புதிய ரூட் எடுத்த விஜய்.. இதுவரை வந்த பெரிய விமர்சனங்களுக்கு எல்லாம் ஒரே மூவ் மூலம் பதிலடி!
சென்னை: தமிழ்நாட்டில் புதிய தொழில் முதலீடுகளை ஈர்ப்பதிலும், தற்போது இயங்கி வரும் தொழில் நிறுவனங்களின் செயல்பாடுகளை ஊக்குவிப்பதிலும் மாநில அரசு போதிய கவனம் செலுத்தவில்லை என்று எதிர்க்கட்சிகளும் விமர்சகர்களும் குற்றச்சாட்டுகளை முன்வைத்து வருகின்றன.
இந்த நிலையில், அதற்குப் பதிலடி கொடுக்கும் வகையில் விஜய் முக்கியமான சில நடவடிக்கைகளை எடுக்க உள்ளார். தமிழ்நாடு முழுக்க முதலீடுகளை ஆய்வு செய்ய உள்ளார். அதன் ஒரு பகுதியாக ஸ்ரீபெரும்புதூர் - ஒரக்கடம் தொழில் மண்டலத்தில் அமைந்துள்ள பிரமாண்ட உற்பத்தி ஆலைகளுக்கு நேரில் சென்று அதிரடி ஆய்வு மேற்கொள்கிறார்.
மாநிலத்தின் பொருளாதார வளர்ச்சி மந்தமடைந்து விட்டதாக எழுந்த அரசியல் ரீதியான விமர்சனங்களுக்கு மத்தியில், முதலமைச்சரின் இந்த நேரடி களப் பயணம் பன்னாட்டு நிறுவனங்கள் மற்றும் தொழிலதிபர்களிடையே பெரும் நம்பிக்கையை ஏற்படுத்தும் மிக முக்கிய நகர்வாகப் பார்க்கப்படுகிறது.
தொழிற்துறையினரின் நம்பிக்கையை அதிகரிக்கும் பயணம்
கடந்த சில மாதங்களாக தமிழ்நாட்டின் தொழில் துறை கொள்கைகள் மற்றும் முதலீட்டுச் சூழல் குறித்து பல்வேறு தரப்பிலும் கேள்விகள் எழுப்பப்பட்டு வந்தன. குறிப்பாக, அண்டை மாநிலங்களின் தொழில் போட்டிக்கு மத்தியில் தமிழ்நாட்டின் தொழில்துறைப் பாதுகாப்பு மற்றும் உள்கட்டமைப்பு வசதிகள் குறித்து முதலீட்டாளர்கள் மத்தியில் சிறிய அளவிலான தயக்கம் நிலவுவதாக எதிர்க்கட்சிகள் குற்றம் சாட்டி வந்தன.
இந்தச் சூழ்நிலையில், முதலமைச்சர் நேரடியாகக் களம் இறங்கி, இந்தியாவின் முன்னணி தொழில் மண்டலங்களில் ஒன்றான ஸ்ரீபெரும்புதூர் - ஒரக்கடம் பகுதியில் இயங்கும் பிரதான நிறுவனங்களைப் பார்வையிடுவது, தமிழ்நாடு அரசு எப்போதும் தொழில்துறையினரின் பக்கம் உறுதியாக நிற்கிறது என்ற வலுவான செய்தியை சர்வதேச முதலீட்டாளர்களுக்கு உணர்த்தும் வகையில் அமைந்துள்ளது.
அதிகாரப்பூர்வ பயணத்திட்டம்
அதிகாரப்பூர்வ தகவல்களின்படி, முதல்வர் தனது தொழில் துறை கள ஆய்வை ஸ்ரீபெரும்புதூர் அருகிலுள்ள இருங்காட்டுக்கோட்டையில் இருந்து தொடங்குகிறார்.
செயிண்ட்-கோபைன் கண்ணாடி ஆலை ஆய்வு
முதலில், இருங்காட்டுக்கோட்டையில் அமைந்துள்ள உலகப் புகழ்பெற்ற செயிண்ட்-கோபைன் இந்தியா நிறுவனத்தின் வேர்ல்ட் கிளாஸ் காம்ப்ளக்ஸ் உற்பத்தி மையத்திற்குச் செல்லும் முதல்வர் , அங்கு நடைபெற்று வரும் உற்பத்திகளையும் தொழில்நுட்ப நடைமுறைகளையும் பார்வையிடுகிறார். இது இந்தியாவில் அந்நிறுவனத்தின் மிக முக்கிய உற்பத்தி மையங்களில் ஒன்றாகும்.
சிப்காட் திட்ட அலுவலகத்தில் ஆய்வு
அதைத் தொடர்ந்து, ஸ்ரீபெரும்புதூர் அருகிலுள்ள மாம்பாக்கத்தில் அமைந்துள்ள சிப்காட் திட்ட அலுவலகத்திற்கு முதலமைச்சர் விஜய் வருகை தருகிறார். அங்கு அப்பகுதியில் நடைபெற்று வரும் உள்கட்டமைப்பு மேம்பாட்டுப் பணிகள், தொழிற்பேட்டை வசதிகள் மற்றும் எதிர்கால விரிவாக்க திட்டங்கள் குறித்து அதிகாரிகளுடன் உயர்நிலை ஆய்வுக்கூட்டம் நடத்துகிறார்.
