மாத ஊதியம் ரூ.35 ஆயிரத்துக்குள் இருக்கா.. தமிழக அரசு தரும் 12000 நிதியுதவி.. எப்படி விண்ணப்பிப்பது?

கோவை: தொழிலாளர்களின் குழந்தைகளின் கல்வி உதவித்தொகைக்காக டிசம்பர் மாதம் 31-ந்தேதிக்குள் விண்ணப்பிக்குமாறு தொழிலாளர் நலத்துறை கேட்டுக்கொண்டுள்ளது. பிரி கேஜி முதல் பட்ட மேற்படிப்பு வரை படிக்கும் தொழிலாளர்களின் குழந்தைகளுக்கு ரூ.1,000 முதல் ரூ.12 ஆயிரம் வரை கல்வி உதவித்தொகை தொழிலாளர் நல நிதி செலுத்தும் தொழிலாளர்கள் மற்றும் அவரை சார்ந்தவர்களுக்கு வாரியத்தின் மூலம் வழங்கப்படுகிறது.

தமிழக அரசின் தெழிலாளர் நலத்துறை வெளியிட்டுள்ள அறிவிப்பில் கூறியுள்ளதாவது: "தமிழ்நாடு தொழிலாளர் நல நிதி சட்டத்தின்படி தொழிற்சாலைகள், கடைகள், மோட்டார் போக்குவரத்து நிறுவனங்கள், உணவு நிறுவனங்கள் மற்றும் தோட்ட நிறுவனங்கள் போன்ற அமைப்பு சார்ந்த நிறுவனங்களில் பணிபுரியும் தொழிலாளர்களுக்கு ஒவ்வொரு ஆண்டும் தொழிலாளர் மற்றும் நிறுவனத்தின் பங்காக ஒவ்வொரு தொழிலாளிக்கும் ரூ.60 என கணக்கிட்டு நிறுவனத்தில் பணிபுரியும் தொழிலாளர்களின் எண்ணிக்கைக்கு ஏற்ப தொழிலாளர் நல நிதி தொகையினை வாரியத்துக்கு செலுத்த வேண்டும். அதன்படி 2024-ம் ஆண்டிற்கான தொழிலாளர் நல நிதியினை அடுத்த ஆண்டு ஜனவரி 31-ந்தேதிக்குள் செலுத்த வேண்டும்.

தொழிலாளர் நல நிதி செலுத்தும் தொழிலாளர்கள் மற்றும் அவரை சார்ந்தவர்களுக்கு வாரியத்தின் மூலம் பல்வேறு நலதிட்டங்கள் செயல்படுத்தப்பட்டு வருகிறது. இந்த நிதி மூலம் பிரி கேஜி முதல் பட்ட மேற்படிப்பு வரை படிக்கும் தொழிலாளர்களின் குழந்தைகளுக்கு ரூ.1,000 முதல் ரூ.12 ஆயிரம் வரை கல்வி உதவித்தொகை, பாடநூல் வாங்க உதவித்தொகை, 10 மற்றும் பிளஸ்-2 பொதுத்தேர்வுகளில் அதிக மதிப்பெண் பெற்ற மாணவர்களுக்கு கல்வி ஊக்கத்தொகை ஆகிய திட்டங்களுக்கு தொழிலாளர்களிடம் இருந்து விண்ணப்பங்கள் வரவேற்கப்படுகிறது. இந்த உதவி தொகையை பெற தொழிலாளர்களின் மாத ஊதியம் ரூ.35 ஆயிரத்துக்குள் இருக்க வேண்டும். விண்ணப்பங்கள் வாரியத்துக்கு வந்து சேர வேண்டிய கடைசிநாள் டிசம்பர் 31-ந் தேதி ஆகும்.

விண்ணப்பங்களை தமிழ்நாடு தொழிலாளர் நல வாரிய அலுவலகத்தில் நேரிலோ அல்லது www.lwbtn.gov.in என்ற இணையதளத்திலோ பதிவிறக்கம் செய்து கொள்ளலாம். பூர்த்தி செய்யப்பட்ட விண்ணப்பங்கள் செயலாளர், தமிழ்நாடு தொழிலாளர் நல வாரியம் சென்னை-6 என்ற முகவரிக்கு அனுப்பி வைக்க வேண்டும்" இவ்வாறு அதில் கூறப்பட்டுள்ளது.

English summary

The Department of Labor Welfare has asked to apply by December 31 for the educational allowance for the children of workers. Children of laborers studying ( கல்வி உதவித்தொகை தொழிலாளர் நல வாரியம் ) from Pre-KG to Post-Graduation will get Rs 1,000 to Rs 12,000 stipend.