TASMAC: ’பாட்டிலுக்கு 10 ரூபாய்’ வசூல் இல்லை.. ஆட்சி மாறியதும் காட்சி மாறிடுச்சு! மதுப்பிரியர்கள் உற்சாகம்

சென்னை: நீண்ட நாட்களாகவே டாஸ்மாக் மதுபான கடைகளில் குவாட்டர் பாட்டிலுக்கு 10 ரூபாய் கூடுதலாகவும், பீர் பாட்டில்களுக்கு கூடுதலாக 20 ரூபாயும் வாங்கப்படுவதாக புகார்கள் வந்தபடி இருந்தன. ஆனால் விஜய் முதல்வர் ஆன பிறகு பல மதுபான டாஸ்மாக் கடைகளில் எக்ஸ்ட்ரா பணம் வாங்கப்படவில்லை என மதுப்பிரியர்கள் உற்சாகத்துடன் தெரிவித்து வருகிறார்கள்.

தமிழக முதல்வராக பதவியேற்றுள்ள விஜய் சட்டம் ஒழுங்கை பாதுகாப்பது மற்றும் போதைப் பொருள் தடுப்பு நடவடிக்கைகளை தீவிரப்படுத்தியுள்ளார். முக்கிய நடவடிக்கையாக இன்று கல்வி நிறுவனங்கள் மற்றும் பேருந்து நிலையங்கள் அருகே உள்ள 717 மதுக்கடைகளை மூடவும் விஜய் அதிரடி உத்தரவிட்டுள்ளார்.

அதன்படி இன்று 50 மதுபானக் கடைகள் மூடப்பட்டன. இந்த செய்தியினை பார்த்து பெண்கள் பலரும் உற்சாகமடைந்தனர். விஜய்க்கு நன்றி தெரிவித்தனர். அதே நேரத்தில் நேற்று மாலையிலேயே விஜய் இந்த நடவடிக்கையை எடுக்க உள்ளதாக தகவல் பரவியது. அப்போது மதுபானக் கடைகளில் கூடுதலாக ரூ.10 வாங்கும் பழக்கமும் இருந்து வருகிறது. அதன் மீதும் நடவடிக்கை எடுக்க வேண்டும் என புகார்கள் வைக்கப்பட்டன.

தமிழ்நாட்டில் டாஸ்மாக் கடைகளில் நீண்டகாலமாக நிலவும் பாட்டிலுக்கு 10 ரூபாய் வசூலிப்பது தொடர்பான பிரச்சனையை விஜய் ஆட்சியாலவது சரி செய்யப்படுமா என சில மதுப்பிரியர்கள் கேள்வி கேட்டு ரீஸ்ல் வெளியிட்டு வந்தனர். இந்த நிலையில் இன்று பெரும்பாலான கடைகளில் பாட்டிலுக்கு எம்ஆர்பியை தாண்டி கூடுதல் ரூபாய் வசூலிக்கப்படவில்லை என கூறப்படுகிறது.

அதாவது வழக்கமாக குவார்ட்டர் பாட்டில் ஒன்றுக்கு ரூ.10 கூடுதலாக வாங்கப்பட்டு வந்ததாகவும், பீர் பாட்டில்களுக்கு கூடுதலாக ரூ.20 வரை வாங்கப்பட்டதாகவும் ஆனால் இப்போது இந்த கூடுதல் ரூபாய் இன்றி மதுபானம் வாங்க முடிந்ததாக மதுப்பிரியர்கள் தெரிவித்தனர். அதேசமயம் ஒரு சில மதுபான கடைகளில் கூடுதல் பணம் வசூலிக்கப்படுவதாகவும் சொல்லப்படுகிறது.

இது ஒரு புறம் இருக்க இன்று பல்வேறு இடங்களில் திடீரென டாஸ்மாக் மதுபான கடைகள் மூடப்பட்டதால் காலையில் மதுவாங்குவதற்காக சென்ற மதுப்பிரியர்கள் ஏமாற்றமடைந்தனர். கடை திறக்க நேரம் ஆகிவிட்டதோ என 1 மணி நேரத்திற்கு மேல் காத்திருந்ததாகவும், அதற்கு பிறகே கடை மூடப்பட்டதாக தங்களுக்கு தெரிந்ததாகவும் மதுப்பிரியர்கள் கூறினர்.

English summary

TASMAC: Liquor consumers in Tamil Nadu claim many TASMAC outlets have stopped collecting extra charges after Vijay became Chief Minister, ending long-standing complaints over unofficial “extra” fees on liquor bottles.