முதலமைச்சர் விஜய்க்கு இசட் பிளஸ் பாதுகாப்பு.. எப்படி இருக்கும்? அரணாக நிற்கும் கமாண்டோக்கள்!
சென்னை: முதலமைச்சராக விஜய் தேர்வு செய்யப்பட்டிருக்கும் நிலையில், அவருக்கு இசட் பிளஸ் பாதுகாப்பு வழங்கப்பட்டுள்ளது. இசட் பிளஸ் பாதுகாப்பு என்றால் என்ன? என்பது குறித்து விரிவாக பார்ப்போம்.
இந்தியாவில் ஒரு குடிமகனுக்கு வழங்கப்படும் மிக உயரிய பாதுகாப்பு அடுக்குகளில் இதுவும் ஒன்று. இசட் பிளஸ் பாதுகாப்பை மீறுவது அவ்வளவு லேசுபட்ட காரியம் கிடையாது.
இசட் பிளஸ் பாதுகாப்பு
இசட் பிளஸ் பிரிவில் மொத்தம் 55 பாதுகாப்பு வீரர்கள் சுழற்சி முறையில் பணியில் இருப்பார்கள். இதில் சுமார் 10க்கும் மேற்பட்ட உயர்தர கமாண்டோக்கள் இருப்பார்கள். தமிழ்நாட்டைப் பொறுத்தவரை, மாநிலக் காவல்துறையின் பாதுகாப்புப் பிரிவு மற்றும் முதலமைச்சர் பாதுகாப்புப் பிரிவு வீரர்கள் இதில் முக்கியப் பங்கு வகிப்பார்கள்.
பாதுகாப்பு வளையங்கள்
இது பல அடுக்குகளைக் கொண்ட பாதுகாப்பாகும். முதலமைச்சரைச் சுற்றியே இருக்கும் கமாண்டோக்கள்தான் முதல் வளையம். இவர்கள் எப்போதும் நவீன ரகத் துப்பாக்கிகளுடன் தயார் நிலையில் இருப்பார்கள்.
முதல் வளையத்தில் இருக்கும் கமாண்டோக்களின் பயிற்சி என்பது எதிர்பாராததை எதிர்பார் என்ற அடிப்படையில் அமைந்தது. கூட்ட நெரிசலில் யாராவது திடீரென முதலமைச்சரை நோக்கிப் பாய்ந்தால், ஆயுதத்தைப் பயன்படுத்துவதற்கு முன்பே தங்கள் உடல் பலத்தால் அவரைத் தடுத்து நிறுத்துவார்கள். துப்பாக்கிச் சூடு அல்லது கத்திக்குத்து போன்ற முயற்சிகள் நடந்தால், ஒரு நொடிக்கும் குறைவான நேரத்தில் எதிர் தாக்குதல் நடத்தி அச்சுறுத்தலைச் செயலிழக்கச் செய்வார்கள்.
கமாணடோக்களின் பணி
ஒருவேளை குண்டுவெடிப்பு அல்லது துப்பாக்கிச் சூடு நடந்தால், தங்கள் உயிரைப் பொருட்படுத்தாமல் முதலமைச்சரைச் சூழ்ந்து கொண்டு அவரை மறைப்பார்கள். இதற்காகவே இவர்கள் குண்டு துளைக்காத கவச உடைகளை அணிந்திருப்பார்கள். ஆபத்து நேரும்போது முதலமைச்சரை எப்படிப் பாதுகாப்பாக அந்த இடத்திலிருந்து வெளியேற்றி, பாதுகாப்பான இடத்திற்கு அழைத்துச் செல்ல வேண்டும் என்பதில் இவர்கள் கைதேர்ந்தவர்கள்.
