகங்களிலும் சரிவைச் சந்தித்துள்ளது. அதிமுக கூட்டணி அனைத்துச் சமூகங்களாலும் மிகக் கடுமையாகப் புறக்கணிக்கப்பட்டுள்ளதை இந்த எக்சிட் போல் முடிவுகள் காட்டுகின்றன. ஜாதி அரசியலைக் கடந்து 'மாற்றம்' என்ற ஒற்றைச் சொல்லின் கீழ் மக்கள் அணிதிரண்டிருப்பதை இந்த ஆய்வு முடிவுகள் பிரதிபலிக்கின்றன.

English summary

Tamil Nadu Exit Poll 2026: How Vijay's TVK Disrupted the Traditional Caste Vote Banks