தமிழக அமைச்சரவையில் அதிரடி மாற்றம்? பதவியை இழக்கும் அமைச்சர்கள்? விஜய் முக்கிய முடிவு?

Updated: Thursday, September 3, 2026, 9:53 [IST]

Subscribe to Oneindia Tamil

சென்னை: நடப்பு தமிழக சட்டமன்றக் கூட்டத்தொடர் வரும் 8-ஆம் தேதியுடன் நிறைவடைய உள்ள நிலையில், அதனைத் தொடர்ந்து அமைச்சரவையில் மிகப்பெரிய அளவிலான மாற்றங்களைச் செய்ய முதல்வர் விஜய் திட்டமிட்டுள்ளதாக தலைமைச் செயலக வட்டாரங்கள் தெரிவிக்கின்றன. சில அமைச்சர்களின் செயல்பாடுகள் திருப்திகரமாக இல்லாததால், அவர்களைப் பொறுப்பிலிருந்து விடுவித்துவிட்டு, புதிய முகங்களுக்கு வாய்ப்பளிக்க தலைமை தீவிர ஆலோசனையில் ஈடுபட்டு வருகிறது.

அமைச்சர்களின் செயல்பாடுகள் குறித்துக் கடந்த சில மாதங்களாகவே விரிவான ஆய்வுகள் மேற்கொள்ளப்பட்டு வந்தன. நிர்வாகத் திறனில் பின்தங்கியவர்கள், சர்ச்சைகளில் சிக்குபவர்கள் மற்றும் மக்கள் மத்தியில் அதிருப்தியைச் சம்பாதித்த அமைச்சர்கள் மீது நடவடிக்கை எடுப்பது உறுதியாகியுள்ளது. இதன் தொடர்ச்சியாக, கூட்டத்தொடர் முடிந்த உடனேயே புதிய அமைச்சர்கள் பதவியேற்பு மற்றும் இலாகா மாற்றங்கள் தொடர்பான அறிவிப்புகள் வெளியாகும் என எதிர்பார்க்கப்படுகிறது.

தொழில்துறைக்கு ஆதவ் அர்ஜுனா? கீர்த்தனாவுக்கு புதிய பொறுப்பு

தமிழகத்தின் பொருளாதார வளர்ச்சிக்கும், தொழில் முதலீடுகளை ஈர்ப்பதற்கும் மிக முக்கியமான துறையாக விளங்குவது தொழில்துறை. தற்போது இத்துறையைக் கவனித்து வரும் அமைச்சர் கீர்த்தனாவின் செயல்பாடுகள் எதிர்பார்த்த அளவிற்கு அமையவில்லை என்ற விமர்சனங்கள் ஆளுங்கட்சி வட்டாரத்திலேயே எழுந்துள்ளன.

இதனால், தொழில்துறையை மிகவும் சுறுசுறுப்பாகவும் செயல்திறனுடனும் வழிநடத்தும் நோக்கில், முக்கிய நிர்வாகியான ஆதவ் அர்ஜுனாவிடம் அத்துறை ஒப்படைக்கப்படலாம் என்ற தகவல் வெளியாகியுள்ளது. அதேநேரம், அமைச்சர் கீர்த்தனாவுக்கு மனிதவள மேம்பாட்டுத் துறை ஒதுக்கப்பட வாய்ப்புள்ளதாகக் கூறப்படுகிறது.

செங்கோட்டையனுக்கு மீண்டும் பள்ளிக்கல்வித் துறை?

முன்னாள் அதிமுக ஆட்சிக் காலத்தில் பள்ளிக்கல்வித் துறை அமைச்சராகப் பணியாற்றி சிறந்த அனுபவம் பெற்றவர் தற்போதைய வருவாய்த்துறை அமைச்சர் செங்கோட்டையன். நிர்வாக ரீதியாக பள்ளிக்கல்வித் துறையில் பல புதிய முன்னெடுப்புகளைச் செயல்படுத்திய அனுபவம் அவருக்கு உண்டு.

