கலர் மட்டும் இல்லை! பஸ்க்கு உள்ளேயும் மாற்றங்கள்! சீரமைக்கப்பட்ட பேருந்துகளை தொடங்கி வைத்த ஸ்டாலின்

சென்னை: தமிழகத்தில் சீரமைக்கப்பட்ட அரசு பேருந்துகள் மஞ்சள் நிறமாக மாற்றப்பட்டுள்ளன. நிறம் மட்டும் இன்றி பேருந்துகளில் இருக்கை வசதி விரிவாக இருக்கும் வகையில் மாற்றப்பட்டுள்ளது. இந்த பேருந்துகளை முதல்வர் மு.க ஸ்டாலின் இன்று கொடியசைத்து தொடங்கி வைத்தார்.

தமிழகத்தில் அரசு போக்குவரத்து கழகத்தின் சார்பில் பேருந்துகள் இயக்கப்பட்டு வருகின்றன. தொலை தூரங்களுக்கு செல்லும் பேருந்துகள், நகர பேருந்துகள், மற்றும் விரைவு பேருந்துகள் உள்ளிட்டவை இயக்கப்பட்டு வருகின்றன. ஏழை எளிய மக்கள் முதல் நடுத்தர வர்க்க மக்களுக்கு போக்குவரத்து தேவையை பெரிதும் பூர்த்தி செய்வது அரசுபேருந்துகள் தான்.

தொலை தூர இடங்களுக்கு கூட தனியார் ஆம்னி பேருந்துகளில் கட்டணம் அதிகமாக இருக்கும் என்பதால் மக்கள் அரசு விரைவு போக்குவரத்து கழகத்தின் எஸ்.இ.டி.சி பேருந்துகளையே அதிகம் நாடுகின்றனர். நகர பேருந்துகளில் மகளிருக்கு கட்டணம் இல்லா பயண சேவை வழங்கப்படுகிறது. நகர பேருந்துகளை பயணிகள் எளிதில் கண்டுபிடிக்க ஏதுவாக அண்மையில் பிங்க் நிறத்தில் மாற்றப்பட்டன.

பிற நகர பேருந்துகள் சிவப்பு நிறத்தில் இயக்கப்படுகின்றன. வெளியூர்களுக்கு செல்லும் பேருந்துகள் நீல நிறத்திலும் விரைவு பேருந்துகள் வெள்ளை நிறத்திலும் இயக்கப்படுவதை காண முடிகிறது. இந்த நிலையில், அரசு போக்குவரத்து கழகத்திற்கு 1000 பேருந்துகளை வாங்கவும் 500 பழைய பேருந்துகளை புதுப்பிக்கவும் ரூ.500 கோடியை தமிழக அரசு ஒதுக்கியது. அதன்படி, பேருந்துகள் சீரமைக்கப்பட்டு பேருந்துகளுக்கு மஞ்சள் வர்ணம் பூசப்பட்டது.

சென்னை, பெங்களூர், திருச்சி, கரூர், உள்ளிட்ட இடங்களில் பேருந்துகளை புதுப்பிக்கும் பணிகள் நடைபெற்றன. அதன்படி பேருந்துகளை புதுப்பித்து, அவற்றுக்கு மஞ்சள் வா்ணம் பூசும் பணிகள் நிறைவு பெற்றுள்ளன. இவற்றில் முதல்கட்டமாக 100 பேருந்துகள் இன்று முதல் பயன்பாட்டுக்கு வர உள்ளன. இந்தப் பேருந்துகளை முதல்வர் மு.க.ஸ்டாலின் இன்று தொடங்கி வைப்பதாக இருந்தது.

இதற்காக சென்னை தீவுத்திடலில் இந்த பேருந்துகள் தற்போது நிறுத்தி வைக்கப்பட்டிருந்தன. இந்த பேருந்துகளை நேற்று போக்குவரத்து துறை அமைச்சர் சிவசங்கர் பார்வையிட்டு ஆய்வு செய்தார். பேருந்துகளின் நிறம் மட்டுமின்றி, இருக்கை, அமரும் வசதி போன்றவை விரிவாக இருக்கும் வகையில் மாற்றப்பட்டுள்ளது. இந்த நிலையில், தமிழகத்தில் சீரமைக்கப்பட்ட அரசு பேருந்துகளை முதல்வர் மு.க ஸ்டாலின் கொடி அசைத்து தொடங்கி வைத்தார்.

English summary

The renovated government buses in Tamil Nadu have been turned yellow. Apart from the color, the buses have also been changed so that the seating facilities are more extensive. CM Stalin will inaugurate these buses today.