டெய்ம்லர் பஸ் உற்பத்தி மையம்
இதன் தொடர்ச்சியாக, ஒரக்கடத்தில் அமைந்துள்ள வணிக வாகனத் தயாரிப்பில் முன்னணி வகிக்கும் டெய்ம்லர் பஸ்சஸ் இந்தியா உற்பத்தி ஆலைக்குச் சென்று, பேருந்துகள் தயாரிப்பு மற்றும் அதன் தொழில்நுட்ப உள்கட்டமைப்புகளைப் பார்வையிடுகிறார்.
நிசான் கார் ஆலை கள ஆய்வு
தனது ஆய்வின் இறுதிப்பகுதியாக, ஸ்ரீபெரும்புதூர் பகுதியில் உள்ள சர்வதேச அளவில் புகழ்பெற்ற நிசான்கார் உற்பத்தி ஆலைக்கு முதல்வர் நேரில் சென்று ஆய்வு மேற்கொள்கிறார். அங்கு வாகன உற்பத்தி திறன்கள் மற்றும் ஏற்றுமதி சாத்தியக்கூறுகள் குறித்து ஆலை நிர்வாகிகளுடன் கலந்துரையாடுகிறார்.
ஸ்ரீபெரும்புதூர் - ஒரக்கடம் தொழில் மண்டலத்தின் முக்கியத்துவம்
காஞ்சிபுரம் மாவட்டத்தில் அமைந்துள்ள ஸ்ரீபெரும்புதூர் - ஒரக்கடம் தொழில் மண்டலம், தமிழ்நாட்டின் மிகப்பெரிய மற்றும் மிக முக்கியமான தொழில் உற்பத்தி மையங்களில் ஒன்றாக விளங்குகிறது.
தொழில் துறை மையத்தின் சிறப்பு:
மோட்டார் வாகனத் துறை, பொறியியல் சாதனங்கள், எலக்ட்ரானிக்ஸ் மற்றும் மேம்பட்ட உற்பத்தித் துறைகளில் செயல்படும் பல முன்னணி பன்னாட்டு நிறுவனங்களின் தாயகமாக இப் பகுதி திகழ்கிறது.
தொழில் வளர்ச்சி மற்றும் வேலைவாய்ப்பு உருவாக்கம்
கடந்த சில ஆண்டுகளாக, ஸ்ரீபெரும்புதூர் மற்றும் ஒரக்கடம் பகுதிகள் தமிழ்நாட்டின் தொழில் துறை வளர்ச்சிக்கும், மாநிலத்தின் மொத்த உள்நாட்டு உற்பத்திக்கும் மிக முக்கியப் பங்காற்றி வருகின்றன. ஆயிரக்கணக்கான நேரடி மற்றும் மறைமுக வேலைவாய்ப்புகளை உருவாக்கி, லட்சக்கணக்கான இளைஞர்களின் வாழ்வாதாரத்தை உயர்த்தும் முதன்மை காரணியாக இந்த தொழில் மண்டலம் திகழ்கிறது.
இப்பகுதியில் தற்போது இயங்கி வரும் பன்னாட்டு நிறுவனங்கள் தங்களது உற்பத்தியை மேலும் விரிவாக்கம் செய்யவும், புதிய உள்நாட்டு மற்றும் வெளிநாட்டு முதலீடுகளைப் பெறவும் தேவையான உள்கட்டமைப்புகளை மாநில அரசு தொடர்ந்து மேம்படுத்தி வருகிறது.
விஜய்யின் இந்த நேரடி கள ஆய்வு, தொழில்துறையினரிடையே பெரும் வரவேற்பைப் பெற்றுள்ளது. பெரிய அளவிலான தொழிற்கூடங்களின் கள நிலவரங்களை நேரடியாகக் கேட்டறிந்து, உள்கட்டமைப்புத் தேவைகளை விரைவாகப் பூர்த்தி செய்ய இந்த ஆய்வு உதவும் என அரசு அதிகாரிகள் தெரிவித்துள்ளனர்.
முதலீட்டாளர்களுக்கு அரசு தரும் உறுதி
தொழில் அதிபர்கள் மற்றும் முதலீட்டாளர்களின் தேவைகளை அரசு உடனுக்குடன் பூர்த்தி செய்யும் என்பதையும், உள்கட்டமைப்பு மற்றும் நிர்வாக ரீதியான தடைகள் எதுவும் இருக்காது என்பதையும் முதல்வரின் இந்த வருகை தெளிவுபடுத்துகிறது.
இந்த கள ஆய்வின் மூலம் முதலீட்டாளர்களின் சந்தேகங்கள் நிவர்த்தி செய்யப்பட்டு, தமிழ்நாட்டில் மேலும் பல புதிய முதலீடுகள் வரவும், நிலுவையில் உள்ள விரிவாக்கத் திட்டங்கள் விரைவுபடுத்தப்படவும் வழிவகுக்கும் என்று எதிர்பார்க்கப்படுகிறது
Click it and Unblock the Notifications
Sign in with Google
