லுங்கியில் பியர் கிரில்ஸ்! மேன் vs வைல்ட் நிகழ்ச்சியில் நடிக்க இருக்கும் பிரபலம் குறித்து சர்ப்ரைஸ்
சென்னை: மேன் vs வைல்ட் நிகழ்ச்சியின் தொகுப்பாளர் பியர் கிரில்ஸ், லுங்கி கட்டியவாறு இருந்த போட்டோவை டிவிட்டரில் பகிர்ந்துள்ளார். இந்த போஸ்ட் மூலம் இவருடன் காட்டுக்குள் பயணிக்க இருக்கும் அடுத்த பிரபலம் யார் என்கிற எதிர்பார்ப்பு எகிறியுள்ளது.
மனித நடமாட்டம் இல்லாத காடுகளில் உயிர் பிழைத்திருப்பது எப்படி என்பதை அறிவியல் ரீதியாக விளக்குவதுதான் மேன் vs வைல்ட் எனும் நிகழ்ச்சி. இந்த நிகழ்ச்சியில், உலகின் மிகவும் மோசமான காடுகள், பாலைவனங்கள் போன்றவற்றில் மாட்டிக்கொண்டால் எப்படி தப்பிப்பது என்பதை கிரில்ஸ் துல்லியமாக விளக்கி வந்தார். முறையான உணவு கிடைக்காத பட்சத்தில் எந்த மாதிரியான உணவை எடுத்துக்கொள்ள வேண்டும், தண்ணீர் எங்கு கிடைக்கும்? கிடைத்த தண்ணீரை எப்படி சேமிப்பது என கிரில்ஸ் தனது நிகழ்ச்சி மூலம் விளக்கியிருப்பார்.
இவரது மேன் vs வைல்ட் நிகழ்ச்சி உலகம் முழுவதும் மிகவும் பிரபலமானதாகும். பலர் இந்த நிகழ்ச்சியிலிருந்து கற்றுக்கொண்ட விஷயங்களை வைத்து காட்டிலிருந்து தப்பியிருப்பதாகவும் கூறியுள்ளனர். இந்த நிகழ்ச்சியில் பல்வேறு நாடுகளின் பிரபலங்களும் பங்கேற்றிருக்கின்றனர். இந்தியாவை பொறுத்த அளவில் பிரதமர் மோடி, சினிமா நட்சத்திரங்களான ரஜினிகாந்த் உள்ளிட்டோரும் பங்கேற்றிருக்கின்றனர்.
இந்நிலையில், தற்போது அவர் டிவிட்டரில் போட்டுள்ள போஸ்ட் ஒன்று அனைவரிடமும் பெரும் எதிர்பார்ப்பை தூண்டியிருக்கிறது. டிவிட்டரில் அவர் லுங்கி கட்டியவாறு போஸ்ட் போட்டிருக்கிறார். எனவே நிச்சயம் இந்தியாவை சேர்ந்த பிரபலம்தான் இந்நிகழ்ச்சியில் பங்கேற்கவிருப்பது உறுதியாகியுள்ளது. ஆனால் அவர் யார் என்பது குறித்த தகவல்கள் வெளியாகவில்லை.
அடுத்த ஷோவில் அவருடன் இணைய பிரபல பாலிவுட் நடிகை பிரியங்கா சோப்ரா மற்றும் கிரிக்கெட் வீரர் விராட் கோலி ஆகியோரை அழைத்துள்ளதாக தகவல்கள் வெளியாகியுள்ளன. இருப்பினும் நிகழ்ச்சிக்கான படப்பிடிப்பு தொடங்கிய பின்னர்தான் அதில் யார் பங்கேற்கிறார் என்பது உறுதியாகும் என்பது குறிப்பிடத்தக்கது.
Click it and Unblock the Notifications
Sign in with Google