தகவல் பரிமாற்றம்
கமாண்டோக்கள் ஒருபோதும் ஒரே திசையைப் பார்க்க மாட்டார்கள். ஒவ்வொருவரும் ஒரு திசையைப் பார்த்தபடி ஒரு வட்டமான பாதுகாப்பை உருவாக்குவார்கள். நீங்கள் ஒருவரைக் கவனிக்கும்போது, மற்றொருவர் உங்களைக் கவனித்துக் கொண்டிருப்பார். இவர்களது காதுகளில் இருக்கும் சிறிய கருவி மூலம் கட்டுப்பாட்டு அறையுடனும் மற்ற வளையங்களுடனும் நொடிக்கு நொடி தகவல்களைப் பகிர்ந்து கொள்வார்கள். ஒரு சிறிய சந்தேகம் வந்தாலும் ஒட்டுமொத்தப் பாதுகாப்பும் உஷாராகிவிடும்.
சீருடை அணியாத மற்றும் சீருடை அணிந்த மாநிலப் போலீஸ் அதிகாரிகள் இரண்டாம் வளையம். முதலமைச்சர் செல்லும் இடத்தைச் சுற்றியுள்ள உள்ளூர் போலீஸ் பாதுகாப்பு வெளிப்புற வளையமாகும்.
பாதுகாப்பு வாகன அணிவகுப்பு
முதலமைச்சர் ஒரு இடத்திற்குச் செல்லும்போது, ஒரு பெரிய வாகன அணிவகுப்பு பின் தொடரும். முன்னோடி வாகனம் பாதையைச் சீர் செய்ய முன்னால் செல்லும். முதலமைச்சர் பயணிக்கும் கார் குண்டு துளைக்காத மற்றும் கண்ணிவெடிகளால் பாதிக்கப்படாத வகையில் வடிவமைக்கப்பட்டிருக்கும்.
முதலமைச்சர் எந்தக் காரில் இருக்கிறார் என்பதைத் தாக்குதல் நடத்துவோர் கணிக்க முடியாதபடி, அதே நிறம் மற்றும் அதே மாடல் கொண்ட ஒன்று அல்லது இரண்டு கார்கள் அணிவகுப்பில் இருக்கும்.
டீம் ஒர்க்
இந்த அணிவகுப்பில் ஜாமர் வாகனமும் இருக்கும். இது ஒரு முக்கியமான வாகனம். இது சுமார் 100 மீட்டர் சுற்றளவில் உள்ள மொபைல் சிக்னல்கள் மற்றும் ரிமோட் மூலம் இயக்கப்படும் வெடிகுண்டுகளின் சிக்னல்களைச் செயலிழக்கச் செய்யும். அணிவகுப்பின் கடைசியில் ஒரு அதிநவீன ஆம்புலன்ஸ் எப்போதும் தயாராக இருக்கும்.
முதலமைச்சர் ஒரு பொதுக்கூட்டத்திற்கோ அல்லது நிகழ்ச்சிக்கோ செல்வதற்கு 24 மணி நேரத்திற்கு முன்பே, அந்த இடத்தை கமாண்டோக்கள் தங்கள் கட்டுப்பாட்டில் எடுப்பார்கள். வெடிகுண்டு கண்டறியும் நிபுணர்கள் மற்றும் மோப்ப நாய்கள் மூலம் அந்த இடம் முழுமையாகச் சோதிக்கப்படும். உணவுப் பாதுகாப்பு அதிகாரிகள் முதலமைச்சர் உட்கொள்ளும் உணவை முன்கூட்டியே பரிசோதிப்பார்கள்.
கோட்டையாக மாறும் இல்லம்
முதலமைச்சரின் இல்லம் ஒரு கோட்டை போல மாற்றப்படும். வீட்டைச் சுற்றி 24 மணி நேரமும் ஆயுதம் ஏந்திய கமாண்டோக்கள் காவல் இருப்பார்கள். வீட்டிற்கு வரும் ஒவ்வொரு பார்வையாளரும் தீவிர சோதனைக்குப் பிறகே அனுமதிக்கப்படுவார்கள்.
இசட் பிளஸ் பாதுகாப்பு என்பது வெறும் ஆட்களின் எண்ணிக்கை மட்டுமல்ல; அது ஒரு தொழில்நுட்ப ரீதியான, திட்டமிடப்பட்ட பாதுகாப்பு அரண் ஆகும். முதலமைச்சரின் ஒவ்வொரு அசைவும் மிக நுணுக்கமாகக் கண்காணிக்கப்படும்.
Click it and Unblock the Notifications
Sign in with Google