மீண்டும் மதுரவாயல் தொகுதியில் போட்டியிட திமுகவில் காய் நகர்த்தும் பத்ம பிரியா.. ரசிக்காத சீனியர்கள்!

Updated: Saturday, February 14, 2026, 12:53 [IST]

Subscribe to Oneindia Tamil

சென்னை: சட்டசபைத் தேர்தலில் மதுரவாயல் தொகுதியில் திமுக மாநில ஐடி விங் நிர்வாகி பத்ம பிரியா போட்டியிட விரும்புவதாக தகவல் கிடைத்துள்ளது. கடந்த முறை மக்கள் நீதி மய்யம் கட்சியின் சார்பாக மதுரவாயல் தொகுதியில் போட்டியிட்ட பத்ம பிரியா சுமார் 33 ஆயிரத்திற்கும் அதிக வாக்குகளை பெற்றார். இதனால் திமுகவிலும் அவர் சீட் எதிர்பார்ப்பதாக தெரிய வந்துள்ளது.

2021 சட்டசபைத் தேர்தலில் தலைநகர் சென்னையில் போட்டியிட திமுகவின் ஜுனியர்கள் பலரும் ஆர்வம் காட்டி வருகின்றனர். திமுக ஆட்சி அமைக்கப்பட்ட நாள் முதலே இளைஞர்களை கவரும் வகையில் பல்வேறு நலத்திட்டங்களை தமிழக அரசு மேற்கொண்டு வருகிறது. அண்மையில் கூட 10 லட்சம் மாணவர்களுக்கு லேப்டாப் அளிக்கப்பட்டு வருகிறது.

அதேபோல் கல்லூரியில் படிக்கும் மாணவ, மாணவிகளுக்கு ரூ.1,000 அளிக்கப்பட்டு வருகிறது. நான் முதல்வன் திட்டம், தொழில் முதலீடுகள் மூலமாக இளைஞர்களுக்கான வேலைவாய்ப்பு உள்ளிட்டவையும் மேற்கொள்ளப்பட்டு வருகிறது. இதனால் இளைஞர்களை கவரும் வகையில் சில புதுமுகங்களையும் தேர்தல் களத்தில் இறக்க திமுக தலைமை ஆலோசித்து வருகிறது.

இந்த நிலையில் மேயர் பிரியா ராஜன் தொடங்கி கனிமொழியின் டீமில் உள்ள யாழினி, உதயநிதியுடன் நெருக்கம் காட்டி வரும் தமிழன் பிரசன்னா, கேகே நகர் தனசேகரன், திமுக ஐடி விங் மாநில துணைச் செயலாளர் பத்ம பிரியா உள்ளிட்டோர் சீட் எதிர்பார்த்துள்ளனர். மேயர் பிரியா வடசென்னையில் ஒரு தொகுதியை எதிர்பார்த்து அமைச்சர் சேகர்பாபுவிடம் பேசி வருவதாக கூறப்படுகிறது.

அதேபோல் மக்கள் நீதி மய்யம் கட்சி சார்பாக கடந்த சட்டசபைத் தேர்தலில் மதுரவாயல் தொகுதியில் போட்டியிட்டார். இதில் திமுக வேட்பாளர் கணபதி 1,21,298 வாக்குகள் பெற்று வென்றார். அதிமுக வேட்பாளர் பென்ஜமின் 89,577 வாக்குகளை பெற்றார். மக்கள் நீதி மய்யம் கட்சி சார்பாக போட்டியிட்ட பத்ம பிரியா 33,401 வாக்குகளை பெற்றார். திமுகவின் வெற்றிக்கு மறைமுகமாக மக்கள் நீதி மய்யம் உதவியாக இருந்தது.

இந்த முறை பத்ம பிரியா மீண்டும் மதுரவாயல் தொகுதியில் போட்டியிட காய் நகர்த்தி வருகிறார். இதனை திமுக சீனியர்கள் பெரியளவில் ரசிக்கவில்லை. கடந்த முறை மக்கள் நீதி மய்யம் சட்டசபைத் தேர்தலில் தோல்வியடைந்த 2 மாதங்களில் பத்ம பிரியா கட்சியில் இருந்து, திமுகவில் ஐக்கியமானார். அதன்பின் திமுகவுக்கு ஆதரவாக சோசியல் மீடியாவில் தொடர்ந்து வீடியோக்களை பதிவிட்டு வருகிறார்.