அண்ணாமலை தான் தமிழ்நாடு முதல்வர்.. பற்ற வைத்த ஆதரவாளர்கள்.. இது எப்படி சாத்தியம்?

சென்னை: தமிழக சட்டமன்றத் தேர்தல் வாக்கு எண்ணிக்கையில் இதுவரை இல்லாத ஒரு மிகப்பெரிய அரசியல் மாற்றம் அரங்கேறி வருகிறது. இன்று காலை 9:30 மணி நிலவரப்படி வெளியாகியுள்ள முன்னிலை விவரங்கள், 50 ஆண்டுகால திராவிட அரசியலின் அஸ்திவாரத்தையே அசைத்துப் பார்த்துள்ளன. ஆளுங்கட்சியான திமுக மற்றும் பிரதான எதிர்க்கட்சியான அதிமுகவை பின்னுக்குத் தள்ளிவிட்டு, நடிகர் விஜய்யின் தமிழக வெற்றி கழகம் முதலிடத்திற்கு முன்னேறியுள்ளது. இந்த நிலையில், "அண்ணாமலை தான் அடுத்த முதலமைச்சர்" என அவரது ஆதரவாளர்கள் கிளப்பியுள்ள புதிய விவாதம் தமிழக அரசியலில் புயலைக் கிளப்பியுள்ளது.

காலை 9:30 மணி நிலவரப்படி, தமிழக வெற்றி கழகம் யாரும் எதிர்பார்க்காத வகையில் 76 தொகுதிகளில் முன்னிலை வகித்து முதலிடத்தில் உள்ளது. இதற்கு அடுத்தபடியாக அதிமுக 55 தொகுதிகளிலும், ஆளுங்கட்சியான திமுக 51 தொகுதிகளிலும் முன்னிலை பெற்றுள்ளன. தற்போதைய நிலவரப்படி எந்த ஒரு கட்சிக்கும் தனிப்பெரும்பான்மை கிடைக்காதோ என்ற சந்தேகம் உள்ளது. அதாவது, தமிழகத்தில் 'தொங்கு சட்டசபை' அமைவதற்கான சாத்தியக்கூறுகள் உள்ளன.

இந்தச் சூழலில் தான் பாஜக-வின் முன்னணி தலைவர் அண்ணாமலையின் ஆதரவாளர்கள் சமூக வலைதளங்களில் ஒரு புதிய கணக்கைப் பகிர்ந்து வருகின்றனர். தற்போதைய நிலவரப்படி தவெக (76) மற்றும் அதிமுக (55) ஆகிய இரண்டு கட்சிகளின் முன்னிலையைச் சேர்த்தால் 131 இடங்கள் வருகின்றன. இது ஆட்சி அமைக்கத் தேவையான 118 இடங்களை விட அதிகமாகும். ஒருவேளை அதிமுக, பாஜக மற்றும் தவெக ஆகிய கட்சிகள் இணைந்து ஒரு புதிய கூட்டணியை உருவாக்கினால், அண்ணாமலையை முதலமைச்சராக முன்னிறுத்த வாய்ப்புள்ளதாக அவரது ஆதரவாளர்கள் பதிவிட்டு வருகின்றனர்.

இங்கு கவனிக்க வேண்டிய மிக முக்கியமான விஷயம் என்னவென்றால், அண்ணாமலை இந்த 2026 சட்டமன்றத் தேர்தலில் எந்தத் தொகுதியிலும் போட்டியிடவில்லை. ஆனாலும், ஒரு நபர் சட்டமன்ற உறுப்பினராக இல்லாத பட்சத்திலும் முதலமைச்சராகப் பதவியேற்க முடியும். ஆனால், பதவியேற்ற 6 மாதங்களுக்குள் ஏதேனும் ஒரு தொகுதியில் போட்டியிட்டு வெற்றி பெற வேண்டும் என்பது விதிமுறை. இதனைச் சுட்டிக்காட்டியே அண்ணாமலை ஆதரவாளர்கள் "தமிழகத்தின் அடுத்த முதல்வர் அண்ணாமலை தான்" என கூறி வருகின்றனர்.

English summary

TN Election 2026 Results: Annamalai could become CM if hung assembly forms, says his supporters as both TVK and ADMK leads more seats than DMK