தற்போது செய்தி மற்றும் விளம்பரம், தமிழ் வளர்ச்சி, செய்தித் தொடர்பு மற்றும் திரைப்படத் துறை எனப் பல துறைகளை அமைச்சர் ராஜ்மோகன் கவனித்து வருகிறார். கூடுதல் பணிச்சுமையைக் குறைக்கும் வகையில், பள்ளிக்கல்வித் துறையை மட்டும் பிரித்து செங்கோட்டையனிடம் ஒப்படைக்க ஆலோசிக்கப்பட்டு வருகிறது. அதேசமயம், அமைச்சர் ராஜ்மோகனுக்கு வேறு சில முக்கிய பொறுப்புகள் கூடுதலாக வழங்கப்படும் எனத் தெரிகிறது.

கூட்டணிக் கட்சி அமைச்சர்கள் மற்றும் இலாகா மாற்றங்கள்

கூட்டணிக் கட்சியான காங்கிரஸைச் சேர்ந்த அமைச்சர் விஸ்வநாதனிடம் இருக்கும் உயர்கல்வித் துறை மாற்றப்பட வாய்ப்புள்ளதாகக் கூறப்படுகிறது. அதேவேளையில், சுற்றுலாத்துறை அமைச்சராக இருக்கும் மற்றொரு காங்கிரஸ் நிர்வாகியான ராஜேஷுக்குக் கூடுதலாகச் சில துறைகள் ஒதுக்கப்படலாம் என்ற தகவலும் கசிந்துள்ளது.

மேலும், கனிமவளத் துறை அமைச்சர் பிரபு, ஆவின் மற்றும் பால்வள மேம்பாட்டுத் துறைக்கு மாற்றப்படலாம் என எதிர்பார்க்கப்படுகிறது.

மீன்வளத்துறை மற்றும் கைத்தறித் துறைகளுக்கு இடையே ஒரு நேரடி பரிமாற்றம் நிகழ வாய்ப்புள்ளது. அதன்படி, அமைச்சர் ஸ்ரீநாத்திடம் உள்ள மீன்வளத்துறை அமைச்சர் விஜய் பாலாஜிக்கும், விஜய் பாலாஜி கவனித்து வரும் கைத்தறித்துறை அமைச்சர் ஸ்ரீநாத்திற்கும் மாற்றப்படக்கூடும் என செயலக வட்டாரங்கள் தெரிவிக்கின்றன.

சர்ச்சைகளில் சிக்கியவர்களுக்குக் கல்தா?

அடிக்கடி பொதுவெளியில் பேசும் பேச்சுகளால் தேவையற்ற சர்ச்சைகளில் சிக்கி அரசுக்கு நெருக்கடியை ஏற்படுத்தியதாகப் போக்குவரத்துத் துறை அமைச்சர் விஜய் பார்த்திபன் மீது தலைமை அதிருப்தியில் இருப்பதாகக் கூறப்படுகிறது. இதனால் அவரிடமிருந்து போக்குவரத்துத் துறை பறிக்கப்பட்டு, கூட்டுறவுத் துறை வழங்கப்படலாம் எனத் தெரிகிறது.

அனைத்திற்கும் மேலாக, போதைப் பொருள் விவகாரம் மற்றும் சட்டவிரோதப் புகார்கள் தொடர்பாகச் சட்டமன்றத்திலும் மக்கள் மத்தியிலும் எதிர்க்கட்சிகளால் மிகக் கடுமையாக விமர்சிக்கப்பட்ட அமைச்சர் 'கில்லி' சரத்குமார் அமைச்சரவையிலிருந்து ஒட்டுமொத்தமாகக் கழற்றிவிடப்பட அதிக வாய்ப்புள்ளது.

செயல்திறன் மிக்க புதியவர்களுக்கு வாய்ப்பளித்து, அரசு நிர்வாகத்தை மேலும் வேகப்படுத்தவும், மக்கள் மத்தியில் அரசுக்கான நற்பெயரை வலுப்படுத்தவுமே இந்த அதிரடி மறுசீரமைப்பு முன்னெடுக்கப்படுவதாக அரசியல் நோக்கர்கள் கருதுகின்றனர்.