யாரையோ திருப்திப்படுத்த முயன்றிருக்கிறார்கள்.. கைது குறித்து சென்னை திரும்பியதும் உதயநிதி பதிவு

சென்னை: பொய் வழக்குகளைப் பதிவுச் செய்து சென்னையில் இருந்து தஞ்சைக்கு அலைக்கழிப்பதாக நினைத்து, யாரையோ திருப்திப்படுத்த முயன்றிருக்கிறார்கள் என்று உதயநிதி ஸ்டாலின் விஜய்யை விமர்சித்துள்ளார். மேலும் விவசாயிகளின் துயர் துடைக்க வக்கற்ற ஷோபா மாடல் அரசு, பிரச்சினைகளை திசை திருப்புவதற்காக என்னை கைது செய்திருக்கிறது என்று கூறியுள்ளார். விசாரணை முடிந்து இரவோடு இரவாக சென்னை வந்த உதயநிதி, மு.க ஸ்டாலினை நேரில் சந்தித்து பேசிய பிறகு இவ்வாறு தெரிவித்துள்ளார்.

விஜய் மற்றும் நடிகை குறித்து அவதூறு பேசியதாக நேற்று காலை 10.50 மணியளவில் எதிர்க்கட்சி தலைவர் உதயநிதி ஸ்டாலின் கைது செய்யப்பட்டார். பின்னர் சாலை மார்க்கமாக போலீஸ் வாகனத்தில் தஞ்சைக்கு அழைத்து செல்லப்பட்டார். சுமார் 7.30 மணி நேர பயணத்திற்கு பிறகு மாலை 6.50 மணியளவில் தஞ்சை செங்கிப்பட்டி போலீஸ் நிலையம் சென்றடைந்தனர்.

யாரையோ திருப்திப்படுத்த

பிறகு 7.30 மணியளவில் உதயநிதி ஸ்டாலின் போலீசார் விசாரணைக்கு அழைத்து செல்லப்பட்டார். சுமார் ஒன்றரை மணி நேரம் விசாரணைக்கு பிறகு அவர் விடுவிக்கப்பட்டார். செங்கிப்பட்டி காவல் நிலையம் முன்பு திமுகவினர் குவிந்து இருந்ததால் அங்கு பரபரப்பான சூழல் நிலவியது. இன்று சட்டசபை பட்ஜெட் என்பதால் உடனே திருச்சி விமான நிலையம் வந்த உதயநிதி ஸ்டாலின் இரவு 10.30 மணியளவில் சென்னை வந்தடைந்தார். இரவோடு இரவாக தந்தையை உதயநிதி ஸ்டாலின் சந்தித்து பேசினார்.

பின்னர் உதயநிதி ஸ்டாலின் யாரையோ ஒருவரை திருப்திப்படுத்த இப்படி செய்துள்ளதாக விஜய்யை விமர்சித்து ட்வீட் ஒன்றை பதிவிட்டுள்ளார். அதில் அவர் கூறியிருப்பதாவது:-

வக்கற்ற ஷோபா மாடல் அரசு

விவசாயிகளின் துயர் துடைக்க வக்கற்ற #SofaModel அரசு, பிரச்சினைகளை திசைதிருப்புவதற்காக என்னை கைது செய்திருக்கிறது. தஞ்சை ஆர்ப்பாட்டத்தில் தேவையற்ற வார்த்தைகளை நான் பயன்படுத்தியதாக ஆளுங்கட்சியின் Abusive warriors-ஐ வைத்து என் மீது அவதூறு பரப்பினார்கள்.

மலேசியாவில் குத்தாட்டம் போட்டவர்தான் இவர்

பொய் வழக்குகளைப்பதிவுச் செய்து சென்னையில் இருந்து தஞ்சைக்கு அலைக்கழிப்பதாக நினைத்து, யாரையோ திருப்திப்படுத்த முயன்றிருக்கிறார்கள். என்னைக் கைது செய்ததும் மீடியாவைப் பார்த்து, இந்தக் கைதை காமடியாகப் பார்க்கிறேன் என்று கூறிவிட்டுத்தான் வந்தேன். போலீஸைப் பார்த்து பயந்து ஓடிப்போய் விடவில்லை.

ஆனால் இன்றைய முதலமைச்சர் கரூரில் 41 பேர் இறந்தபோதும் அவர்கள் குடும்பத்தாரையும் பார்க்காமல், மீடியாவையும் பார்க்காமல் கைது செய்து விடுவார்களோ என்று அச்சத்தில் தலைதெறிக்க ஓடியதை நாடறியும். கரூரில் அத்தனை உயிர்கள் பலியான போதும் - அடுத்த ஒரு மாதத்தில் பட விளம்பரத்துக்காக மலேசியா போய் குத்தாட்டம் போட்டவர்தான் இவர்.

நான் கலைஞரின் பேரன்

முதலமைச்சர் வேண்டுமானால் கைதுக்கு பயப்படலாம். நான் அதற்கெல்லாம் அஞ்சமாட்டேன். நான் கலைஞரின் பேரன். முத்துவேல் கருணாநிதி ஸ்டாலின் அவர்களின் மகன். விவசாயிகளுக்காகப் போராடி கைதாவது என்றால், ஒருமுறை அல்ல 100 முறை கூட கைதாவேன். விவசாயிகளின் நலனுக்காக 300 கிலோ மீட்டர் அல்ல 3000 கிலோமீட்டருக்கு மேல் அழைத்துச் சென்றாலும், நான் செல்லத்தயார்.

உங்கள் அடக்குமுறை எங்கள் மக்கள் பணிகளை ஒரு நாளும் தடுக்காது! என்னுடைய கைதை கண்டித்த தோழமை இயக்கங்கள் உள்ளிட்ட பல்வேறு அரசியல் கட்சித் தலைவர்களுக்கும், தமிழ்நாடு முழுவதும் எனக்கு ஆதரவாக ஒற்றுமையை வெளிப்படுத்திய கழக உடன்பிறப்புகளுக்கும் என் நன்றியைத் தெரிவித்துக் கொள்கிறேன்". என்று பதிவிட்டுள்ளார்.

English summary

Udhayanidhi Stalin, who rushed to Chennai overnight, criticized the move to register false cases and drag him from Chennai to Thanjavur, stating that the authorities were merely trying to appease someone. He further alleged that the "Shobha-model" government—incapable of alleviating the farmers' distress—had arrested him solely to divert attention from the real issues.