அதிமுக வாக்குகளை அப்படியே அள்ளும் விஜய்.. தவெக சத்தமின்றி நடத்தும் சர்ஜிக்கல் ஸ்ட்ரைக்.. திமுக குஷி?

Updated: Tuesday, January 27, 2026, 16:57 [IST]

Subscribe to Oneindia Tamil

சென்னை: தமிழக அரசியல் களம் 2026 தேர்தலை நோக்கி மிக வேகமாக நகர்ந்து வரும் நிலையில், கொங்கு மண்டலத்தில் ஒரு சுவாரஸ்யமான சூழல் உருவாகியுள்ளது. மாநிலத்தின் பெரும்பாலான மண்டலங்களில் தேசிய ஜனநாயகக் கூட்டணி (NDA) மூன்றாவது இடத்திற்குத் தள்ளப்படும் நிலையில், கொங்கு மண்டலம் மட்டும் அதற்கு ஒரு விதிவிலக்காக உள்ளது.

இருப்பினும், இந்த ஒட்டுமொத்தப் போக்கும் இறுதியில் தி.மு.க கூட்டணியின் வெற்றிக்கே வழிவகுப்பதாக அரசியல் நோக்கர்கள் கருதுகின்றனர். பல தொகுதிகளில் இரண்டாவது இடத்தைப் பிடிக்க விஜய்க்கும் அ.தி.மு.க-விற்கும் இடையே தான் போட்டி நடப்பதாக அரசியல் நோக்கர்கள் கருதுகிறார்கள்.

கொங்கு மண்டலம்: கடந்த காலத் தரவுகள்

கொங்கு மண்டலம் (கோவை, திருப்பூர், ஈரோடு, சேலம், நாமக்கல்) எப்போதும் அ.தி.மு.க-வின் இரும்புக்கோட்டையாகவே இருந்துள்ளது.

2016 தேர்தல்: ஜெயலலிதா தலைமையிலான அ.தி.மு.க இந்த மண்டலத்தில் உள்ள 57 தொகுதிகளில் சுமார் 45 இடங்களைக் கைப்பற்றி ஆட்சியைத் தக்கவைத்தது.

2021 தேர்தல்: தி.மு.க ஆட்சியைப் பிடித்தாலும், கொங்கு மண்டலத்தில் அ.தி.மு.க-பா.ஜ.க கூட்டணி தனது ஆதிக்கத்தைத் தக்கவைத்துக் கொண்டது. இக்கூட்டணி 33 இடங்களை வென்ற நிலையில், தி.மு.க கூட்டணியால் 24 இடங்களை மட்டுமே பெற முடிந்தது.

தற்போதைய 2026 சூழலில், அ.தி.மு.க-பா.ஜ.க (NDA) கூட்டணி இந்த மண்டலத்தில் மட்டும் இரண்டாவது இடத்தைப் பிடிக்கப் போராடுகிறது. ஆனால், மற்ற மண்டலங்களில் விஜய்யின் தமிழக வெற்றிக் கழகம் (தவெக), அ.தி.மு.க-வை பின்னுக்குத் தள்ளிவிட்டு தி.மு.க-விற்கு நேரடிப் போட்டியாளராக உருவெடுத்துள்ளது என்றும் அரசியல் வல்லுனர்கள் கணிக்கின்றனர்..

விஜய்யின் வருகை: தி.மு.க-விற்கு 'கிடைத்த வரம்'?

உண்மையில், விஜய்யின் அரசியல் பிரவேசத்திற்கு தி.மு.க தான் நன்றி சொல்ல வேண்டும். ஒரு இருமுனைப் போட்டியில், அரசுக்கு எதிரான அதிருப்தி வாக்குகள் அனைத்தும் பிரதான எதிர்க்கட்சியான அ.தி.மு.க-விற்குச் சென்றிருக்கும். ஆனால், விஜய்யின் வருகை அந்த 'எதிர்ப்பு வாக்குகளை' இரண்டாகப் பிரிக்கிறது.

வாக்குச் சிதறல்: விஜய்யின் தவெக சுமார் 15% முதல் 20% வாக்குகளைப் பிரிக்கும் பட்சத்தில், அது தி.மு.க-வின் வெற்றிக்கான இலக்கை மிக எளிதாக்கும் என்றும் அரசியல் வல்லுனர்கள் கணிக்கின்றனர்.

இரண்டாவது இடத்திற்கான போட்டி: பல தொகுதிகளில் இரண்டாவது இடத்தைப் பிடிக்க விஜய்க்கும் அ.தி.மு.க-விற்கும் இடையே தான் போட்டி நடக்கிறது. இது தி.மு.க கூட்டணியின் பலமான 38% வாக்கு வங்கியை எவராலும் அசைக்க முடியாத ஒன்றாக மாற்றியுள்ளது.

தி.மு.க கூட்டணியின் பலம்

காங்கிரஸ், இடதுசாரிகள், விசிக மற்றும் மதிமுக எனத் தனது 2021 கூட்டணியைச் சிதையாமல் பாதுகாத்து வரும் தி.மு.க, மிகவும் வலுவான நிலையில் உள்ளது. கொங்கு மண்டலத்தைப் பொறுத்தவரை, அ.தி.மு.க-வின் மூத்த தலைவரான கே.ஏ. செங்கோட்டையன் போன்றவர்களின் வெளியேற்றம் அ.தி.மு.க-வை பலவீனப்படுத்தியுள்ளது.

அதேசமயம், விஜய் தனது கட்சிக்கு 'விசில்' சின்னத்தைப் பெற்று இளைஞர்களை ஈர்த்தாலும், அது தி.மு.க-வின் வெற்றியைத் தடுப்பதைக் காட்டிலும், எதிர்க்கட்சி வாக்குகளைச் சிதைப்பதிலேயே அதிகம் முடிகிறது. 'இலவு காத்த கிளி'யாகப் பல கட்சிகள் காத்திருந்தாலும், தி.மு.க-வின் வலுவான கூட்டணி அமைப்பு, ஆட்சி முறை 2026-லும் அவர்கள் கோட்டையைத் தக்கவைப்பார்கள் என்பதைத் தெளிவாகக் காட்டுகிறது.