திருவையாறு தொகுதியில் யாருக்கு சீட்? சீனியருக்கு டஃப் தரும் ஜூனியர்!
தஞ்சை: தஞ்சை மாவட்டம் திருவையாறு தொகுதியில், திமுக சார்பில் வேட்பாளராக களமிறங்க பலரும் முட்டி மோதுவதால் இப்போதே அங்கு தேர்தல் களம் சூடுபிடித்துள்ளது.
சிவாஜி கணேசன்
தமிழ்நாட்டின் மற்ற சட்டமன்றத் தொகுதிகளை காட்டிலும் திருவையாறு தொகுதிக்கென்று தனிப்பெரும் வரலாறு ஒன்று உள்ளது. அந்த வகையில் நடிகர் திலகம் சிவாஜி கணேசனையே 1989ஆம் ஆண்டு நடைபெற்ற சட்டமன்றத் தேர்தலில் தோற்கடித்த தொகுதி திருவையாறு ஆகும். அன்று சிவாஜி கணேசனை திருவையாறில் தோற்கடித்த துரை சந்திரசேகரன் இன்றும் அதே தொகுதியில் எம்.எல்.ஏ.வாக உள்ளார்.
சீனியர் Vs ஜீனியர்
திமுக சார்பில் 7 முறை போட்டியிட்டு 5 முறை சட்டமன்ற உறுப்பினராக வென்ற துரை சந்திரசேகரன், திமுகவில் சீனியர் மாவட்டச் செயலாளராகவும் உள்ளார். மாவட்டச் செயலாளராகவும், கால் நூற்றாண்டுக் கால எம்.எல்.ஏ.வாகவும் இருக்கும் இவர் வரும் 2026 சட்டமன்றத் தேர்தலிலும் மீண்டும் சீட் எதிர்பார்க்கிறார். இந்நிலையில் திமுக இளைஞரணி மாவட்ட அமைப்பாளர் முகில் வேந்தன் திருவையாறு தொகுதியில் களமிறங்க கடும் முயற்சியில் ஈடுபட்டு வருகிறார்.
சீட் ரேஸ்
உதயநிதி ஸ்டாலின் கோட்டாவில் திமுக இளைஞரணிக்கு 40 சீட் ஒதுக்கப்படும் என எதிர்பார்க்கப்படும் நிலையில், அதில் திருவையாறு தொகுதியும் உள்ளடங்கும் எனக் கூறப்படுகிறது. இதனால் உதயநிதி ஸ்டாலினின் குட்புக்கில் இடம்பிடித்துள்ள முகில் வேந்தன் சீட் ரேஸில் முந்துகிறார். புத்தகப் பதிப்பகம், கல்வி நிலையம் உள்ளிட்ட தொழிலில் முகில்வேந்தன் குடும்பத்தினர் ஈடுபட்டு வருவதால் தொகுதிக்குள்ளும் ஓரளவு செல்வாக்கு உள்ளதாக கூறப்படுகிறது. இதேபோல் பூதலூர் சேர்மன் கல்லணை செல்லக்கண்ணு, களிமேடு செல்வம், உள்ளிட்ட இன்னும் சிலரும் எப்படியும் இந்த முறை சீட் வாங்கிவிட வேண்டும் என காய் நகர்த்துகிறார்கள் என்பது குறிப்பிடத்தக்கது.
- அர்ஷத் கான்
Click it and Unblock the Notifications
Sign in with Google