விஜய் கையில் இருந்த பேப்பர்! அது என்ன சர்காரியா கமிஷன்? உதயநிதி அட்டாக் செய்ய பயன்படுத்திய அஸ்திரம்

சென்னை: தமிழ்நாடு சட்டப்பேரவைக் கூட்டத்தொடரில் எதிர்க்கட்சியான திமுகவுக்கு எதிராக முதல்வர் விஜய் ஆற்றிய உரை பெரும் அரசியல் புயலை உருவாக்கியுள்ளது. கடந்த வாரம் பேசும்போது தம் மேசையில் 3 முக்கிய ஆவணங்கள் இருப்பதாகக் குறிப்பிட்ட முதல்வர் விஜய், அவற்றை முழுமையாக வெளியிடுவதற்கு முன்பாக ஓர் உதாரணமாக சர்காரியா கமிஷன் விவகாரத்தைக் கையில் எடுத்தார்.

அதே நேரத்தில், தற்போதைய ஒப்பந்தங்களில் 7.5 சதவீதம் முதல் 10 சதவீதம் வரை முறைகேடு நடந்திருப்பதாக அமலாக்கத்துறை தெரிவித்த தகவல்களையும், முன்னாள் முதல்வர் மு.க.ஸ்டாலின் மற்றும் முன்னாள் துணை முதல்வர் உதயநிதி ஸ்டாலின் ஆகியோர் மீது முன்வைக்கப்பட்ட குற்றச்சாட்டுகளையும் சட்டப்பேரவையில் அவர் சுட்டிக்காட்டியுள்ளார்.

சட்டசபையில் முதல்வர் விஜய் பேசியது என்ன?

சட்டப்பேரவையில் பேசிய முதல்வர் விஜய், கடந்த வாரம் தம்மிடம் 3 முக்கிய கோப்புகள் இருப்பதாகக் கூறியதை நினைவுகூர்ந்தார். "அந்த மூன்று கோப்புகளைப் பிரிப்பதற்கு முன்னால், ஒரு சிறிய உதாரணத்தைப் பார்த்துவிடுவோம். சர்காரியா கமிஷன் அறிக்கையில் என்ன இருக்கிறது என்று பாருங்கள். வீராணம் குடிநீர் திட்டத்தில் சத்யநாராயணா பிரதர்ஸ் நிறுவனம் ஒப்பந்தம் எடுக்க மாறன் இரண்டரை சதவீத கமிஷன் கேட்டதாக அந்த அறிக்கையில் பதிவாகியுள்ளது. அந்த அறிக்கை வந்து இன்றைக்குப் பொன்விழாவே வந்துவிட்டது. 1970 முதல் 1974 வரை ஏழு தவணைகளாக 29 லட்சம் ரூபாய் கமிஷன் வாங்கப்பட்டதாக அந்தப் பழைய கோப்பில் தெளிவாகக் குறிப்பிடப்பட்டுள்ளது" என்று பேசினார்.

அத்துடன் நில்லாமல், தற்கால அரசியல் சூழலைச் சுட்டிக்காட்டிய அவர், "திமுக ஆட்சியில் அரசு ஒப்பந்தங்களைப் பெறுவதற்கு 7.5 சதவீதம் முதல் 10 சதவீதம் வரை முறைகேடாகப் பணம் பெறப்பட்டிருப்பதாக அமலாக்கத்துறை சுட்டிக்காட்டியுள்ளது. இதில் முன்னாள் முதல்வர் மு.க.ஸ்டாலின், முன்னாள் துணை முதல்வர் உதயநிதி ஸ்டாலின் ஆகியோரின் பெயர்களும் அடிபடுவதாக அமலாக்கத்துறை தெரிவித்துள்ளது" என்று அவையில் குறிப்பிட்டார்.

சர்காரியா கமிஷன் என்றால் என்ன? எளிய விளக்கம்

அரசியல் களத்தில் அடிக்கடி உச்சரிக்கப்படும் "சர்காரியா கமிஷன்" என்பது என்னவென்று பொதுமக்கள் பலருக்கும் எளிதாகப் புரியாமல் இருக்கலாம்.

