டி.டி.வி. தினகரனின் வலது கரம்.. முன்னாள் அமைச்சர் பழனியப்பன் தி.மு.க.வில் இணைந்தார்!

Updated: Saturday, July 3, 2021, 21:09 [IST]

Subscribe to Oneindia Tamil

சென்னை: முன்னாள் அமைச்சரும், அ.ம.மு.க துணை பொதுச் செயலாளருமான பழனியப்பன் இன்று தி.மு.க.வில் சென்னை அண்ணா அறிவாலயத்தில் தமிழ்நாடு முதல்வரும், தி.மு.க. தலைவருமான மு.க.ஸ்டாலின் முன்னிலையில் தி.மு.க.வில் இணைந்தார்.

அ.ம.மு.க பொதுச் செயலாளர் டி.டி.வி தினகரனுக்கு வலது கரமாக செயல்பட்ட பழனியப்பன். மேலும் சசிகலாவுக்கு தீவிர விசுவாசியாகவும் விளங்கி வந்தார்.

தினகரனின் வலது கரம்

டி.டி.வி தினகரன் மீது அதிருப்தி கொண்ட பழனியப்பன் தி.மு.க.வில் விரைவில் இணைய உள்ளார் என்று தகவல்கள் பரவி வந்த நிலையில் இன்று அந்த செய்தி உறுதியாகியுள்ளது. அ.தி.மு.க.வில் ஜெயலலிதா ஆட்சியின்போது உயர்கல்வித் துறை அமைச்சராக இருந்தவர் பழனியப்பன். ஆனால் ஜெயலலிதா மறைவுக்கு பிறகு டி.டி.வி. தினகரன் பக்கம் சாய்ந்து சசிகலாவுக்கு ஆதரவு கொடுத்தார்.

தினகரனுக்கு அதிர்ச்சி

இதனால் தகுதி நீக்கம் செய்யப்பட்டார். அ.ம.மு.க.வில் இருந்து பலரும் வெளியேறி சென்று கொண்டிருந்த நிலையில் அ.ம.மு.க பொதுச் செயலாளர் டி.டி.வி தினகரனுக்கு வலது கரமாக செயல்பட்டு அவருக்கு ஆலோசனை கொடுத்து வந்தார் பழனியப்பன். தற்போது இவரும் தி.மு.க.வில் இணைந்துள்ளது டி.டி.வி தினகரனுக்கு அதிர்ச்சியை கொடுத்துள்ளது.

தள்ளாடும் அ.தி.மு.க

அ.தி.மு.க தலைமை ஏற்கனவே தள்ளாடி வரும் நிலையில் சசிகலாவும், அ.தி.மு.க தொண்டர்களுடன் தொடர்ந்து பேசி கூடுதல் நெருக்கடியை கொடுத்து வருகிறார். தேர்தலில் படுதோல்வியால் அ.ம.மு.க.வும் ஒரு பக்கம் தவியாய் தவித்து வருகிறது. இதனை சாதமாக பயன்படுத்திக் கொள்ளும் மு.க.ஸ்டாலின் அ.தி.மு.க, அ.ம.மு.க. முக்கிய நிர்வாகிகளை தி.மு.க. பக்கம் தொடர்ந்து இழுத்து வருகிறார்.

ஸ்டாலினுக்கு இருக்கும் வரவேற்பு

சசிகலா உடன் தொலைப்பேசியில் பேசியதாக அ.தி.மு.க.வில் இருந்து நீக்கப்பட்ட நிர்வாகிகள் மற்றும் முன்னாள் எம்.எல்.ஏ.க்கள் மாரியப்பன் கென்னடி, ஜெயந்தி பத்மநாபன்,டேவிட் செல்வன் உள்பட 20 பேர் கடந்த வாரம் தி.மு.க.வில் இணைந்தனர். முதல்வர் மு.க.ஸ்டாலின் செயல்படுத்தும் திட்டங்களை மக்களிடம் மட்டுமின்றி பா.ம.க உள்ளிட்ட எதிர்கட்சிகளிடமும் நல்ல வரவேற்பு பெற்றுள்ளது. அடுத்த சட்டசபை தேர்தலையும் குறிவைத்து மு.க.ஸ்டாலின் காய் நகர்த்தி வருவதால் அ.தி.மு.க, அ.ம.மு.க.வினர் தி.மு.க.வில் இணைந்து வருவது குறிப்பிடத்தக்கது.