நாளை மழையிருக்காது.. மண்டே லீவு கிடைக்காது.. ஆனாலும் ஸ்கூல் பசங்களுக்கு குட் நியூஸ் சொன்ன வெதர்மேன்

சென்னை: சென்னை உள்பட வட தமிழகத்திலிருந்து தெற்கு ஆந்திரம் வரை வரும் 21 ஆம் தேதி முதல் 24 ஆம் தேதி வரை குறைந்தபட்சம் ஒரு நாளாவது கனமழை பெய்ய வாய்ப்புள்ளது என தமிழ்நாடு வெதர்மேன் பிரதீப் ஜான் தெரிவித்துள்ளார்.

இதுகுறித்து அவர் தனது பேஸ்புக் பக்கத்தில் கூறியிருப்பதாவது: வடதமிழகம்- தெற்கு ஆந்திரம் இடையே வரும் 21 ஆம் தேதி முதல் நல்ல மழை பெய்யும் என எதிர்பார்க்கப்படுகிறது.

சென்னை உள்பட வட தமிழகம் அல்லது தெற்கு ஆந்திரா மேல் மேற்கு நோக்கி வீசும் காற்று நிலவுகிறது. இதனால் வரும் 21 ஆம் தேதி முதல் 24 ஆம் தேதி வரை குறைந்தபட்சம் ஏதாவது ஒரு நாள் கனமழை பெய்ய வாய்ப்பிருக்கிறது.

மழை பெய்யும்

மற்ற நாட்களில் விட்டுவிட்டு மழை பெய்யும். தென் மாவட்டங்கள் மற்றும் கொங்கு மண்டலத்தினருக்கு ஆங்காங்கே மழை பெய்ய வாய்ப்புள்ளது என பிரதீப் ஜான் தெரிவித்துள்ளார். இதுகுறித்து அவருடைய இன்னொரு பதிவில் கூறியிருப்பதாவது: வங்கக் கடலில் நிலை கொண்டு குறைந்த காற்றழுத்த பகுதியானது தீவிரமடைய வறண்ட காற்றும் ஈரக்காற்றும் ஒரு இடத்தில் மோதி கொண்டன.

வறண்ட காற்று

அப்போது வறண்ட காற்றே வெற்றி பெற்றது. வறண்ட காற்றுடன் குறைந்த காற்றழுத்தம் கடுமையாக போராடியது. எனினும் தீவிரமடைய முடியவில்லை. எனவே 20-ஆம் தேதி அதிக அளவுக்கு மழை இருக்காது. எனவே 21 ஆம் தேதி மழை பெய்யும் என எதிர்பார்க்கப்படுகிறது. வட தமிழக கடலோரத்தில் அடுத்த 3 முதல் 4 நாட்களுக்கு குறைந்த காற்றழுத்தம் நிலவும்.

சென்னை உள்பட வடதமிழகம்

இந்த குறைந்த காற்றழுத்தத்தால் சென்னை உள்பட வடதமிழகத்தின் கடலோர மாவட்டங்களுக்கு வரும் 21 ஆம் தேதி முதல் 24 ஆம் தேதி வரை 4 நாட்களுக்கு விட்டு விட்டு மேகக் கூட்டங்களை உருவாக்கும். தென் தமிழகத்தில் வரும் 25 ஆம் தேதி முதல் 28 ஆம் தேதி வரை கனமழை பெய்யும். வட தமிழக உள்மாவட்டங்கள் மற்றும் பெங்களூர் பகுதிகளில் வரும் 22 அல்லது 23 ஆம் தேதி மழை பெய்ய வாய்ப்புள்ளது.

மழையில்லை

ஞாயிற்றுக்கிழமை மழையில்லை என்பதால் திங்கள்கிழமை பள்ளிகளுக்கு விடுமுறை கிடைக்காது என்பதால் பள்ளி மாணவர்கள் ஏமாற்றமடைந்துள்ளார்கள். எனினும் நம்பிக்கையை இழக்க வேண்டாம். செவ்வாய்க்கிழமை முதல் வியாழக்கிழமை வரை குறைந்தது ஒரு நாளாவது லீவு கிடைக்கும். ஆனால் லீவு வரலைன்னா என்னை கேட்க கூடாது என்றும் பிரதீப் ஜான் தெரிவித்துள்ளார்.

English summary

Tamilnadu Weatherman updates about North Tamilnadu rain and South Andhra Pradesh will get good rains from Nov 21st (பள்ளிகளுக்கு விடுமுறை கிடைக்கும்).