1976-ஆம் ஆண்டு அப்போதைய மத்திய அரசால் அமைக்கப்பட்ட ஒரு விசாரணைக் குழுவே சர்காரியா கமிஷன் ஆகும். உச்சநீதிமன்றத்தின் முன்னாள் நீதிபதி ஆர்.எஸ்.சர்காரியா தலைமையில் இந்த ஆணையம் உருவாக்கப்பட்டது. 1970-களில் தமிழ்நாட்டில் ஆட்சியில் இருந்த திமுக அரசு மற்றும் அதன் அமைச்சர்கள் மீது ஊழல், அதிகார துஷ்பிரயோகம் மற்றும் நிதி முறைகேடுகள் நடந்ததாகப் புகார்கள் எழுந்தன. குறிப்பாக, சென்னை மக்களுக்குக் குடிநீர் கொண்டு வருவதற்காகத் தொடங்கப்பட்ட வரலாற்றுச் சிறப்புமிக்க "வீராணம் குடிநீர் திட்டம்" தொடர்பான ஒப்பந்தங்களில் பெருமளவு கமிஷன் வாங்கப்பட்டதாகப் புகார்கள் கூறப்பட்டன.

இந்தப் புகார்களை முறைப்படி விசாரித்து உண்மை நிலையை மத்திய அரசுக்கு அறிக்கையாக அளிக்கவே நீதிபதி சர்காரியா நியமிக்கப்பட்டார்.

வீராணம் திட்டமும் சர்காரியா அறிக்கையும்

வீராணம் ஏரியிலிருந்து சென்னைக்குக் குழாய்கள் மூலம் குடிநீர் கொண்டு வரும் திட்டம் 1970-களின் தொடக்கத்தில் தொடங்கப்பட்டது. இந்தத் திட்டத்திற்கான குழாய் பதிக்கும் ஒப்பந்தத்தை சத்யநாராயணா பிரதர்ஸ் என்ற தனியார் நிறுவனத்திற்கு வழங்கியதில் முறைகேடு நடந்ததாகப் புகார் எழுந்தது.

நீதிபதி சர்காரியா விரிவான விசாரணைக்குப் பிறகு அளித்த அறிக்கையில், ஒப்பந்தம் வழங்குவதற்காக இரண்டரை சதவீத கமிஷன் பேசப்பட்டு, 1970 முதல் 1974 வரையிலான காலகட்டத்தில் பல தவணைகளாக மொத்தம் 29 லட்சம் ரூபாய் கைமாறியதாகக் குறிப்பிடப்பட்டிருந்தது. இந்த அறிக்கை வெளியாகி ஏறத்தாழ 50 ஆண்டுகள், அதாவது பொன்விழா காலம் கடந்துவிட்ட போதிலும், தமிழக அரசியலில் ஊழல் குற்றச்சாட்டுகள் விவாதிக்கப்படும் போதெல்லாம் சர்காரியா கமிஷன் பெயர் முன்னிலைக்கு வருவது வழக்கம்.

அரசியல் வட்டாரத்தில் பரபரப்பு

பழைய வரலாற்றுக் குறிப்பான சர்காரியா கமிஷன் அறிக்கையையும், அண்மைக்கால அமலாக்கத்துறை அறிக்கையையும் ஒரே நேர்க்கோட்டில் இணைத்து முதல்வர் விஜய் சட்டசபையில் பேசியிருப்பது அரசியல் களத்தில் பெரும் விவாதத்தை ஏற்படுத்தியுள்ளது.

பழைய காலத்து வீராணம் விவகாரத்தில் 2.5 சதவீத கமிஷன் எனப் பதிவான நிலையில், தற்காலத்தில் 7.5 முதல் 10 சதவீதம் வரை லஞ்சம் பெறப்பட்டதாக அமலாக்கத்துறை குறிப்பிடுவதை ஒப்பிட்டுக் காட்டி அவர் உரை நிகழ்த்தியுள்ளார். தம் வசம் இருக்கும் 3 முக்கியக் கோப்புகளில் உள்ள விவரங்களை அடுத்தடுத்து வெளியிடப் போவதாகவும் அவர் எச்சரித்துள்ளதால், வரவிருக்கும் நாட்களில் தமிழக அரசியலில் அனல் பறக்கும் விவாதங்கள் தொடரும் என்று எதிர்பார்க்கப்படுகிறது.