அதிமுக - பாஜக கூட்டணிக்கு யார் தலைமை.. எடப்பாடி பழனிசாமியா அல்லது அமித்ஷாவா? திருமாவளவன் கேள்வி!

Updated: Friday, June 27, 2025, 20:08 [IST]

Subscribe to Oneindia Tamil

திருவள்ளூர்: தமிழ்நாடு சட்டமன்றத் தேர்தலுக்கான உருவாக்கப்பட்டுள்ள அதிமுக - பாஜக கூட்டணிக்கு யார் தலைமை என்பதை எடப்பாடி பழனிசாமி தெளிவுபடுத்த வேண்டும் என்று விசிக தலைவர் திருமாவளவன் அறிவுறுத்தி இருக்கிறார். அதிமுக - பாஜக கூட்டணியை வழிநடத்துவது எடப்பாடி பழனிசாமியா அல்லது அமித்ஷாவா என்றும் திருமாவளவன் கேள்வி எழுப்பி இருக்கிறார்.

மத்திய உள்துறை அமைச்சர் அமித்ஷா, தமிழ்நாட்டில் தேசிய ஜனநாயக கூட்டணி ஆட்சி அமைக்கும். அதிமுகவைச் சேர்ந்தவர் முதலமைச்சராக இருப்பார் என்று கூறி இருக்கிறார். அதிமுக பொதுச்செயலாளர் எடப்பாடி பழனிசாமியின் பெயரை கூட அமித்ஷா கூறாமல் தவிர்த்திருப்பது அக்கட்சியினர் இடையே அதிருப்தியை ஏற்படுத்தி இருக்கிறது.

Thirumavalavan Questions Leadership Clarity in AIADMK-BJP Alliance for TN Polls

அதிமுக vs பாஜக

அதேபோல் மீண்டும் அமித்ஷா கூட்டணி ஆட்சி என்று கூறி இருக்கிறார். இதனால் சட்டமன்றத் தேர்தலில் அதிமுக - பாஜக கூட்டணி வென்றால், ஆட்சி அதிகாரத்தில் பாஜக பங்கு வகிக்கும், அமைச்சரவையில் இடம்பெறும் என்று உறுதி செய்திருக்கிறார்கள். ஆனால் அதிமுக தரப்பில் இது வெறும் தேர்தல் கூட்டணி என்று மீண்டும் மீண்டும் சொல்லப்பட்டு வருகிறது.

திருமாவளவன் பேட்டி

இந்த விவகாரம் குறித்து விசிக தலைவர் திருமாவளவன் செய்தியாளர்களை சந்தித்து பேசுகையில், அதிமுக - பாஜக விரும்பி கூட்டணி அமைத்திருப்பதாக அமித்ஷா மட்டுமே சொல்லி கொண்டிருக்கிறார். இந்த கூட்டணியை என்டிஏ கூட்டணி என்றும், கூட்டணி ஆட்சி அமைக்கப் போகிறோம் என்றும் சொல்லிக் கொண்டிருக்கிறார். இதற்கு எடப்பாடி பழனிசாமி தான் மக்களுக்கு தெளிவை ஏற்படுத்த வேண்டும்.

யார் தலைமை?

அதிமுக தலைமையில் கூட்டணியா? அல்லது பாஜக தலைமையில் கூட்டணியா? என்ற கேள்வியும் எழுகிறது. அறிவிக்க வேண்டியவர் யார்? தமிழ்நாடு சட்டமன்றத் தேர்தலை முன்னிட்டு உருவாகியுள்ள இந்த கூட்டணியை தலைமை வகித்து வழிநடத்துவது எடப்பாடி பழனிசாமியா? அல்லது அமித்ஷாவா என்ற கேள்வியும் எழுந்துள்ளது. இதற்கும் அவர் விளக்கம் அளிக்க வேண்டும்.

அதிமுகவுக்கு அழுத்தம்

தொடர்ந்து, ஒரு ஆண்டுக்கு முன்னதாக அதிமுக - பாஜக கூட்டணியை உறுதி செய்துவிட்டார்கள். என்ன அவசரம், என்ன அழுத்தம் என்று தெரியவில்லை. இதற்கான காரணத்தை அதிமுக தான் தெளிவுபடுத்த வேண்டும். அதிமுக - பாஜக கூட்டணி அமைந்துவிட்ட பின், அந்த கூட்டணிக்கு விசிக செல்லுமா என்ற கேள்வியே தேவையில்லை என்று தெரிவித்துள்ளார்.

அதிமுக கூட்டணியில் விசிக?

திமுக கூட்டணியில் இடம்பெற்றிருந்தாலும், விசிக தலைவர் திருமாவளவன் அதிமுக மீதான அக்கறையை பல்வேறு தருணங்களிலும் வெளிப்படுத்தி இருக்கிறார். அண்மையில் அதிமுக முன்னாள் அமைச்சர் வைகைச் செல்வனை சந்தித்து திருமாவளவன் பேசி இருந்தார். அதேபோல் பாஜக உடன் கூட்டணி அமைத்திருப்பதால் அதிமுகவுடன் கூட்டணி அமைக்க முடியாது என்றும் திருமாவளவன் தெளிவுப்படுத்தி உள்ளார்.