அடப்பாவமே.. தொலைந்து போன சாவிகள்... உடைக்கப்பட்ட பூட்டுக்கள்.. வாக்கு எண்ணிக்கை மையங்களில் பரபரப்பு

சென்னையில் 175 வது வார்டு தபால் வாக்கு பெட்டி சாவி இல்லாததால் வேட்பாளர்கள் முன்னிலையில் பூட்டு உடைத்து திறக்கப்பட்டது.

சென்னை: நகர்புற உள்ளாட்சித் தேர்தல் வாக்கு எண்ணிக்கையின் போது பல்வேறு சுவாரஸ்ய சம்பவங்கள் நடைபெற்றன. சென்னையில் 175 வது வார்டு தபால் வாக்கு பெட்டி சாவி இல்லாததால் வேட்பாளர்கள் முன்னிலையில் பூட்டு உடைத்து திறக்கப்பட்டது. கடலூரில் ஸ்ட்ராங் ரூம் சாவி மாயம் பூட்டு அறுக்கப்பட்டு வாக்குப்பெட்டிகள் எடுத்தச்செல்லப்பட்டன.

தமிழகத்தில் உள்ள 21 மாநகராட்சிகள், 138 நகராட்சிகள், 489 பேரூராட்சிகளுக்கு நகர்ப்புற உள்ளாட்சித் தேர்தல் அறிவிக்கப்பட்டது. இவற்றில் மொத்தம் 12,820 வார்டுகள் உள்ளன. ஏற்கெனவே 218 வேட்பாளர்கள் போட்டியின்றி தேர்வு செய்யப்பட்டனர். மீதம் உள்ள வார்டு உறுப்பினர் பதவிகளை பிடிக்க 57,746 வேட்பாளர்கள் போட்டியிட்டனர்.

நடைபெற்று முடிந்த நகர்ப்புற உள்ளாட்சி தேர்தலுக்கான வாக்கு எண்ணிக்கை இன்று காலை தொடங்கியுள்ளது. கொரனா பரவல் காலம் என்பதால் அரசு மற்றும் மாநில தேர்தல் ஆணையம் வெளியிட்டுள்ள வழிகாட்டு நெறிமுறைகளை பின்பற்றி வாக்கு எண்ணிக்கை நடைபெறுகிறது.

தபால் வாக்குகள்

முதற்கட்டமாக தபால் வாக்குகள் எண்ணப்படுகின்றன. யாருக்கு வாக்கு என்பதை வேட்பாளர்கள் அல்லது முகவர்களிடம் காண்பித்த பிறகே கணக்கில் எடுத்துக் கொள்ளப்படுகிறது. தபால் வாக்குகள் முடிந்த பிறகு ஸ்டார்ங் ரூமில் வைக்கப்பட்டுள்ள மின்னணு வாக்குப்பதிவு இயந்திரங்கள் பாதுகாப்பாக வாக்கு எண்ணும் மையத்திற்குள் எடுத்து வரப்படும்

தபால் வாக்குப்பெட்டி சாவி

சென்னை மாநகராட்சியில் 200 வார்டுகளில் நடைபெற்ற வாக்குகள் அனைத்தும் மண்டத்திற்கு ஒரு வாக்கு எண்ணிக்கை மையம் என மொத்தமாக 15 இடங்களில் வாக்கு எண்ணிக்கை நடைபெற உள்ளது. வாக்கு எண்ணிக்கை மையத்தில் 14 மேஜைகள் அமைக்கப்பட்டுள்ளன. ஒரு வார்டுக்கு இரண்டு அல்லது மூன்று சுற்றுகள் வாக்கு எண்ணிக்கை நடைபெற வாய்ப்பு உள்ளது. 175-வது வார்டு தபால் வாக்கு பெட்டி சாவி இல்லாததால் வேட்பாளர்கள் முன்னிலையில் பூட்டு உடைத்து திறக்கப்பட்டது. சாவியை தொலைத்தவர்கள் யார் என்ற விசாரணை நடைபெற்று வருகிறது.

கடலூர் ஸ்ட்ராங்க் ரூம் சாவி

இதே போல கடலூர் நகராட்சியில் ஸ்ட்ராங் ரூம் சாவி மாயமானதால் வாக்கு எண்ணும் பணிகள் தாமதமானது. இதனையடுத்து ஸ்ட்ராங் ரூமின் பூட்டு அறுக்கப்பட்டு மின்னணு இயந்திரங்கள் வைக்கப்பட்டிருந்த பெட்டிகள் எடுத்துச்செல்லப்பட்டன. சாவியை தொலைத்தவர்கள் மீது என்ன நடவடிக்கை பாயப்போகிறது என்று தெரியவில்லை.

வேடிக்கை சுவாரஸ்யங்கள்

காலையில் தபால் வாக்குகள் எண்ணப்படும் போதே பல்வேறு சுவாரஸ்ய சம்பவங்கள் அரங்கேறின. இன்னும் சில மணி நேரங்களில் வார்டுகள் வாரியாக வெற்றி நிலவரம் அறிவிக்கப்படும் என்பதால் இன்னும் பல வேடிக்கையான சம்பவங்கள் நடைபெறும் என்று எதிர்பார்க்கலாம்.

English summary

TN Local Body Election 2022 Vote Counting News in Tamil: நகர்புற உள்ளாட்சித் தேர்தல் வாக்கு எண்ணிக்கையின் போது பல்வேறு சுவாரஸ்ய சம்பவங்கள் நடைபெற்றன. சென்னையில் 175 வது வார்டு தபால் வாக்கு பெட்டி சாவி இல்லாததால் வேட்பாளர்கள் முன்னிலையில் பூட்டு உடைத்து திறக்கப்பட்டது. கடலூரில் ஸ்ட்ராங் ரூம் சாவி மாயம் பூட்டு அறுக்கப்பட்டு வாக்குப்பெட்டிகள் எடுத்தச்செல்லப்பட்டன.