தமிழ்நாட்டில் பாஜக ஒரு இடத்தில் கூட முன்னிலை இல்லை.. ஆனாலும் நடந்த மேஜிக்.. ஆடிப்போன அதிமுக

சென்னை: தமிழ்நாட்டில் பாஜக ஒரு இடத்தில் கூட முன்னிலை இல்லை என்கிற போதிலும் வாக்கு சதவீதத்தில் இரட்டை இலக்கத்தை தாண்டி உள்ளது. அதிமுக வாக்கில் பாதி அளவிற்கு பாஜக எடுத்துள்ளது. இதுவரை வெளியான வாக்குகளின் படி தமிழ்நாட்டில் எந்த கட்சி எத்தனை வாக்கு சதவீதம் என்பதை தேர்தல் ஆணையம் வெளியிட்டுள்ளது. அதனை பார்ப்போம்.

தமிழ்நாட்டில் மொத்தம் உள்ள 39 தொகுதிகளில் பாஜக ஒரு தொகுதியில் வெற்றி பெறவில்லை. அதேநேரம் அதன் கூட்டணி கட்சியான பாமக தர்மபுரி தொகுதியில் கடைசி வரை முன்னிலையில் இருந்தது. இந்த முன்னிலை நிலவரமும் கடைசி வரை மாறி மாறி வந்தது. இறுதியாக சௌமியா அன்புமணி 21300 வாக்குகள் வித்தியாசத்தில் தோல்வி அடைந்தார்.

திமுக வேட்பாளர் மணி 432667 வாக்குகள் பெற்று வெற்றி பெற்றார். சௌமியா அன்புணி 411367 வாக்குகள் பெற்று இரண்டாம் இடத்தை பிடித்துள்ளார் அதிமுக வேட்பாளர் அசோகன் 293629 வாக்குகள் பெற்று 3ம் இடத்தை பிடித்துள்ளார்.

தமிழ்நாட்டில் இதுவரை வெளியான வாக்குகளின் படி, பாஜக ஒரு இடத்தில் கூட முன்னிலை பெறவில்லை.. அதேநேரம் வாக்கு சதவீதம் என்பது இரட்டை இலக்கத்தில் இருக்கிறது. பாஜக 47 லட்சத்து 22 ஆயிரத்துக்கு அதிகமான வாக்குகளுடன் 11.10 சதவீதம் வாக்குகளை பெற்று 3 வது பெரிய கட்சி என்கிற நிலையை பிடித்துள்ளது. காங்கிரஸ் கட்சி 10.79 சதவீதம் வாக்குகள் பெற்று போட்டியிட்ட 9 இடங்களிலும் வெற்றியை உறுதி செய்துள்ளது. காங்கிரஸ் சுமார் 45 லட்சத்து 90 ஆயிரம் வாக்குகள் பெற்று 4வது பெரிய கட்சி என்ற நிலையை பிடித்துள்ளது.

அதிமுகவை பொறுத்தவரை போட்டியிட்ட ஒரு தொகுதியில் கூட முன்னிலையில் வரவில்லை.. அனைத்து இடங்களிலும் தோல்வியை சந்தித்துள்ளது. சுமார் 87 லட்சம் வாக்குகளுடன் 20.48 சதவீதம் வாக்குகளை பெற்றுள்ளது. அதேநேரம் திமுகவை பொறுத்தவரை சுமார் ஒரு கோடியே 13 லட்சம் வாக்குகளுடன் 26.62 சதவீதம் வாக்குகளை பெற்றுள்ளது. திமுக போட்டியிட்ட 22 ல் 22 இடங்களிலும் வெற்றியை உறுதி செய்துள்ளது. தேமுதிக 2.63 சதவீதம் வாக்குகளை பெற்றுள்ளது. ஒரு இடத்தில் (விருதுநகரில்) முன்னிலையில் இருந்தது. ஆனால் கடும் போட்டி காரணமாக அங்கு தற்போது காங்கிரஸ் வேட்பாளர் மாணிக்கம் தாகூர் வெற்றி பெறும் நிலையில் உள்ளார்.

நாம் தமிழர் கட்சி அங்கீகரிக்கப்பட்ட கட்சி இல்லை என்பதால் எத்தனை சதவீதம் வாக்குகள் வாங்கியது என்பது தெரியவில்லை. ஒட்டமொத்தமாக கட்சிகள் அல்லாதவர்கள் தமிழகத்தில் 21.04 சதவீதம் வாக்குகள் வாங்கி உள்ளனர். இதில் தான் நாம் தமிழர் கட்சி வாக்கு சதவீதமும், பாமகவின் வாக்கு சதவீதமும், மதிமுகவின் வாக்கு சதவீதம் இருக்கிறது.

English summary

In Tamil Nadu BJP is not leading even in a single seat but its vote percentage is crossing double digits. BJP has taken half of AIADMK's votes. According to the votes released so far, the Election Commission has released the vote percentage of which party including DMK and Congress in Tamil Nadu. Let's see it.